39. ਦਰਦ ਦੇਖ ਦੁਖ ਆਂਦਾ

ਦੁਨੀਆਂ ਦਾ ਦੁਖ ਦੇਖ ਦੇਖ ਦਿਲ

ਦਬਦਾ ਦਬਦਾ ਜਾਂਦਾ,

ਅੰਦਰਲਾ ਪੰਘਰ ਵਗ ਟੁਰਦਾ

ਨੈਣੋਂ ਨੀਰ ਵਸਾਂਦਾ,

ਫਿਰ ਬੀ ਦਰਦ ਨ ਘਟੇ ਜਗਤ ਦਾ

ਚਾਹੇ ਆਪਾ ਵਾਰੋ,

ਪਰ ਪੱਥਰ ਨਹੀਂ ਬਣਿਆਂ ਜਾਂਦਾ

ਦਰਦ ਦੇਖ ਦੁਖ ਆਂਦਾ ।੪੬।

 

40. ਬਖਸ਼ਿਸ਼ ਤੇ ਕਰਮ

'ਤੂੰ ਪਾਪੀ' 'ਤੂੰ ਪਾਪੀ' ਕਹਿ ਕਹਿ

ਪੰਡਤ ਜਿੰਦ ਸੁਕਾਈ,

ਬਖਸ਼ਣ ਵਾਲਾ ਮਿੱਤੋਂ ਬਾਹਰ,

ਅਸੀਂ ਮਿੱਤ ਵਿਚ ਭਾਈ,

ਮਿਤ ਵਾਲੇ ਦੇ ਕਰਮ ਅਮਿੱਤੇ

ਕਦੇ ਨਹੀਂ ਹੋ ਸਕਦੇ,

ਬਖਸ਼ ਅਮਿੱਤੇ ਦੀ ਜਿਤ ਪਾਊ

ਮਿਤ ਦੇ ਕਰਮ ਉਡਾਈ ।੪੭।

 

41. ਬਰਦਾ ਕਿ ਮਾਲਕ ?

ਇਕ ਮੇਲੇ ਵਿਚ ਫਿਰੇ ਆਦਮੀ

ਗਲ ਵਿਚ ਫੱਟੀ ਪਾਈ,-

ਫੱਟੀ ਤੇ ਲਿਖਿਆ, 'ਮੈਂ ਬਰਦਾ,

ਵਿਕਾਂ, ਲਓ ਕੁਈ ਭਾਈ',

ਲੈਣ ਲਗੇ ਮੈਨੂੰ ਕਿਸਿ ਕਹਿਆ :

'ਏ ਮਾਲਕ ਨਹੀਂ ਟੋਲੇ,

ਏਸ ਭੇਸ ਇਹ ਬਰਦਾ ਲੱਭੇ,

ਚਾਹੇ ਹੁਕਮ ਚਲਾਈ' ।੪੮।