ਤੇਰਾ ਮਿਲਣਾ ਵੱਡੀ ਗੱਲ ਸੀ

ਤੈਨੂੰ ਪਹਿਲਾਂ ਵੀ ਕਿਹਾ ਨਾ

ਵੱਡੀਆਂ ਗੱਲਾਂ ਦੇ

ਦੁਹਰਾਏ ਜਾਣ ਦੀ ਕੋਈ ਵੀ

ਗੁੰਜਾਇਸ਼ ਨਹੀਂ ਹੁੰਦੀ।

 

 

ਮੈਂ

ਆਪਣੇ ਪਿਆਰ ਦਾ

ਵਿਸ਼ਲੇਸ਼ਣ ਨਹੀਂ ਕਰ ਸਕਦਾ

 

ਹਾਂ

ਪਿਆਰ ਕਰ ਸਕਦਾਂ।

ਤੇਰੇ ਕਹੇ ਬੋਲ

 

ਮੇਰੇ ਇਹ ਕਹੇ ਬੋਲ

ਹਵਾ ਨੇ ਫੜ੍ਹ ਲਏ ਨੇ

 

ਦੇਖੀ ਕਿਤੇ

ਤੇਰੇ ਕੋਲੋਂ

ਇੰਝ ਹੀ ਨਾ ਲੰਘ ਜਾਣ

 

ਤੂੰ

ਹਵਾ ਕੋਲੋਂ ਫੜ੍ਹ ਲਈ।

ਆਉਣਾ

ਜਾਣਾ

ਕੁਦਰਤੀ ਹੀ ਤਾਂ ਹੈ ਸਭ

ਕੋਈ ਆ ਜਾਂਦਾ

ਕੋਈ ਤੁਰ ਜਾਂਦਾ

ਤੂੰ ਆਇਆ

ਤੇ ਤੂੰ ਤੁਰ ਗਿਆ

ਬੱਸ ਇੱਕ ਗੱਲ ਕਹਿਣੀ ਤੈਨੂੰ

ਯਰ, ਜੀਅ ਨਹੀਂ ਭਰਿਆ ਹਾਲੇ।

ਆਪਣੇ ਹਿੱਸੇ ਆਉਂਦੇ

ਪਿਆਰ ਨੂੰ

ਕਿਸੇ ਹੋਰ ਨੂੰ ਸੌਂਪਣ ਲਈ

ਦਿਲ 'ਤੇ ਇੱਕ ਨਹੀਂ

ਹਜ਼ਾਰਾਂ ਪੱਥਰ ਧਰਨੇ ਪੈਂਦੇ

ਤੇ ਪੱਥਰਾਂ 'ਚੋਂ ਡਿਗਦਾ ਪਾਣੀ

ਲਕਾਉਣਾ ਪੈਂਦਾ।