ਤੂੰ ਹੀ

ਤੋੜ ਸਕਦਾ ਸੀ ਮੈਨੂੰ

 

ਇਹ ਹਰ ਕਿਸੇ ਦੇ ਵੱਸ 'ਚ ਨਹੀਂ।

 

 

 

ਮੇਰੇ ਕਹੇ ਬੋਲ

ਤੇਰੇ ਕੋਣ 'ਤੇ ਨਹੀਂ ਆਏ

 

ਚੁੱਪ ਚੰਗੀ ਨਹੀਂ ਫਿਰ ?

ਇਸ ਹਾਸੇ ਨੂੰ

ਓਥੋਂ ਤੱਕ ਲੈ ਕੇ ਜਾਣਾ

ਜਿੱਥੇ ਜਾ ਕੇ

ਜ਼ਿੰਦਗੀ ਦਮ ਤੋੜਦੀ ਹੈ।

 

 

 

ਬੱਸ ਥੋੜੀ ਕੁ ਉਡੀਕ ਹੋਰ

ਮੈਨੂੰ ਪਤਾ

ਹਾਸੇ ਮੈਨੂੰ ਜਲਦ ਹੀ

ਲੱਭ ਲੈਣਗੇ।

ਤੇਰਾ ਪਿਆਰ

ਮੇਰੇ ਲਈ ਉਹ ਦਰੱਖਤ ਹੈ

ਜਿਹੜਾ

ਪਤਝੜ੍ਹ ਵਰਗੀ ਰੁੱਤ ਤੋਂ ਪਰ੍ਹੇ ਹੈ।

 

 

 

ਮੈਂ ਇੱਕ ਅਜਿਹੀ ਵੀ ਕਵਿਤਾ

ਲਿਖੀ ਹੈ

ਤੇਰੇ ਲਈ

ਜੋ ਤੂੰ ਕਦੇ ਨਹੀਂ ਪੜ੍ਹਨੀ

ਕਦੇ ਤੇਰੇ ਕੋਲ ਪੁੱਜਣੀ ਨਹੀਂ

ਪਰ ਮੈਂ ਉਹ ਕਵਿਤਾ ਲਿਖੀ

ਹੈ

ਆਪਣੇ ਪੜ੍ਹਨ ਲਈ।

ਤੇਰਾ ਮਿਲਣਾ ਵੱਡੀ ਗੱਲ ਸੀ

ਤੈਨੂੰ ਪਹਿਲਾਂ ਵੀ ਕਿਹਾ ਨਾ

ਵੱਡੀਆਂ ਗੱਲਾਂ ਦੇ

ਦੁਹਰਾਏ ਜਾਣ ਦੀ ਕੋਈ ਵੀ

ਗੁੰਜਾਇਸ਼ ਨਹੀਂ ਹੁੰਦੀ।

 

 

ਮੈਂ

ਆਪਣੇ ਪਿਆਰ ਦਾ

ਵਿਸ਼ਲੇਸ਼ਣ ਨਹੀਂ ਕਰ ਸਕਦਾ

 

ਹਾਂ

ਪਿਆਰ ਕਰ ਸਕਦਾਂ।