ਤੂੰ ਫਿਰ ਕਾਸ ਨੂੰ ਆਇਆ ਸੈਂ ?

ਕਾਸ ਨੂੰ ਸੂਲੀ ਚੜ੍ਹਿਆ ਸੈਂ ?

ਤੇਰੇ ਜਿਹੇ ਕਾਸ ਨੂੰ ਆਏ ਸਨ ?

ਕਾਸ ਨੂੰ ਆਉਂਦੇ ਨੇ ?

ਕਾਸ ਨੂੰ ਸੂਲੀ ਚੜ੍ਹਦੇ ਨੇ ?

 

ਨਿਰਾ ਇਹ ਦੱਸਣ,

ਕਿ ਹੱਕ ਨੂੰ ਸਦਾ ਫਾਂਸੀ,

ਤੇ ਸੱਚ ਨੂੰ ਸਦਾ ਸੂਲੀ,

ਫੜਿਅਨ ਹਮੇਸ਼ਾ ਸਾਧ,

ਮਾਰੀਅਨ ਹਮੇਸ਼ਾ ਸਿੱਧੇ,

ਕਿ ਗਲਾ ਘੁਟਸੀ ਹਮੇਸ਼ਾ ਦਿਆਨਤ ਦਾ,

ਬੇੜਾ ਡੁਬਸੀ ਹਮੇਸ਼ਾਂ ਪਿਆਰਾਂ ਦਾ ।

 

ਤੇ ਹਾਂ ਕਿ,

ਸੂਲੀ ਉਤੇ ਸਵਾਦ ਹੈ ਜੋ ਫੁੱਲ-ਸੇਜਾਂ ਤੇ ਨਹੀਂ,

ਫਾਂਸੀ ਵਿੱਚ ਉਹ ਸੁਖ ਹੈ, ਕਿ ਹਕੂਮਤ ਵਿੱਚ ਨਹੀਂ,

ਫਸਣ ਵਿੱਚ ਉਹ ਅਨੰਦ ਹੈ ਕਿ ਫਸਾਣ ਵਿੱਚ ਨਹੀਂ ।

ਮਰਨ ਵਿੱਚ ਉਹ ਰਸ ਹੈ ਕਿ ਮਾਰਨ ਵਿੱਚ ਨਹੀਂ ।

 

ਤੇ ਨਾਲੇ ਹਾਂ,

ਕਿ ਜਿਦ੍ਹਾ ਬਾਪੂ ਨਹੀਂ, ਬਾਪੂ ਦੀ ਆਸ ਨਹੀਂ ।

ਉਹ ਰੋਵੇ ਤੇ ਮਰੇ ?

ਕਿ ਜਿਦ੍ਹਾ ਬਾਪੂ ਹੈ, ਬਾਪੂ ਦੀ ਆਸ ਹੈ,

ਕਿਉਂ ਰੋਵੇ ਤੇ ਮਰੇ ?

ਕਿ ਬਾਪੂ ਵਾਲਿਆਂ ਦੀ ਮੌਤ,

ਨਾ-ਬਾਪੂ ਵਾਲਿਆਂ ਦੇ ਲੱਖਾਂ ਜੀਵਨਾਂ ਤੋਂ

ਚੰਗੇਰੀ ਹੈ ਤੇ ਸੋਹਣੇਰੀ ।