ਹੁਕਮ ਦੀ ਕਾਰ
ਪ੍ਰਸ਼ਨ-
ਸਾਗਰ, ਬਈ ਤੂੰ ਸੁਹਣਾ ਸਾਗਰ !
ਤੈਂ ਰੂਪ ਤੇ ਰੰਗ ਸੁਹਾਵੇ,
ਪਉਣ ਚਲੇ ਗਲ ਲੱਗ ਜੋ ਤੇਰੇ
ਆ ਸਭ ਨੂੰ ਜੱਫੀਆਂ ਪਾਵੇ,
ਡੂੰਘ ਤੁਸਾਡਾ ਅਕਲ ਦੇਂਵਦਾ,
ਹਾਂ, ਹੋਣ ਗੰਭੀਰ ਸਿਖਾਵੇ
ਤਾਰੂ ਸ਼ਕਤੀ ਦਾ ਤੂੰ ਮਾਲਕ
ਤੂੰ ਬੇੜੇ ਪਾਰ ਲੰਘਾਵੇਂ।
ਸਾਗਰ ਦਾ ਉਤਰ-
ਮੈਂ ਵਿਚ ਅਪਣਾ ਗੁਣ ਨਹੀਂ ਕੋਈ
ਮੈਂ ਕਰਾਂ ਜੁ ਹੁਕਮ ਕਰਾਵੇ,
ਹੁਕਮ ਕਰੇ ਬੱਦਲ ਬਣ ਜਾਵਾਂ
ਇਹ ਦੁਨੀਆਂ ਤਾਂ ਵਰੁਸਾਵੇ;
ਹੁਕਮ ਕਰੇ ਨਦੀਆਂ ਬਣ ਵਹਿ ਵਹਿ
ਹਾਂ, ਮੁੜ ਸਾਗਰ ਬਣ ਜਾਵੇ।
ਭਾਰੇ ਡੋਬਾਂ, ਹੌਲੇ ਤਾਰਾਂ,
ਗੁਣ ਜੋ ਮੈਂ ਵਿਚ ਪਾਵੇ।
ਹੁਕਮ ਨਾਲ ਕਰ ਜੋੜ ਲਏ ਜੋ
ਚੜ੍ਹਨ ਉਸ ਰੰਗ ਸੁਹਾਵੇ। ੨੫
