ਅੰਮ੍ਰਿਤਾ ਜਦੋਂ ਪੌਦਿਆਂ ਨੂੰ ਪਾਣੀ ਦਿੰਦੇ ਤਾਂ ਮਨੀਪਲਾਂਟ ਨੂੰ ਵੇਖ ਕੇ ਕਹਿੰਦੇ, "ਵੇਖ, ਇਹ ਕਿਸਤਰ੍ਹਾਂ ਵੇਲ ਵਾਂਗੂੰ ਵਧ ਰਿਹਾ ਹੈ।"

ਤੇ ਇਮਰੋਜ਼ ਜੁਆਬ ਦਿੰਦੇ, "ਤੇਰੇ ਪਾਣੀ ਦੇਣ ਉੱਤੇ ਤਾਂ ਵਾਰਸ ਸ਼ਾਹ ਦੀਆਂ ਵੀ ਟਾਹਣੀਆਂ ਫੁੱਟ ਆਈਆਂ ਸਨ, ਇਹ ਤਾਂ ਵਿਚਾਰੀ ਵੇਲ ਹੀ ਹੈ।"

ਮੈਂ ਸੋਚ ਰਹੀ ਸਾਂ, ਸਮਾਜ ਬਦਲਾਵ ਦੀ ਗੱਲ ਤਾਂ ਕਰਦਾ ਹੈ, ਪਰ ਜਦੋਂ ਬਦਲਾਵ ਆਉਂਦਾ ਹੈ ਤਾਂ ਉਸ ਤੋਂ ਡਰਦਾ ਹੈ, ਉਸਦਾ ਵਿਰੋਧ ਕਰਦਾ ਹੈ, ਉਸ ਦੇ ਵਿਰੋਧ ਵਿਚ ਮੋਰਚਾਬੰਦੀ ਕਰਦਾ ਹੈ।

ਅੰਮ੍ਰਿਤਾ ਅਤੇ ਇਮਰੋਜ਼ ਨੇ ਇਕ ਨਵੇਂ ਸਮਾਜਿਕ ਪ੍ਰਬੰਧ ਦੀ ਬੁਨਿਆਦ ਰੱਖੀ ਹੈ। ਉਹਨਾਂ ਰਿਸ਼ਤਿਆਂ ਨੂੰ ਇਕ ਨਵੀਂ ਜੁਬਾਨ ਦਿੱਤੀ ਹੈ, ਆਪਣੀ ਸੋਚ ਵਿਚ ਵੀ ਅਤੇ ਆਪਣੇ ਜੀਵਨ ਵਿਚ ਵੀ।