*

ਆਪਣੀ ਮੈਂ ਨੂੰ ਮਾਰਕੇ ਦੱਬਣਾ ਪੈਂਦਾ ਏ

ਹੱਸ ਕੇ ਦੁੱਖ ਦਾ ਟੁੱਕਰ ਚੱਬਣਾ ਪੈਂਦਾ ਏ

 

ਫੇਰ ਗਵਾਚ ਨਾ ਜਾਵਾਂ ਇਹ ਸਮਝਾਵਣ ਲਈ

ਰੋਜ਼ ਈ ਆਪਣੇ ਆਪ ਨੂੰ ਲੱਭਣਾ ਪੈਂਦਾ ਏ

 

ਕਿੱਡੀ ਭੈੜੀ ਗੱਲ ਏ ਉੱਚਿਆਂ ਹੋਵਣ ਲਈ

ਅੱਡੀਆਂ ਚੁੱਕ ਚੁੱਕ ਓਸ ਨਾਲ ਫੱਬਣਾ ਪੈਂਦਾ ਏ

 

ਹੋਰ ਕਿਸੇ ਨਾਲ ਤਾਕਤ ਨਈਂ ਜੋ ਲੜਨੇ ਦੀ

ਗੱਲ ਗੱਲ ਉੱਤੇ ਲੜਨਾ ਰੱਬ ਨਾ ਪੈਂਦਾ ਏ

 

ਘੱਟ ਤੋਂ ਘੱਟ ਵੀ ਚੰਗੇ ਸ਼ਿਅਰ ਨੂੰ ਸੋਚਣ ਲਈ

ਇਕ ਮਿਸਰੇ ਤੇ ਦੋ ਦਿਨ ਯੱਬਣਾ ਪੈਂਦਾ ਏ

 

ਦੂਜਾ ਨਾਂ ਏ ‘ਬੁਸ਼ਰਾ ਨਾਜ਼' ਮੁਹੱਬਤ ਦਾ

'ਬੁਸ਼ਰਾ ਨਾਜ਼' ਨੂੰ ਦਿਲ ਨਾਲ ਲੱਭਣਾ ਪੈਂਦਾ ਏ