ਰੱਬੀਆ

ਤੂੰ ਆਇਐਂ ਤਾਂ ਬਦਲ ਗਏ ਨੇ ਮੇਰੇ ਰੂਪ-ਅਕਾਰ

ਤੂੰ ਆਇਐਂ ਤਾਂ ਹੋ ਗਿਆ ਮੇਰਾ ਤਿਤਲੀ ਜਿੰਨਾ ਭਾਰ

ਤੂੰ ਆਇਐਂ ਵੇ ਲੈ ਕੇ ਆਇਐਂ ਸੁਪਨੇ, ਰੰਗ, ਬਹਾਰ

ਤੂੰ ਆਇਐਂ ਤਾਂ ਹੱਸਣ ਲੱਗਪੀ ਬਿਖੜੇ ਮਨ ਦੀ ਸਾਰ

 

ਤੂੰ ਆਇਐਂ ਤਾਂ ਉਮਰ ਖ਼ਾਬਾਂ ਦੀ ਹੋਗੀ ਹੋਰ ਜਵਾਨ

ਤੂੰ ਆਇਐਂ ਤਾਂ ਉੱਚੀ ਹੋਈ ਇਸ਼ਕ ਦੀ ਸੁੱਚੀ ਤਾਨ

ਤੂੰ ਆਇਐਂ ਤਾਂ ਸਹਿਜ ਹੋਇਆ ਏ ਸੋਝੀ, ਸੁਰਤ, ਧਿਆਨ

ਤੂੰ ਆਇਐਂ ਤਾਂ ਝੂਠੇ ਪੈ ਗਏ ਸੱਚ ਦੇ ਸਭ ਵਖਿਆਨ

 

ਤੂੰ ਆਇਐਂ ਤਾਂ ਅੱਖਰ-ਅੱਖਰ ਨਿੱਤਰਿਆ ਪਾਣੀ ਲੱਗੇ

ਤੂੰ ਆਇਐਂ ਤਾਂ ਅਕਲ ਸੰਵਾਏ ਸਾਂਵੇ-ਖੁੱਲ੍ਹੇ ਝੱਗੇ

ਤੂੰ ਆਇਐਂ ਤਾਂ ਗੀਤ ਹੀ ਬਣਗੇ ਹਾਰ, ਹਮੇਲਾਂ, ਤੱਗੇ

ਤੂੰ ਆਇਐਂ ਤਾਂ ਰੱਤੜੇ ਹੋ ਗਏ ਰੰਗ ਚਾਵਾਂ ਦੇ ਬੱਗੇ

 

ਤੂੰ ਆਇਐਂ ਤਾਂ ਰੁੱਤ ਗੁਲਾਬੀ, ਸ਼ਹਿਦ ਮੁਹੱਬਤੀ ਚੋਇਆ

ਤੂੰ ਆਇਐਂ ਤਾਂ ਥੱਕੀਆਂ-ਥੱਕੀਆਂ ਰੀਝਾਂ ਨੇ ਮੁੱਖ ਧੋਇਆ

ਤੂੰ ਆਇਐਂ ਤਾਂ ਖੁਸ਼ੀ 'ਚ ਬੌਰਾ ਦਿਲ ਹੱਸਿਆ ਤੇ ਰੋਇਆ

ਤੂੰ ਆਇਐਂ ਤਾਂ ਆਪਾ ਲੱਭਾ, ਬਾਕੀ ਸਭ ਕੁਝ ਖੋਇਆ