ਜਿਉਣ ਜੋਗਾ
ਉਹ ਤਾਂ ਸ਼ਬਦਾਂ 'ਚ ਵੱਸੇ, ਉਹ ਤਾਂ ਅਰਥਾਂ 'ਚ ਵੱਸੇ
ਉਹ ਤਾਂ ਜ਼ਿੰਦਗੀ ਜਿਊਣ ਦੀਆਂ ਸ਼ਰਤਾਂ 'ਚ ਵੱਸੇ
ਸਾਥੋਂ ਲੁਕੀਆਂ ਉਹ ਦਿਲ ਦੀਆਂ ਪਰਤਾਂ 'ਚ ਵੱਸੇ
ਓਹੀ ਮੇਰਿਆਂ ਗੀਤਾਂ ਦਾ ਹੈ ਸਰੂਰ ਹੋ ਗਿਆ
ਤੇ ਉਹਨੂੰ ਵਹਿਮ ਹੈ ਉਹ ਸਾਡੇ ਕੋਲੋਂ ਦੂਰ ਹੋ ਗਿਆ
ਉਹਨੂੰ ਰੰਗ ਜੋ ਪਿਆਰੇ ਅਸੀਂ ਨੈਣੀਂ ਸਾਂਭ ਰੱਖੇ
ਬੜੇ ਯਾਂਦਾ ਦੇ ਸੁਨਹਿਰੀ ਪਲ਼ ਸੀਨੇ ਵਿਚ ਡੱਕੇ
ਹੁਣ ਫਰਕ ਨਈਂ ਪੈਂਦਾ ਉਹੋ ਤੱਕੇ ਯਾਂ ਨਾ ਤੱਕੇ
ਜਿਹੜਾ ਹੋਵਣਾ ਸੀ, ਮੱਥਿਆਂ 'ਚ ਨੂਰ ਹੋ ਗਿਆ
ਤੇ ਉਹਨੂੰ ਵਹਿਮ ਹੈ ਉਹ ਸਾਡੇ ਕੋਲੋਂ ਦੂਰ ਹੋ ਗਿਆ
ਭਾਵੇਂ ਪੁੱਛਦਾ ਨਈਂ ਹਾਲ, ਹਰ ਹਾਲ ਵਿਚ ਰਵੇ
ਉਹ ਤਾਂ ਸਾਹਾਂ ਤੋਂ ਵੀ ਨੇੜੇ, ਸਾਡੇ ਨਾਲ ਨਾਲ ਰਵੇ
ਉਹਨੇਂ ਦਿੱਤੀ ਜਿਹੜੀ ਲੋਰ ਸਾਡੀ ਚਾਲ ਵਿਚ ਰਵੇ
ਸਾਨੂੰ ਐਵੇਂ ਤਾਂ ਨਈਂ ਖ਼ੁਦ 'ਤੇ ਗਰੂਰ ਹੋ ਗਿਆ
ਤੇ ਉਹਨੂੰ ਵਹਿਮ ਹੈ ਉਹ ਸਾਡੇ ਕੋਲੋਂ ਦੂਰ ਹੋ ਗਿਆ
