ਬੁਝਾਰਤ

ਸਾਨੂੰ ਕੀ ਪਤਾ ਸੀ ਤੇਰੇ ਝੁਮਕੇ ਵੀ ਬੋਲਦੇ

ਸਾਨੂੰ ਕੀ ਪਤਾ ਸੀ ਗੀਤ ਝਾਂਜਰਾਂ ਦੇ ਬੋਰ ਨੇ

ਸਾਨੂੰ ਕੀ ਪਤਾ ਸੀ ਬਿੰਦੀ ਧਰਤੀ ਦਾ ਨਾਪ ਐ

ਸਾਨੂੰ ਕੀ ਪਤਾ ਸੀ ਤੇਰਾ ਨਾਮ ਹੀ ਕੋਈ ਜਾਪ ਐ

 

ਸਾਨੂੰ ਕੀ ਪਤਾ ਸੀ ਤੇਰੀ ਮੌਜ ਦੀ ਬਹਾਰ ਨੀਂ

ਸਾਨੂੰ ਕੀ ਪਤਾ ਸੀ ਇਨ੍ਹਾਂ ਪੱਤਣਾਂ ਦੀ ਸਾਰ ਨੀਂ

ਸਾਨੂੰ ਕੀ ਪਤਾ ਸੀ ਜਾਦੂ ਛਣਕਦੀ ਵੰਗ ਦਾ

ਸਾਨੂੰ ਕੀ ਪਤਾ ਸੀ ਨਸ਼ਾ ਮਿੱਠੇ ਮਿੱਠੇ ਡੰਗ ਦਾ

 

ਸਾਨੂੰ ਕੀ ਪਤਾ ਸੀ ਕੁੰਜ ਇਸ਼ਕੇ ਉਤਾਰਨੀ

ਸਾਨੂੰ ਕੀ ਪਤਾ ਸੀ ਤੇਰੇ ਨੈਣਾਂ ਦੀ ਮੁਹਾਰਨੀ

ਸਾਨੂੰ ਕੀ ਪਤਾ ਸੀ ਰਾਤ ਰਾਣੀਆਂ ਦਾ ਭਾਅ ਨੀਂ

ਸਾਨੂੰ ਕੀ ਪਤਾ ਸੀ ਸਾਡਾ ਇਕੋ ਹੋਣੈ ਰਾਹ ਨੀਂ

 

ਸਾਨੂੰ ਕੀ ਪਤਾ ਸੀ ਚੁੰਨੀ ਬੱਦਲਾਂ ਦੀ ਭੈਣ ਐਂ

ਸਾਨੂੰ ਕੀ ਪਤਾ ਸੀ ਤੇਰੀ ਮਹਿਕ ਹੀ ਤਾਂ ਚੈਨ ਐਂ

ਸਾਨੂੰ ਕੀ ਪਤਾ ਸੀ ਨੀਂਦ ਖ਼ਾਬਾਂ ਨੇ ਆ ਟੁੱਕਣੀ

ਸਾਨੂੰ ਕੀ ਪਤਾ ਸੀ ਗੱਲ ਪਿਆਰਾਂ ਉੱਤੇ ਮੁੱਕਣੀ