ਸ਼ਾਮ ਦਾ ਰੰਗ
ਸ਼ਾਮ ਦਾ ਇਹ ਰੰਗ
ਮੈਨੂੰ ਰੰਗਣੇ ਨੂੰ ਫਿਰਦਾ ਏ
ਡੰਗਣੇ ਨੂੰ ਫਿਰੇ ਤੇਰੀ ਯਾਦ ਵੇ
ਖ਼ਿਆਲ ਦਿਆਂ ਧਾਗਿਆਂ 'ਚ
ਹੋਰ ਗੂੜ੍ਹੀ ਹੋ ਗਈ
ਤੇਰੇ ਹਾਸਿਆਂ ਲਈ ਕੀਤੀ ਫਰਿਆਦ ਵੇ
ਮੱਥੇ 'ਚੋਂ ਤਿਊੜੀਆਂ
ਗਟਾਰ ਬਣ ਉੱਡ ਗਈਆਂ
ਗੱਲਾਂ ਵਿਚ ਘੁਲ਼ਿਆ ਸਰੂਰ ਵੇ
ਐਵੇਂ ਤਾਂ ਨਹੀਂ ਲੋਰ ਵਿਚ
ਚੰਨ ਤਾਰੇ ਚੜ੍ਹੇ ਅੱਜ
ਤੂੰ ਵੀ ਯਾਦ ਕੀਤਾ ਹੋਊ ਜਰੂਰ ਵੇ
ਉਂਝ ਕਿਥੇ ਮੇਚ ਤੇਰੇ
ਆਉਣੇ ਸਾਡੇ ਲਾਡ ਚੰਨਾਂ
ਲਾਡਲਾ ਤੂੰ ਧਰਤੀ ਦੀ ਤੋਰ ਦਾ
ਬੜਾ ਹੀ ਅਜੀਬ
ਸਾਨੂੰ ਜਾਪਦੈ ਜਹਾਨ
ਜਦੋਂ ਜ਼ਿਕਰ ਕਰੇਂ ਤੂੰ ਕਿਸੇ ਹੋਰ ਦਾ
