ਪਰ ਕੁਝ ਹੋਰ ਲੋਕਾਂ ਲਈ ਇਹ ਸੋਚ ਵਿਚ ਵਿਘਨ ਪਾਉਣ ਵਾਲੀਆਂ ਚੀਜ਼ਾਂ ਨੂੰ ਦੂਰ ਕਰਕੇ, ਕਿਸੇ ਖਾਸ ਗੱਲ ਬਾਰੇ ਪੂਰੀ ਡੂੰਘਾਈ ਵਿਚ ਸੋਚਣ ਦਾ ਇਕ ਢੰਗ ਹੁੰਦਾ ਹੈ। ਫਿਰ ਵੀ ਇਹ ਗੱਲ ਸੋਚਣ ਵਾਲੀ ਹੈ ਕਿ ਭਾਵੇਂ ਕਿਸੇ ਕਾਰਨ ਵੀ ਐਸਾ ਕੀਤਾ ਜਾਵੇ, ਇਸ ਨਾਲ ਸੁਣਨ ਵਾਲੇ ਨੂੰ ਖਿੱਝ ਚੜ੍ਹਦੀ ਹੈ ਅਤੇ ਉਹ ਇਸ ਦਾ ਗਲਤ ਮਤਲਬ ਕੱਢ ਸਕਦਾ ਹੈ।
ਇਕ ਵਾਰੀ ਫਿਰ ਸਾਨੂੰ ਇਸ ਨੂੰ ਸਮਝਣ ਲਈ ਬਾਕੀ ਹਰਕਤਾਂ ਦੇ ਨਾਲ ਮਿਲਾ ਕੇ ਦੇਖਣ ਦੀ ਲੋੜ ਹੁੰਦੀ ਹੈ। ਜੇ ਕੁਝ ਹੋਰ ਹਰਕਤਾਂ ਵੀ ਖਿੱਝ ਵਾਲੀਆਂ ਹੋਣ ਤਾਂ ਤੁਸੀਂ ਇਹ ਮੰਨ ਸਕਦੇ ਹੋ ਕਿ ਇਹ ਵੀ ਉਸੇ ਦਾ ਹੀ ਇਕ ਹੋਰ ਅਚੇਤ ਇਸ਼ਾਰਾ ਹੈ ਅਤੇ ਇਹ ਵਿਅਕਤੀ ਹੁਣ ਇਕ ਨਕਾਰਾਤਮਕ ਮਾਨਸਿਕ ਸਥਿਤੀ ਵਿਚ ਆ ਚੁੱਕਾ ਹੈ। ਅਤੇ ਜੇ ਹੋਰ ਕੋਈ ਐਸੀ ਗੱਲ ਨਾ ਹੋਵੇ ਤਾਂ ਫਿਰ ਇਹ ਸ਼ਾਇਦ ਸਿਰਫ ਇਕ ਆਦਤ ਹੀ ਹੈ।
