ਇਕ ਹੋਰ ਆਮ ਪ੍ਰਚਲਤ 'ਹੱਥ ਚਿਹਰੇ ਉੱਤੇ' ਵਾਲੀ ਹਰਕਤ ਇਹ ਵੀ ਹੈ ਜਿਸ ਵਿਚ ਅੰਗੂਠਾ ਠੋਡੀ ਨੂੰ ਸਹਾਰਾ ਦਿੰਦਾ ਹੈ ਅਤੇ ਪਹਿਲੀ ਉਂਗਲ ਸਿੱਧੀ ਉਪਰ ਵੱਲ ਨੂੰ ਇਸ਼ਾਰਾ ਕਰਦੀ ਹੈ ਤੇ ਗਲ੍ਹ ਦੇ ਨਾਲ ਲੱਗੀ ਹੁੰਦੀ ਹੈ। ਇਹ ਮੁਦਰਾ ਸਕਾਰਾਤਮਕ ਸੋਚ ਦਾ ਚਿੰਨ੍ਹ ਨਹੀਂ, ਸਗੋਂ ਇਹ ਕਿਸੇ ਕਿਸਮ ਦੀ ਅਸਹਿਮਤੀ ਹੋਣਾ ਪਰਗਟ ਕਰਦੀ ਹੈ। ਇਸ ਮੁਦਰਾ ਬਾਰੇ ਥੋੜ੍ਹੀ ਉਲਝਣ ਰਹਿੰਦੀ ਹੈ ਕਿਉਂਕਿ ਇਹ ਕਿਸੇ ਚੀਜ਼ ਬਾਰੇ ਮੁਲਾਂਕਣ ਕਰਨ ਦੀ ਮੁਦਰਾ ਨਾਲ ਬਹੁਤ ਮਿਲਦੀ ਜੁਲਦੀ ਹੈ। ਪਰ ਅੰਗੂਠਾ ਰੱਖਣ ਦੀ ਥਾਂ ਸਾਨੂੰ ਇਹ ਦੱਸ ਦਿੰਦੀ ਹੈ ਕਿ ਇਹ ਨਾਂਹਪੱਖੀ ਜਾਂ ਅਸਹਿਮਤੀ ਦੀ ਮੁਦਰਾ ਹੈ। ਤੁਸੀਂ ਅਕਸਰ ਦੇਖੋਗੇ ਕਿ ਇਹ ਮੁਦਰਾ ਬਣਾਉਣ ਵਾਲਾ ਵਿਅਕਤੀ ਆਪਣੀ ਵੱਡੀ ਉਂਗਲ ਥੋੜ੍ਹੀ ਹੋਰ ਅੱਗੇ ਕਰ ਕੇ ਅੱਖ ਨਾਲ ਲਗਾ ਦੇਂਦਾ ਹੈ, ਜਾਂ ਅੱਖ ਮਲਣ ਲਗ ਪੈਂਦਾ ਹੈ ਜਿਵੇਂ ਉਹ ਤੁਹਾਨੂੰ ਨਜ਼ਰੋਂ ਉਹਲੇ ਕਰਨਾ ਚਾਹੁੰਦਾ ਹੋਵੇ।

ਅੱਖ ਮਲਣ ਦੀ ਕਿਰਿਆ ਅਸੀਂ ਵੱਖਰੇ ਤੌਰ ਤੇ ਵੀ ਦੇਖ ਸਕਦੇ ਹਾਂ। ਕਈ ਵਾਰੀ ਇਹ ਸਿਰਫ ਅੱਖ ਨੂੰ ਜ਼ੋਰ ਨਾਲ ਬੰਦ ਕਰਨ ਦੀ ਕਿਰਿਆ ਵੀ ਬਣ ਜਾਂਦੀ ਹੈ।

ਕੁਝ ਆਮ ਹਰਕਤਾਂ

ਇਕ ਸਰਵੇਖਣ ਵਿਚ ਦਬਾਅ ਅਧੀਨ ਲੋਕਾਂ ਦੀਆਂ 'ਹੱਥ-ਮੂੰਹ ਤੇ' ਵਾਲੀਆਂ ਹਰਕਤਾਂ ਨੋਟ ਕੀਤੀਆਂ ਗਈਆਂ, ਸਭ ਤੋਂ ਆਮ ਹਰਕਤਾਂ ਇਹ ਸਨ (ਸਿਲਸਲੇਵਾਰ)

1. ਜਬਾੜੇ ਨੂੰ ਸਹਾਰਾ ਦੇਣਾ

2. ਠੋਡੀ ਨੂੰ ਸਹਾਰਾ ਦੇਣਾ

3. ਵਾਲਾਂ ਨੂੰ ਹੱਥ ਲਾਉਣਾ

4. ਗਲ੍ਹਾਂ ਨੂੰ ਸਹਾਰਾ ਦੇਣਾ

5. ਚਿਹਰੇ ਨੂੰ ਹੱਥ ਲਾਉਣਾ

6. ਪੁੜਪੁੜੀ ਉੱਤੇ ਸਹਾਰਾ ਦੇਣਾ

ਇਹ ਵੀ ਦੇਖਿਆ ਗਿਆ ਹੈ ਕਿ ਇਹ ਹਰਕਤਾਂ ਮਰਦਾਂ ਔਰਤਾਂ, ਦੋਹਾਂ ਵਿਚ ਪ੍ਰਚਲਤ ਹਨ। ਪੁੜਪੁੜੀ ਉੱਤੇ ਸਹਾਰਾ ਦੇਣ ਵਾਲੀ ਹਰਕਤ ਮਰਦਾਂ ਵਿਚ ਔਰਤਾਂ ਨਾਲੋਂ ਦੋ ਗੁਣਾਂ ਜ਼ਿਆਦਾ ਪ੍ਰਚਲਤ ਹੈ ਅਤੇ ਵਾਲਾਂ ਨੂੰ ਹੱਥ ਲਾਉਣ ਵਾਲੀ ਹਰਕਤ ਔਰਤਾਂ ਵਿਚ ਮਰਦਾਂ ਨਾਲੋਂ ਤਿੰਨ ਗੁਣਾ ਜ਼ਿਆਦਾ ਪ੍ਰਚੱਲਤ ਹੈ।