ਕੁੱਝ ਐਸੀਆਂ ਵੀ ਬਾਹਵਾਂ ਫਸਾਉਣ ਵਾਲੀਆਂ ਮੁਦਰਾਵਾਂ ਹਨ ਜਿਹੜੀਆਂ ਅਸੀਂ ਰੋਜ਼ਾਨਾ ਆਮ ਜੀਵਨ ਅਤੇ ਕੰਮ ਕਾਰ ਵਿਚ ਦੇਖਦੇ ਰਹਿੰਦੇ ਹਾਂ। ਇਨ੍ਹਾਂ ਵਿਚੋਂ ਸਭ ਤੋਂ ਜ਼ਿਆਦਾ ਪ੍ਰਚੱਲਤ ਉਹ ਹੈ ਜਿਸ ਬਾਰੇ ਤੁਸੀਂ ਆਪ ਆਸਾਨੀ ਨਾਲ ਕਹਿ ਸਕਦੇ ਹੋ ਕਿ ਤੁਸੀਂ ਵੀ ਐਸਾ ਹੀ ਕਰਦੇ ਹੋ। ਅਤੇ ਤੁਸੀਂ ਇਹ ਹਰਕਤ ਉਦੋਂ ਹੀ ਕਰਨੀ ਸ਼ੁਰੂ ਕਰ ਦਿੱਤੀ ਸੀ, ਜਦੋਂ ਤੋਂ ਤੁਸੀਂ ਆਪਣੇ ਅੰਦਰ ਮੌਜੂਦ 'ਜੈਨੇਟਿਕ ਕੋਡ' ਤੇ ਚਲਣਾ ਸ਼ੁਰੂ ਕੀਤਾ ਸੀ। ਇਸ ਨੂੰ ਸਾਧਾਰਨ ਬਾਹਵਾਂ ਮੋੜਨਾ (ਜਾਂ ਫਸਾਣਾ) ਕਿਹਾ ਜਾ ਸਕਦਾ ਹੈ। ਜਦੋਂ ਤੁਸੀਂ ਬਾਹਵਾਂ ਨੂੰ ਛਾਤੀ ਅੱਗੇ ਮੋੜਦੇ ਹੋ ਤਾਂ ਤੁਹਾਡੇ ਹੱਥ ਤੁਹਾਡੀਆਂ ਬਾਹਵਾਂ ਤੇ ਛਾਤੀ ਵਿਚਕਾਰ ਫਸਾਏ ਹੋ ਸਕਦੇ ਹਨ। ਇਹ ਸਭ ਤੋਂ ਵੱਧ ਪ੍ਰਚੱਲਿਤ ਬਾਹਵਾਂ ਮੋੜਨ ਦਾ ਤਰੀਕਾ ਹੈ। ਇਹ ਪੂਰੇ ਸੰਸਾਰ ਵਿਚ ਹਰ ਜਗ੍ਹਾ ਪ੍ਰਚਲਤ ਹੈ ਅਤੇ ਇਹ ਸਮਝੋ ਕਿ ਉਹ ਵਿਅਕਤੀ ਬਿਨਾਂ ਬੋਲੇ ਇਹ ਗੱਲ ਕਹਿ ਰਿਹਾ ਹੁੰਦਾ ਹੈ "ਮੈਂ ਕਿਸੇ ਨਾ ਕਿਸੇ ਗੱਲ ਜਾਂ ਵਿਅਕਤੀ ਤੋਂ ਘਬਰਾਇਆ ਅਤੇ ਪ੍ਰੇਸ਼ਾਨ ਹਾਂ ਅਤੇ ਮੈਂ ਉਸ ਗੱਲ ਪ੍ਰਤੀ ਨਕਾਰਾਤਮਕ ਹਾਂ ਅਤੇ ਆਪਣਾ ਬਚਾਅ ਕਰ ਰਿਹਾ ਹਾਂ" ਤੁਸੀਂ ਇਹ ਮੁਦਰਾ ਹਰ ਰੋਜ਼ ਦੇਖ ਸਕਦੇ ਹੋ-ਲੋਕਲ ਬੱਸ ਵਿਚ, ਲਿਫਟ ਵਿਚ, ਸਰਕਾਰੀ ਦਫਤਰ ਵਿਚ ਲੱਗੀ ਕਤਾਰ ਵਿਚ, ਸਮਾਜਕ ਪ੍ਰੋਗਰਾਮਾਂ ਵਿਚ, ਇੰਤਜ਼ਾਰ ਕਰਨ ਵਾਲੇ ਕਮਰਿਆਂ ਵਿਚ। ਜਿੱਥੇ ਵੀ ਲੋਕ ਬੇਆਰਾਮੀ ਤੇ ਪ੍ਰੇਸ਼ਾਨੀ ਮਹਿਸੂਸ ਕਰ ਰਹੇ ਹੁੰਦੇ ਹਨ, ਉੱਥੇ ਹੀ ਇਹ ਦੇਖੀ ਜਾ ਸਕਦੀ ਹੈ।

ਕੰਮ ਵਿਚ, ਕਿਸੇ ਮੀਟਿੰਗ ਵਿਚ ਜਾ ਪ੍ਰੀਜ਼ੈਂਟੇਸ਼ਨ ਵਿਚ ਜਦੋਂ ਤੁਸੀਂ ਕਿਸੇ ਸਾਥੀ, ਗਾਹਕ ਜਾਂ ਬੌਸ ਨਾਲ ਗੱਲ ਕਰਦੇ ਹੋਵੋ ਅਤੇ ਉਹ ਇਸ ਮੁਦਰਾ ਵਿਚ ਆ ਜਾਵੇ ਤਾਂ ਇਸ ਦਾ ਭਾਵ ਇਹੀ ਹੈ ਕਿ ਕੋਈ ਐਸੀ ਗੱਲ ਹੋ ਗਈ ਹੈ ਜਿਸ ਨਾਲ ਉਹ ਸਹਿਮਤ ਨਹੀਂ। ਉਹ ਭਾਵੇਂ ਜ਼ਬਾਨ ਤੋਂ ਇਹੀ ਕਹਿ ਰਹੇ ਹੋਣ ਕਿ ਸਭ ਠੀਕ ਹੈ (ਅਤੇ ਉਹ) ਇਹ ਗੱਲ ਕੁੱਝ ਹੌਲੀ ਜਾਂ ਦੱਬੀ ਜ਼ਬਾਨ ਵਿਚ ਕਹਿਣਗੇ), ਪਰ ਇਹ ਮੁਦਰਾ, ਅਤੇ ਇਸ ਦੇ ਨਾਲ ਹੀ ਕੁਝ ਘੱਟ 'ਖੁਲ੍ਹੇ' ਚਿਹਰੇ ਦੇ ਹਾਵ ਭਾਵ ਇਹ ਸਾਫ ਦਸ ਦੇਣਗੇ ਕਿ ਕੁਝ ਕਰਨ ਦੀ ਲੋੜ ਹੈ, ਸਭ ਅੱਛਾ ਨਹੀਂ ਹੈ।

"ਇਹ ਮੁਦਰਾ ਦੱਸ ਦਿੰਦੀ ਹੈ ਕਿ ਸਭ ਅੱਛਾ ਨਹੀਂ ਹੈ।”