ਜ਼ਰਾ ਹੇਠ ਲਿਖੀ ਗਲਬਾਤ ਨੂੰ ਪੜ੍ਹੋ:

ਮਾਈਕਲ: (ਵਿਭਾਗ ਦੀ ਇਕ ਮੀਟਿੰਗ ਵਿਚ ਆਪਣੀ ਪੀ. ਏ. ਨੂੰ) ‘ਤਾਂ ਫਿਰ ਆਪਾਂ ਉਸ ਮੀਟਿੰਗ ਬਾਰੇ ਫੈਸਲਾ ਕਰ ਲਈਏ—ਮੈਂ ਉਹ ਵਾਲਾ ਪੰਜ-ਤਾਰਾ ਹੋਟਲ ਬੁਕ ਕਰ ਦਿੰਦਾ ਹਾਂ ਜਿਹੜਾ ਬਿਲਕੁਲ ਸ਼ਹਿਰ ਦੇ ਵਿਚਕਾਰ ਹੈ। ਤੂੰ ਉਸ ਦੀ ਪੁਰਾਣੇ ਢੰਗ ਦੀ ਇਮਾਰਤ ਦੇਖੀ ਹੋਵੇਗੀ ਜਿਹੜੀ ਬੜੀ ਵਧੀਆ ਬਣੀ ਹੋਈ ਹੈ ਅਤੇ ਜਿਸਦੇ ਤਹਿਖਾਨੇ ਵਿਚ 'ਸਪਾ' (Spa) ਬਣਿਆ ਹੋਇਆ ਹੈ। ਤੂੰ ਆਪਣੇ ਦੋਸਤ ਨੂੰ ਵੀ ਲੈ ਆਵੀਂ, ਮੈਂ ਤੇ ਮੇਰੀ ਪਤਨੀ ਦੋਵੇਂ ਆ ਰਹੇ ਹਾਂ। (ਕੈਰਨ ਮੂੰਹ ਹੱਥ ਨਾਲ ਢੱਕ ਲੈਂਦੀ ਹੈ) ਕੀ ਨਾਮ ਹੈ ਉਸ ਹੋਟਲ ਦਾ?"

ਕੈਰਨ- ‘ਹਾਂ, ਉਸਦਾ ਨਾਮ ਰੈਂਡੋਲਫ ਹੈ—ਬੜਾ ਚੰਗਾ ਹੋਟਲ ਹੈ, ਉਸ ਦਾ ਮਾਹੌਲ ਬੜਾ ਚੰਗਾ ਹੈ। (ਉਸ ਦੀ ਆਵਾਜ਼ ਦਾ ਸੁਰ ਤੇ ਰਫਤਾਰ ਬਦਲ ਗਈ ਹੈ, ਉਸ ਦੇ ਲਫਜ਼ ਹੌਲੀ ਆਵਾਜ਼ ਵਿਚ ਨਿਕਲ ਰਹੇ ਹਨ ਅਤੇ ਹੱਥ ਮੂੰਹ ਤੋਂ ਗਰਦਨ ਤਕ ਆ ਗਿਆ ਹੈ)

ਮਾਈਕਲ-‘ਹਾਂ, ਇਹੀ ਨਾਮ ਹੈ। ਟੈਲੀਵੀਜ਼ਨ ਦੇ ਇੰਸਪੈਕਟਰ ਮੋਰਸ ਵਾਲੇ ਪ੍ਰੋਗਰਾਮ ਦੇ ਲੋਕ ਉੱਥੇ ਹੀ ਰਹਿੰਦੇ ਸਨ ਅਤੇ ਮੈਂ ਵੀ ਉਸ ਨੂੰ ਉੱਥੇ ਹੀ ਬਾਰ ਵਿਚ ਮਿਲਿਆ ਸੀ। ਆਪਾਂ ਮੀਟਿੰਗ ਵੀ ਮੋਰਸ ਬਾਰ ਵਿਚ ਹੀ ਕਰਾਂਗੇ।'

(ਹੁਣ ਕੈਰਨ ਫਰਸ਼ ਵਲ ਦੇਖ ਰਹੀ ਹੈ ਅਤੇ ਉਸਨੇ ਬਾਹਵਾਂ ਵੀ ਮੋੜ ਲਈਆਂ ਹਨ।)

ਇਕ ਗੱਲ ਸਾਫ ਹੈ ਕਿ ਮਾਈਕਲ ਨੇ ਇੰਸਪੈਕਟਰ ਮੋਰਸ ਤੋਂ ਕੁਝ ਨਹੀਂ ਸੀ ਸਿਖਿਆ। ਇਸ ਗੱਲ ਦੇ ਸਾਰੇ ਇਸ਼ਾਰੇ ਮੌਜੂਦ ਸਨ ਕਿ ਕੁਝ ਗੜਬੜ ਹੈ। ਉਸ ਨੂੰ ਪਤਾ ਹੋਣਾ ਚਾਹੀਦਾ ਸੀ ਕਿ ਕੈਰਨ ਦਾ ਆਮ ਵਰਤਾਉ, ਨਜ਼ਰਾਂ ਮਿਲਾਕੇ ਗੱਲ ਕਰਨ ਵਾਲਾ ਹੈ। ਇਸੇ ਤੋਂ ਪਤਾ ਲਗ ਜਾਣਾ ਚਾਹੀਦਾ ਹੈ ਕਿ ਕੁਝ ਗੜਬੜ ਹੈ। ਫਿਰ ਉਸ ਦੇ ਬੋਲਣ ਦੇ ਢੰਗ ਤੋਂ ਵੀ ਪਤਾ ਲਗ ਰਿਹਾ ਸੀ—ਉਹ ਅੜ ਅੜ ਕੇ ਬੋਲ ਰਹੀ ਸੀ, ਉਸ ਨੇ ਮੂੰਹ ਢੱਕਿਆ ਹੋਇਆ ਸੀ, ਗਰਦਨ ਨੂੰ ਪਕੜਿਆ ਸੀ ਅਤੇ ਬਾਹਵਾਂ ਮੋੜ ਲਈਆਂ ਸਨ। ਇਹ ਸਾਰੀਆਂ ਹਰਕਤਾਂ ਇਕ 'ਸਮੂਹ' ਬਣਾ ਰਹੀਆਂ ਸਨ ਤੇ ਪੁਕਾਰ ਪੁਕਾਰ ਕੇ ਕਹਿ ਰਹੀਆਂ ਸਨ ਕਿ ਕੈਰਨ ਕਿਸੇ ਪ੍ਰੇਸ਼ਾਨੀ ਵਿਚ ਹੈ (ਜਿਵੇਂ ਬਾਦ ਵਿਚ ਪਤਾ ਲੱਗਾ ਕਿ ਉਸ ਦੀ ਪਿਛਲੇ ਹਫਤੇ ਹੀ ਆਪਣੇ ਬੁਆਇਫਰੈਂਡ ਨਾਲ ਲੜਾਈ ਹੋਈ ਸੀ)

ਸੋ ਇਹ ਇਸ਼ਾਰਿਆਂ ਦਾ ‘ਸਮੂਹ' ਸਾਨੂੰ ਕੁਝ ਦੱਸ ਰਿਹਾ ਸੀ ਅਤੇ ਅਸਲ ਗੱਲ ਉਸਦੀਆਂ ਹਰਕਤਾਂ ਤੋਂ ‘ਲੀਕ’ ਹੋ ਰਹੀ ਸੀ। ਸਾਨੂੰ ਪਤਾ ਹੈ ਕਿ ਕਿਸੇ ਵੀ ਗੱਲ ਦਾ ਅਸਲੀ ਮਤਲਬ ਸਰੀਰਕ ਹਰਕਤਾਂ ਤੋਂ ਹੀ ਪਤਾ ਲਗਦਾ ਹੈ (ਅਤੇ ਇਸ ਨੂੰ ਲੁਕਾਇਆ ਨਹੀਂ ਜਾ ਸਕਦਾ) ਸਰੀਰਕ ਅਤੇ ਜ਼ੁਬਾਨ ਤੋਂ (ਲਫਜ਼ਾਂ ਤੋਂ ਇਲਾਵਾ) ਮਿਲਣ ਵਾਲੇ ਇਸ਼ਾਰੇ (55 ਪ੍ਰਤੀਸ਼ਤ ਤੇ 38 ਪ੍ਰਤੀਸ਼ਤ) ਇਹ ਗੱਲ ਸਾਫ ਦਸ ਰਹੇ ਸਨ ਕਿ ਗਲ ਕਰਨ ਦਾ ਉਦੋਂ ਤੱਕ ਕੋਈ ਫਾਇਦਾ ਨਹੀਂ ਜਦੋਂ ਤੱਕ ਅਸੀਂ ਉਸ ਦੀ ਪਰੇਸ਼ਾਨੀ ਨਾ ਸਮਝ ਲਈਏ।

ਇਹ ਸੱਚ ਹੈ ਕਿ ਜਦੋਂ ਤੱਕ ਉਹ ਵਿਅਕਤੀ ਇਸ ਬਚਾਅ ਵਾਲੀ ਮੁਦਰਾ ਵਿਚ ਹੈ, ਜਿਸ ਵਿਚ ਉਸਨੇ ਆਪਣੇ ਰਵੱਈਏ ਵਿਚ ਇਕ ਰੁਕਾਵਟ ਖੜ੍ਹੀ ਕਰ ਲਈ ਹੈ, ਅਸੀਂ ਅੱਗੇ ਨਹੀਂ ਵਧ ਸਕਦੇ। ਕਹਿੰਦੇ ਹਨ ਹੁਣ ‘ਕੁਝ ਕਰਨਾ ਹੀ ਪਵੇਗਾ’।