ਚਿਤ੍ਰਲੇਖਾ : ਧਰਮ ਗੁਰੂ ਨੂੰ ਕਹਿ ਦਿਉ ... ਕੁਮਾਰ ਨਹੀਂ ਆਉਣਗੇ! ਬਹੁਤ ਹੋ ਗਈਆਂ ਨੇ ਇਹ ਧਰਮ-ਸਭਾਵਾਂ ! ਨਾਲੇ ਅਸੀਂ ਨਗਰ ਤੋਂ ਬਾਹਰ ਰਹਿੰਦੇ ਹਾਂ ਤੇ ਨਗਰ ਤੋਂ ਬਾਹਰ ਧਰਮ ਗੁਰੂ ਦੇ ਨੋਮ-ਕਾਨੂੰਨ ਨਹੀਂ ਚੱਲਦੇ।
ਮੁੱਖ ਚੇਲਾ : (ਸਖ਼ਤੀ ਨਾਲ) ਤੁਸੀਂ ਭੁੱਲਦੇ ਓ ਦੇਵੀ! ਜਦੋਂ ਦੇ ਮਹਾਰਾਜ ਤ੍ਰਿਆਅਰੁਣ ਜੰਗਲਾਂ ਨੂੰ ਗਏ ਨੇ ਰਾਜ ਦਾ ਸਾਰਾ ਕੰਮ ਧਰਮ ਗੁਰੂ ਹੀ ਵੇਖਦੇ ਨੇ। ਉਨ੍ਹਾਂ ਕੋਲ ਧਾਰਮਿਕ ਹੀ ਨਹੀਂ, ਪੂਰੇ ਰਾਜਕੀ ਅਧਿਕਾਰ ਵੀ ਹਨ। ਇਹ ਵਣ ਅਯੋਧਿਆ ਰਾਜ ਦੀ ਸੰਪਤੀ ਹੈ। ਕੁਮਾਰ ਨੂੰ ਪੇਸ਼ ਹੋਣਾ ਹੀ ਪਵੇਗਾ।
ਚਿਤ੍ਰਲੇਖਾ : ਤੁਸੀਂ ਜੇ ਚਾਹੋ ਕਰ ਲਓ ਕੁਮਾਰ ਨਹੀਂ ਜਾਣਗੇ !
ਮੁੱਖ ਚੇਲਾ : (ਸੈਨਿਕ ਅਧਿਕਾਰੀ ਨੂੰ) ਸੈਨਿਕ ਅਧਿਕਾਰੀ, ਧਰਮ ਗੁਰੂ ਦੇ ਆਦੇਸ਼ ਦੀ ਪਾਲਣਾ ਹੋਵੇ !
ਚਿਤ੍ਰਲੇਖਾ : (ਇਕਦਮ ਸਤਿਆਵਤ ਦੇ ਸਾਮ੍ਹਣੇ ਆ ਕੇ, ਲਲਕਾਰਦੀ ਹੋਈ) ਹੱਛਾ! ਮੈਂ ਵੇਖਦੀ ਆਂ, ਕੌਣ ਕੁਮਾਰ ਨੂੰ ਹੱਥ ਲਾਉਂਦੈ ?
ਮੁੱਖ ਚੇਲਾ : ਸੈਨਿਕ ਅਧਿਕਾਰੀ, ਯੋਗ ਕਾਰਵਾਈ ਕਰੋ। ਧਰਮ ਗੁਰੂ ਦੇ ਆਦੇਸ਼ਾਂ ਦੀ ਪਾਲਣਾ ਹੋਵੇ!
(ਸੈਨਿਕ-ਅਧਿਕਾਰੀ ਅਤੇ ਸੈਨਿਕ ਚੁੱਪ ਖੜ੍ਹੇ ਹਨ। ਉਹ ਦੁਬਿਧਾ ਵਿਚ ਹਨ।)
ਸਤਿਆਵਤ : (ਉਹਦੇ ਚਿਹਰੇ ਉੱਤੇ ਆਤਮ-ਸੰਜਮ ਨੂੰ ਪ੍ਰਗਟਾਉਂਦੀ ਸ਼ਾਂਤੀ ਅਤੇ ਸ਼ਕਤੀ ਹੈ) ਇਸ ਦੀ ਲੋੜ ਨਹੀਂ, ਸੈਨਿਕ! (ਚਿਤ੍ਰਲੇਖਾ ਨੂੰ ਆਪਣੇ ਸਾਹਮਣਿਉਂ ਹਟਾਉਂਦਾ ਹੋਇਆ) ਤੂੰ ਚਿੰਤਾ ਨਾ ਕਰ ਚਿਤ੍ਰਲੇਖਾ! ਮੈਨੂੰ ਇਨ੍ਹਾਂ ਦੇ ਨਾਲ ਜਾਣ ਦੇ ! ਮੈਂ ਵੇਖਦਾ ਹਾਂ ਧਰਮ ਗੁਰੂ ਕੀ ਕਹਿੰਦੇ ਨੇ!
ਚਿਤ੍ਰਲੇਖਾ ਠੀਕ ਹੈ। ਮੈਂ ਵੀ ਤੁਹਾਡੇ ਨਾਲ ਈ ਜਾਵਾਂਗੀ।
(ਸੈਨਿਕਾਂ 'ਚ ਘਿਰਿਆ ਸਤਿਆਵਤ, ਸੈਨਿਕ ਅਧਿਕਾਰੀ, ਮੁੱਖ ਚੇਲਾ ਅਤੇ ਚਿਤ੍ਰਲੇਖਾ ਜਾਂਦੇ ਹਨ। ਪਿਛਵਾੜੇ ਚੋਂ ਗੀਤ ਦੇ ਬੋਲ ਉੱਭਰਦੇ ਹਨ।)
ਗੀਤ: ਧਰਮ ਗੁਰੂ ਨੇ ਰਾਜਾ ਹੋਏ ਤੇ ਰਾਜੇ ਸੰਨਿਆਸੀ! ਗੂੰਜ ਧਰਮ ਦੀ ਚਾਰ ਚੁਫੇਰੇ ਫਿਰ ਵੀ ਧਰਤ ਪਿਆਸੀ!
