ਦਰਸ਼ਨ ਦਾਤਾ ਮਿਲੇ

ਤੇਰੇ ਦੁਆਰੇ ਖਲੇ, ਦੁਆਰੇ ਤੇਰੇ ਖਲੇ

ਦਾਤਾ! ਦਰਸ਼ਨ ਮਿਲੇ, ਦਰਸ਼ਨ ਦਾਤਾ ਮਿਲੇ।

 

ਦੁਆਰ ਖਲਿਆਂ ਬਿਤੇ ਦਾਤਾ ਦਾਤ ਦਰਸ਼ਨ ਮੰਗਦਿਆਂ

ਹਥ ਬੰਨ੍ਹ ਮਿਨਤਾਂ ਕਰਦਿਆਂ ਤੇ ਨੈਣ ਅੰਝੂ ਭਰਦਿਆਂ।

ਹੁਣ ਘਟਾ ਤੇ ਹੈ ਘਟਾ ਉਮਗੇ ਪਉਣ ਸੀਤਲ ਹੈ ਚਲੇ,

ਆ ਚਮਕ ਬਿਜਲੀ ਵਾਂਗਰੇ ਇਕ ਝਾਤ ਪਾ ਦੇ ਇਕ ਪਲੇ।

 

ਤੇਰੇ ਦੁਆਰੇ ਖਲੇ, ਦੁਆਰੇ ਤੇਰੇ ਖਲੇ

ਦਾਤਾ! ਦਰਸ਼ਨ ਮਿਲੇ, ਦਰਸ਼ਨ ਦਾਤਾਮਿਲੇ।

ਹਾਂ ਦਿਓ ਦਰਸ਼ਨ, ਦਿਓ ਦਰਸ਼ਨ ਖੈਰ ਦਰਸ਼ਨ ਪਾ ਦਿਓ

ਉਹ ਰੂਪ ਸੁਹਣੇ ਆਪਣੇ ਦੀ ਝਲਕ ਇਕ ਦਿਖਲਾ ਦਿਓ।

ਏ ਨੈਣ ਮਿਟਣੇ ਅਗਦਿਓਂ ਓ ‘ਰੂਪ-ਦਰਸ਼ਨ` ਮੈਂ ਮਿਲੋ,

ਹਾਂ 'ਨੈਣ' 'ਦਰਸ਼ਨ' ਰਲ ਮਿਲਣ ਤੇ 'ਦਰਸ' ਨੈਣੀ ਮਿਲ ਰਲੇ।

 

ਤੇਰੇ ਦੁਆਰੇ ਖਲੇ, ਦੁਆਰੇ ਤੇਰੇ ਖਲੇ

ਦਾਤਾ ! ਦਰਸ਼ਨ ਮਿਲੇ, ਦਰਸ਼ਨ ਦਾਤਾ ਮਿਲੇ।

(ਕਸੌਲੀ 5-10-49)