ਪ੍ਰੇਮ ਪਿਆਲੀ
ਗਿਆਨੀ ਗਿਆਨ ਲੇਖੇ ਸਾਨੂੰ ਨ ਤੂੰ ਸੁਣਾ,
ਕਰਮੀ! ਹਿਸਾਬ ਅਪਣੇ ਸਾਡੇ ਨ ਕੰਨ ਪਾ।
ਜੋਗੀ! ਜਮਾ ਕੇ ਆਸਨ ਕਾਹਨੂੰ ਪਿਆ ਲੁਭਾਵੇਂ,
ਤਪੀਏ! ਤਪਾਂ ਦੇ ਫਲਾਂ ਨੂੰ ਸਾਨੂੰ ਨ ਪਿਆ ਸੁਣਾ।
ਬ੍ਰਤ ਧਾਰ ਕੇ ਹੇ ਬਤੀਆ! ਸੁਰਗਾਂ ਦੇ ਲਾਲਚਾਂ ਵਿਚ
ਸਾਨੂੰ ਨ ਤੂੰ ਲੁਭਾ ਤੇ ਨਕਸ਼ੇ ਨ ਖਿਚ ਦਿਖਾ।
ਇਕ ਪ੍ਯਾਰ-ਰਸ ਕਟੋਰੀ ਇਕ ਪ੍ਰੇਮ ਦੀ ਪਿਆਲੀ
ਹੈ ਜੋ ਕਿਸੇ ਦੇ ਪੱਲੇ ਦੇਵੇ ਘੁਟ ਇਕ ਪਿਲਾ।
ਵਾੜੀ ਗੁਲਾਬ ਲਾਈਏ ਲਪਟਾਂ ਦੇ ਵਿਚ ਬਹਿਕੇ
ਬੁਲਬੁਲ ਦਾ ਰਾਹ ਤਕਾਈਏ ਲਿਵ ਇਕ ਰਸੀ ਲਗਾ।
ਲਪਟਾਂ ਦੀ ਭਾਲ ਕਰਦੀ ਸੁਹਣੇ ਦੇ ਰੰਗ ਖਿੱਚੀ
ਬੁਲਬੁਲ ਓ ਗੀਤ ਗਾਂਦੀ ਸ਼ਾਯਦ ਕਦੇ ਜਏ ਆ।
