ਲੱਗੀ

ਆਖਣ ਇਕ ਕੁਕਨੂਸ ਨਾਮ ਦਾ ਪੰਛੀ ਕਿਧਰੇ ਹੁੰਦਾ,

ਇਕ ਹਜ਼ਾਰ ਵਰ੍ਹੇ ਦੀ ਉਮਰਾ ਤਾਈਂ ਜੀਂਦਾ ਰਹਿੰਦਾ।

 

ਗਾਵੇ ਰਾਗ ਰਹੇ ਅਲਮਸਤਾ ਸਭ ਸੰਗੀਤ ਸੁ ਜਾਣੇ,

ਇਸ ਤੋਂ ਰਾਗ ਸਿਖਿਆ ਮਾਨੁਖ ਕਹਿੰਦੇ ਹਨ ਕਈ ਸ੍ਯਾਣੇ।

 

ਜਦੋਂ ਏਸਦਾ ਅੰਤ ਸਮਾ, ਸੁਣ, ਨੇੜੇ ਹੈ ਆ ਜਾਈ,

ਬੈਠ ਕਾਠ ਵਿਚ, ਰਾਗ ਗਾਇ ਇਕ ਲੈਂਦਾ ਚਿਣੰਗ ਮਘਾਈ।

 

ਓਸ ਲਗੀ ਵਿਚ ਬੈਠਾ ਰਹਿੰਦਾ ਖਾਕ ਬਣੇ ਜਲ ਜਾਈ,

ਐਪਰ ਖਾਕ ਬਰਕਤਾਂ ਵਾਲੀ ਜਦ ਮੀਂਹ ਨਾਲ ਭਿਜਾਈ,

ਉਸ ਖਾਕੋਂ ਕੁਕਨੂਸ ਉਠੇ ਜੀ, ਨਵੀਂ ਜਿੰਦੜੀ ਪਾਈ।

 

ਲਗੀ ਸਹੀ ਤਾਂ ਕੋਕਨੂਸ ਨੇ ਫਤੇ ਮੌਤ ਤੇ ਪਾਈ,

ਓਸ ਪੀੜ ਨੇ ਪੀੜ ਮੌਤ ਦੀ ਕਟੀ ਨਵੀਂ ਜਿੰਦ ਲਾਈ।

 

ਤਾਂ ਤੇ ਲੱਗੀ ਜਾਣ ਸੁਹਾਵੀ ਲਗੀ ਸਦਾ ਮੁਬਾਰਿਕ,

ਸ਼ਾਲਾ ਲੱਗੇ ਕਿਵੇਂ ਆਣ ਏ ਦੱਸੀਓ ਕੋਈ ਤਦਾਰਿਕ।

(ਮਸੂਰੀ 19-10-35)