ਮਨਾ ਗਾਓ!

ਗਏ ਹੋ ਰੁੱਸ ਕਿਉਂ ਮਾਹੀ! ਹੁਣ ਆ ਜਾਓ,ਹੁਣ ਆ ਜਾਓ!

ਅਨੀ ਸਖੀਓ! ਅਨੀ ਜਾਓ! ਮਨਾ ਲ੍ਯਾਓ, ਮਨਾ ਲ੍ਯਾਓ!

 

ਮਨਾ ਥੱਕੀ ਸਾਂ ਜਾਂਦਿਆਂ ਨੂੰ ਮਨਾ ਸੱਕੀ ਨ, ਸਹੀਓ ਨੀ!

ਤੁਸੀਂ ਜਾਓ! ਅਨੀ ਜਾਓ! ਮਨਾ ਗਾਓ, ਮਨਾ ਲ੍ਯਾਓ!

 

ਹੁਈ ਤਕਸੀਰ ਮੈਂਥੋਂ ਹੀ ਮੈਂ ਮੱਤੀ ਮਾਨ ਸਮਝੀ ਨਾਂ,

ਤੁਸੀਂ ਜਾਓ, ਮਨਾ ਲ੍ਯਾਓ! ਕੁਈ ਚਾ ਵਾਸਤਾ ਪਾਓ।

 

ਗਿਆ ਵਧ ਸੀ ਇ ਮਨ ਮੇਰਾ ਕਦਰ ਪਾਈ ਨ ਪ੍ਯਾਰਾਂ ਦੀ

ਗਿਆ ਜਦ ਛੱਡ ਕੇ ਮਾਹੀ ਸਿਰੋਂ ਨਿਕਲੀ ਤਦੋਂ ਵਾਓ।

 

ਮੈਂ ਹੁਣ ਮੱਛੀ ਹਾਂ ਪਾਣੀ ਬਿਨ ਮੈਂ ਕੋਇਲ ਹਾਂ ਬਿਨਾਂ ਚਾਓ

ਤੁਸੀਂ ਜਾਓ, ਹੁਣੇ ਜਾਓ, ਪੀਓ ਪਾਣੀ ਨ ਅੰਨ ਖਾਓ।

 

ਕਰੋ ਮਿਨਤਾਂ ਕਿ ਤਰਲੇ ਜਾ ਗਲੇ ਪੱਲਾ ਮੈਂ ਖ਼ਾਤਰ ਲੈ

ਕਰੋ ਹਥ ਜੋੜਕੇ ਜੁਦੜੀ ਮਨਾ ਲ੍ਯਾਓ, ਰਿਝਾ ਗਾਓ।

(ਕਸੌਲੀ 6-9-50)