ਸ਼ੁਕਰਾਨਾ

ਟੇਕ- ਕਰ ਮਨ ਸ਼ੁਕਰ ਸ਼ੁਕਰ ਸ਼ੁਕਰਾਨਾ

ਰਹਿਮਤ ਮਿਲੀ ਮਿਲੀ ਆ ਰਹਿਮਤ ਰਹਿਮਤ ਦਾ ਸ਼ੁਕਰਾਨਾ।

ਖਬਰ ਖੁਸ਼ੀ ਦੀ ਅਰਸ਼ੋਂ ਆਈ ਵਜਦਾ ਪ੍ਯਾ ਸ਼ਦਿਯਾਨਾ:-

 

"ਹੁਣ ਗ਼ਮ ਖਾ ਨਾ, ਹੁਣ ਗ਼ਮ ਖਾ ਨਾ ਹੁਣ ਗ਼ਮ ਖਾ ਨਾ, ਖਾ ਨਾ।

"ਗ਼ਮ ਦਿਲ ਤੇਰਾ ਧੋ ਦਿੱਤਾ ਹੁਣ, ਬਖਯਾ ਖੁਸ਼ੀ ਖ਼ੁਸ਼ੀ ਖ਼ਜ਼ਾਨਾ।

 

"ਸਿਫ਼ਤ ਸਲਾਹ ਦਾ ਪੀ ਇਹ ਪ੍ਯਾਲਾ ਪੀ ਤੇ ਬੁੱਲ੍ਹ ਹਿਲਾ ਨਾ।

"ਨੂਰ ਝਮੱਕਾ ਆਇਆ ਈ ਲੈ ਸਹਿ ਨਿਜ ਨੂੰ ਭੁਲ ਜਾ ਨਾ।”

 

ਤਦ ਇਕ ਨੂਰ ਝਮਾਕਾ ਵੱਜਾ, ਕੀਤਾ ਉਨ ਬੇਗਾਨਾ।

ਵਿਸਮ, ਵਿਸਮ, ਬੇ ਖ਼ੁਦ, ਬੇ ਖ਼ੁਦ ਹੈ, ਖੁਲ੍ਹਿਆ ਭੇਦ ਲੁਕਾਨਾ।

 

ਪ੍ਰੀਤਮ ਸੀ ਛੁਪਿਆ 'ਮੈਂ ਉਹਲੇ, ਹੁਣ ਉਸ ਹੋ ਮਿਹਰਵਾਨਾ।

ਨਿਜ ਸਰੂਪ ਦੇ ਸ਼ੀਸ਼ੇ ਲੈ ਲ੍ਯਾ, ਉਹਲਾ ਦੂਰਿ ਮਿਟਾਨਾ।

 

ਪੀਰ ਮਹਿੰਡਾ ਧੰਨ ਗੁਰ ਨਾਨਕ, ਕਰ ਮਨ! ਉਸ ਸ਼ੁਕਰਾਨਾ।

ਜਿਸ ਕਰ ਮਿਹਰ ਉਚਾਯਾ ਧੂੜ, ਉਸ ਦਾ ਕਰ ਸ਼ੁਕਰਾਨਾ।

 

ਚਰਨ-ਧੂੜ ਗੁਰ ਨਾਨਕ ਪਾਰਸ, ਉਸ ਵਿਚ ਰਲ ਰੁਲ ਜਾਨਾ,-

ਝੋਲੀ ਚੜ੍ਹਨ ਅਰਸ਼ ਦੀ, ਸਖੀਏ! ਹੁਸਨਾਂ ਲੈ ਗਲ ਲਾਨਾ।

 

ਸ਼ੁਕਰ ਸ਼ੁਕਰ ਗੁਰ ਨਾਨਕ! ਤੇਰੀ, ਰਹਮਤ ਦਾ ਸ਼ੁਕਰਾਨਾ।

ਜਿਨ ਦੁਖ ਕੱਟ ਅਮਰ ਸੁਖ ਅੰਦਰ ਦਿੱਤਾ ਲਾਇ ਟਿਕਾਨਾ।

 

ਧੰਨ ਗੁਰ ਨਾਨਕ, ਧੰਨ ਗੁਰ ਨਾਨਕ, ਸ਼ੁਕਰਾਨਾ ਸ਼ੁਕਰਾਨਾ।

ਤੇਰੀ ਰਹਿਮਤ ਦਾ ਗੁਰ ਨਾਨਕ! ਲਖ ਲਖ ਹੈ ਸ਼ੁਕਰਾਨਾ।

(18-11-36)