ਤੇਰੀ ਯਾਦ

ਹਯਾਤੀ 'ਯਾਦ' ਤੇਰੀ ਹੈ ਭੁਲਾਯਾ ਕਰ ਨ ਤੂੰ ਪ੍ਰੀਤਮ!

ਨ ਭੁੱਲਾਂ ਮੈਂ ਕਿਸੇ ਦਮ ਵੀ ਰਹੇ ਹਿਯਰਾ ਚਰਣ-ਸੀਤਮ।

 

ਅਸਾਡੀ ਯਾਦ ਅਪਨੀ ਨਾਂ, ਤੁਹਾਡੀ ਯਾਦ ਦਾ ਪਰਤੌ

ਅਸਾਡੇ ਝਲਕਦਾ ਅੰਦਰ ਸੁਣੀ ਸਚ ਸੁਹਣਿਆਂ ਮੀਤਮ।

 

ਨਹੀਂ ਪਾਯਾਂ ਅਸਾਝੀ ਹੈ ਬਿਨਾ ਰਹਿਮਤ ਤੁਸਾਡੀ ਦੇ

ਤੁਸਾਂ ਨੂੰ ਯਾਦ ਰਖ ਸਕੀਏ ਵਸਾ ਸਕੀਏ ਕਦੇ ਚੀਤਮ।

 

ਹਯਾਤੀ ‘ਯਾਦ' ਤੇਰੀ ਹੈ ਜਗਾਂਦੀ ਟੁੰਬ ਆ ਸਾਨੂੰ

ਉ ‘ਤੇਰੀ ਯਾਦ' ਤੇਰੀ ਹੈ ਵਸੇ ਹਿਯਰੇ ਅਸਾਂ ਬੀਚਮ।

 

ਅਸੀਂ ਜੀਵੀਏ ਯਾਦ ਅੰਦਰ ਅਸਾਡੀ ਇਹ ਨ ਖੂਬੀ ਹੈ,

‘ਕਣੀਂ-ਜਿੰਦ' ਲਾਕੇ ਇਸ ਅਪਣੀ ਰਿਦੇ ਜ੍ਯੁੰਦੇ ਤੁਸਾਂ ਕੀਤਮ।

 

ਤੁਸੀਂ ਸਾਗਰ ਅਸੀਂ ਚਾਤ੍ਰਿਕ ਤੁਹਾਡੀ ‘ਯਾਦ ਹੈ ਬੱਦਲ

ਵਸੋ ਬੱਦਲ, ਅਸੀਂ ਪੀਵੀਏ ਕਿ ਪ੍ਰਿਉ ਪ੍ਰਿਉ ਗਾਂਵਦੇ ਗੀਤਮ।

(ਕਸੌਲੀ 9-9-50)