ਦੀਆਂ ਬਾਹਾਂ ਛੱਕੜੇ ਨਾਲ ਬੰਨ੍ਹ ਦਿੱਤੀਆਂ ਤੇ ਸਭ ਮੰਜ਼ਲ ਵੱਲ ਵਧੀ ਗਏ।
ਤੇ ਪਿੱਛੇ ਛੱਡ ਆਏ ਉਹ, ਉਹ ਲਾਸ਼ਾਂ ਤੇ ਉਹਨਾਂ ਦੀ ਸੜ੍ਹਾਂਦ।
32
ਜਿੱਥੋਂ ਮੁੱਖ ਮਾਰਗ ਪਹਾੜਾਂ ਤੋਂ ਨਿਖੜਿਆ, ਉੱਥੇ ਕਸਾਕ ਅੱਖਾਂ ਅੱਡੀ ਬੈਠੇ ਹੋਏ ਸਨ। ਜਦੋਂ ਤੋਂ ਬਗਾਵਤ ਸ਼ੁਰੂ ਹੋਈ ਇਸ ਕੀਊਬਨ ਧਰਤੀ ਉੱਤੇ, ਹਰ ਥਾਂ ਬਾਲਸ਼ਵਿਕ ਫੌਜਾਂ ਨੂੰ ਕਸਾਕ ਰਜਮੈਂਟਾਂ, ਵਲੰਟੀਅਰ ਅਫ਼ਸਰਾਂ ਦੀਆਂ ਯੂਨਿਟਾਂ ਤੇ ਬਾਲ ਸੈਨਿਕਾਂ ਸਾਹਮਣੇ, ਪਿੱਛੇ ਹਟਣਾ ਪਿਆ। ਕਿਸੇ ਇੱਕ ਥਾਂ ਵੀ ਉਹ ਨਾ ਅੜ ਸਕੇ ਤੇ ਝੱਲੇ ਜਰਨੈਲਾਂ ਨੂੰ ਠੱਲ੍ਹ ਸਕੇ । ਕਸਬੇ ਮਗਰ ਕਸਬਾ, ਪਿੰਡ ਮਗਰੋਂ ਪਿੰਡ ਸਭ ਉਹਨਾਂ ਦੇ ਕਬਜ਼ੇ ਵਿੱਚ ਆਉਂਦੇ ਗਏ।
ਬਗਾਵਤ ਦੇ ਆਰੰਭ ਵਿੱਚ ਬਾਲਸ਼ਵਿਕ ਫੌਜਾਂ ਦਾ ਇੱਕ ਹਿੱਸਾ ਬਾਗੀਆਂ ਦੀ ਫ਼ੌਲਾਦੀ ਜਥੇਬੰਦੀ ਵਿੱਚੋਂ ਟੁਟ ਕੇ ਬੇਮੁਹਾਰਾ, ਹਜ਼ਾਰਾਂ ਦੀ ਗਿਣਤੀ ਵਿੱਚ ਰੀਫ਼ਜੀਆਂ ਤੇ ਛੱਕੜਿਆਂ ਨੂੰ ਲੈ ਕੇ ਸਮੁੰਦਰ ਤੇ ਪਹਾੜਾਂ ਵਿੱਚ ਦੀ ਫੈਲੀਆਂ ਸੌੜੀਆਂ ਥਾਵਾਂ ਵਿੱਚ ਨੱਸ ਗਿਆ। ਉਹਨਾਂ ਦੀ ਨੱਠ ਭੱਜ ਏਨੀ ਤੇਜ਼ ਚਾਲੇ ਹੋਈ ਕਿ ਉਹ ਫੜ੍ਹੇ ਨਾ ਜਾ ਸਕੇ । ਪਰ ਹੁਣ ਉੱਥੇ ਕਸਾਕ ਉਹਨਾਂ ਦੀ ਉਡੀਕ ਵਿੱਚ ਬੈਠੇ ਹੋਏ ਸਨ।
ਕਸਾਕਾਂ ਨੂੰ ਪਤਾ ਮਿਲਿਆ ਸੀ ਕਿ ਜੱਥਿਆਂ ਕੋਲ ਜਿਹੜੇ ਪਹਾੜਾਂ ਦੇ ਨਾਲ ਨਾਲ ਟੁਰੀ ਜਾ ਰਹੇ ਹਨ, ਲੁੱਟ ਦਾ ਮਾਲ ਬੇਸ਼ੁਮਾਰ ਹੈ: ਸੋਨਾ, ਕੀਮਤੀ ਪੱਥਰ, ਕੱਪੜੇ, ਗਰਾਮੋਫੋਨ, ਅਥਾਹ ਜੰਗੀ ਸਾਮਾਨ ਤੇ ਇਸ ਗੱਲ ਦੀ ਵੀ ਉਹਨਾਂ ਨੂੰ ਕੋਈ ਪਰਵਾਹ ਨਹੀਂ ਕਿ ਏਨਾ ਕੁਝ ਕੋਲ ਹੁੰਦਿਆਂ ਵੀ ਉਹ ਨੰਗੇ ਸਿਰ, ਨੰਗੇ ਪੈਰ, ਤੇ ਲੀਰਾਂ ਲਟਕਾਈ ਫਿਰਦੇ ਨੇ, ਜਿਸ ਤੋਂ ਪਤਾ ਲੱਗਦਾ ਹੈ ਕਿ ਉਹਨਾਂ ਨੂੰ ਰਹਿਣ ਬਹਿਣ ਦੀ ਕੋਈ ਸੁੱਧ ਨਹੀਂ। ਇਹ ਸੁਣ ਕੇ ਜਰਨੈਲਾਂ ਤੇ ਸਿਪਾਹੀਆਂ ਦੇ, ਸਭਨਾਂ ਦੇ ਮੂੰਹ ਵਿੱਚ ਪਾਣੀ ਆ ਗਿਆ। ਏਨੀ ਦੌਲਤ ਆਪ ਟੁਰ ਕੇ ਉਹਨਾਂ ਕੋਲ ਆ ਰਹੀ ਸੀ।
ਜਰਨੈਲ ਡੇਜੀਨਿਨ ਨੇ ਜਰਨੈਲ ਪੋਕਰੋਵਸਕੀ ਦੇ ਜ਼ਿੰਮੇ ਏਕਾਰਟਰੀਨੋਡਾਰ ਵਿੱਚ ਜਿਉਂ ਹੀ ਜੱਥੇ ਪਹਾੜਾਂ ਵਿੱਚੋਂ ਨਿਕਲ ਕੇ ਸਾਹਮਣੇ ਆਉਣ, ਆਪਣੀਆਂ ਸੈਨਿਕ ਟੁਕੜੀਆਂ ਨੂੰ ਜਥੇਬੰਦ ਕਰਕੇ ਘੇਰ ਲੈਣ ਦਾ ਕੰਮ ਸੌਂਪ ਦਿੱਤਾ। ਕਿਸੇ ਇੱਕ ਨੂੰ ਬਚ ਕੇ ਨਹੀਂ ਸੀ ਨਿਕਲ ਜਾਣ ਦਿੱਤਾ ਜਾਣਾ।
ਪੋਕਰੋਵਸਕੀ ਨੇ ਸਾਰੇ ਸਾਮਾਨ ਨਾਲ ਲੈੱਸ ਆਪਣੀਆਂ ਟੁਕੜੀਆਂ, ਬੇਲਇਆ (ਬੇਲਇਆ ਦਾ ਅਰਥ ਰੂਸੀ ਜ਼ਬਾਨ ਵਿੱਚ 'ਚਿੱਟਾ' ਹੈ ਦਰਿਆ ਦੇ ਨਾਲ ਨਾਲ, ਜਿਸ ਦਾ ਇਹ ਨਾਂ ਇਸ ਕਰਕੇ ਪਿਆ ਸੀ ਕਿ ਉਹ ਪਹਾੜਾਂ ਉੱਤੋਂ ਝੱਗ ਨਾਲ ਭਰਿਆ ਵੱਗਦਾ ਆਉਂਦਾ ਸੀ, ਰਾਹ ਰੋਕਣ ਲਈ ਤਿਆਰ ਬਰ ਤਿਆਰ ਕਰ ਦਿੱਤੀਆਂ।
ਕਸਾਕ ਬੜੀ ਮੌਜ ਵਿੱਚ ਆਪਣੀਆਂ ਟੋਪੀਆਂ ਸਿਰਾਂ ਉੱਤੇ ਟਿਕਾਈ, ਉੱਚੇ ਲੰਮੇ ਤੇ ਤਗੜੀ ਕਾਠੀ ਵਾਲ਼ੇ ਸਿਰ ਮਾਰਦੇ ਤੇ ਲਿਸ਼ ਲਿਸ਼ ਕਰਦੇ ਘੋੜਿਆਂ ਉੱਤੇ ਸਵਾਰ, ਖੜ੍ਹੇ ਹੋ
