51

ਅੰਮ੍ਰਿਤਸਰ

੧२. ४. ४੫

ੴ ਸ੍ਰੀ ਵਾਹਿਗੁਰੂ ਜੀ ਕੀ ਫਤੇ

ਪਯਾਰੇ ਡਾਕਟਰ ਜੀਓ

ਸ੍ਰੀਮਤੀ ਬੀਬੀ...ਜੀ ਦੇ ਹਜ਼ੂਰ ਸਾਹਿਬ ਯਾਤ੍ਰਾ ਕਰਨ ਗਿਆਂ ਸਰੀਰ ਤਯਾਗ ਜਾਣ ਦੀ ਖ਼ਬਰ ਸੁਣੀ ਹੈ । ਬੀਬੀ ਜੀ ਦਾ ਜੀਵਨ ਬਹੁਤ ਧਰਮੀ ਜੀਵਨ ਸੀ ਤੇ ਆਪ ਜੀ ਨਾਲ ਬਹੁਤ ਪਯਾਰ ਸੀ, ਵਡਿਆਂ ਦਾ ਵਿਛੋੜਾ ਸਦਾ ਅਪੁਰ ਘਾਟੇ ਪਾ ਦੇਂਦਾ ਹੈ ਤੇ ਫੇਰ ਖ਼ਾਸ ਕਰ ਐਸੇ ਧਰਮੀ ਤੇ ਪਯਾਰ ਵਾਲਿਆਂ ਨਿਕਟ ਦੇ ਸਨਬੰਧੀਆਂ ਦਾ । ਬੀਬੀ...ਜੀ ਨੂੰ ਇਸ ਸੁਭਾਗ ਮਾਂ ਨੇ ਹੀ ਉੱਚ ਜੀਵਨ ਵਿਚ ਪਾਯਾ ਸੀ, ਤੇ ਓਹ ਮਾਤਾ ਦੇ ਵਯੋਗ ਨੂੰ ਬਹੁਤ ਫੀਲ ਕਰਦੇ ਹੋਸਨ । ਪਰੰਤੂ ਇਕ ਗੱਲ ਸੋਚਣ ਵਾਲੀ ਹੈ ਕਿ ਸ੍ਰੀ ਬੀਬੀ ਜੀ ਦਾ ਗੁਰੂ ਗੋਬਿੰਦ ਸਿੰਘ ਜੀ ਦੇ ਦਰਬਾਰ ਅਪੜ ਕੇ ਸਦਾ ਲਈ ਚਰਨਾਂ ਵਿਚ ਸਮਾ ਜਾਣਾ ਉਨ੍ਹਾਂ ਦੀ ਆਤਮਾਂ ਲਈ ਇਕ ਪ੍ਰਕਾਰ ਦਾ ਸੁਭਾਗ ਹੈ । ਜਿਸ ਪ੍ਰਕਾਰ ਦਾ ਉਨ੍ਹਾਂ ਦਾ ਜੀਵਨ ਗੁਰੂ ਦਰ ਸਮਰਪਿਤ ਸੀ, ਉਸ ਤੋਂ ਅੰਦਾਜ਼ਾ ਲਗਦਾ ਹੈ ਕਿ ਉਨ੍ਹਾਂ ਨੇ ਬੀ ਉਸ ਪਵਿਤ੍ਰ ਭੂਮੀ ਤੇ ਸਰੀਰ ਤਯਾਗਣ ਨੂੰ ਅਪਨੇ ਲਈ ਸ਼ੁਭ ਖਯਾਲ ਕੀਤਾ ਹੋਣਾ ਹੈ । ਸਾਨੂੰ ਬੀ ਚਾਹੀਦਾ ਹੈ ਕਿ ਅਪਨੇ ਵਯੋਗ ਤੇ ਘਾਟ ਨੂੰ ਜੋ ਉਨ੍ਹਾਂ ਦੇ ਚਲੇ ਜਾਣ ਨਾਲ ਪਈ ਹੈ ਭਾਣੇ ਵਿਚ ਮਿੱਠੀ ਕਰ ਮੰਨੀਏ ਤੇ ਅਰਦਾਸ ਕਰੀਏ ਕਿ ਗੁਰੂ ਉਨ੍ਹਾਂ ਦੀ ਆਤਮਾਂ ਨੂੰ ਅਪਨੀ ਮੇਹਰ ਦੀ ਛਾਵੇਂ ਥਾਂ ਬਖ਼ਸ਼ੇ ਤੇ ਉਨ੍ਹਾਂ ਦੀ ਸਾਰੀ ਉਮਰ ਦੀ ਕੀਤੀ ਘਾਲ ਥਾਂ ਪਵੇ ।

ਮੇਰੀ ਦਿਲੀ ਹਮਦਰਦੀ ਇਸ ਪਯਾਰ ਵਿਛੋੜੇ ਵਿਚ ਆਪ ਜੀ ਦੰਪਤੀ ਤੇ ਸਾਰੇ ਪਰਿਵਾਰ ਨਾਲ ਹੈ। ਤੇ ਅਰਦਾਸ ਹੈ ਕਿ ਗੁਰੂ ਜੀ ਉਨ੍ਹਾਂ ਪਰ ਅਪਨੀ ਖ਼ਾਸ ਰਹਮਤ ਕਰਨ ।

ਆਪ ਦਾ ਹਿਤਕਾਰੀ

ਵ. ਸ,