ਹੈ ਅਸੀ ਉਸ ਨੂੰ ਸਿਰ ਮਥੇ ਤੇ ਤਸਲੀਮ ਕਰਦੇ ਹਾਂ । ਇਹੋ ਟੇਕ ਆਪ ਜੀ ਧਾਰਦੇ ਹਨ --- ਏਕਾ ਟੇਕ ਮੇਰੇ ਮਨ ਚੀਤ ॥ ਜਿਸ ਕਿਛੁ ਕਰਣਾ ਸੁ ਹਮਰਾ ਮੀਤ ॥

ਆਪ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਅਪਨੀ ਮੇਹਰ ਦ੍ਰਿਸ਼ਟੀ ਨਾਲ ਬਖਸ਼ੇ ਹੋਏ ਮਹਾਂ- ਪੁਰਖਾਂ ਦੇ ਵੰਸ਼ਜ਼ ਹੋ । ਇਸ ਤਰ੍ਹਾਂ ਗੁਰੂ ਕ੍ਰਿਪਾ ਦੇ ਸੁਪਾਤ੍ਰ ਹੋ, ਆਪ ਦੀਆਂ ਅੱਖਾਂ ਦੇ ਅਗੇ ਅਪਨੇ ਬਜ਼ੁਰਗ ਪਿਤਾ ਜੀ ਦਾ ਧਾਰਮਕ ਜੀਵਨ ਲੰਘਿਆ ਹੈ । ਆਪ ਇਸ ਪ੍ਰਯਤਨ ਵਿਚ ਹੋਸੋ ਕਿ ਆਪ ਵਾਹਿਗੁਰੂ ਜੀ ਦੇ ਅਮਿਟ ਭਾਣੇ ਵਿਚ ਅਪਨੀ ਮਰਜ਼ੀ ਨੂੰ ਇਕ ਸ੍ਵਰ ਕਰੋ । ਗੁਰੂ ਆਪ ਦਾ ਸਹਾਈ ਹੋਵੇ । ਮੇਰੀ ਅਰਦਾਸ ਹੈ ਕਿ ਵਾਹਿਗੁਰੂ ਜੀ ਤੇ ਬਖ਼ਸ਼ਸਾਂ ਕਰਨ ਵਾਲੇ ਛੇਵੇਂ ਤੇ ਦਸਵੇਂ ਪਾਤਸ਼ਾਹ ਜੀ ਆਪ ਦੇ ਸਹਾਈ ਹੋਣ ਤੇ ਆਪ ਅਪਨੇ ਪਰਿਵਾਰ ਨੂੰ ਸੰਭਾਲੋ ਤੇ ਸੁਖ ਬਖ਼ਸ਼ੋ ਜੋ ਸਾਰੇ ਹੁਣ ਆਪ ਦੇ ਆਸ੍ਰਿਤ ਹਨ। ਮੇਰੀ ਅਰਦਾਸ ਹੈ ਅਰ ਦਿਲੀ ਅਰਦਾਸ ਹੈ ਕਿ ਆਪ ਜੀ ਨੂੰ ਗੁਰੂ ਬਲ ਬਖ਼ਸੇ ਕਿ ਆਪ ਅਪਨੇ ਸੰਤ ਪਿਤਾ ਜੀ ਦੇ ਨਕਸ਼ੇ ਕਦਮ ਤੇ ਟੁਰੋ । ਆਪ ਦਾ ਜੀਵਨ ਗੁਰਮੁਖ ਜੀਵਨ ਹੋਵੇ, ਆਪ ਨਾਮ ਅਭਿਯਾਸੀਆਂ ਦੇ ਵੰਸ਼ ਵਿਚੋਂ ਹੋ, ਆਪ ਤੇ ਵਾਹਿਗੁਰੂ ਨਾਮ ਦੀ ਦਾਤ ਵਾਫ਼ਰ ਕਰੇ, ਆਪ ਜਪੋ ਤੇ ਅਪਨੇ ਪੀੜ੍ਹੀਆਂ ਤੋਂ ਮਗਰੋਂ ਲਗੇ ਆ ਰਹੇ ਸਿੱਖਾਂ ਨੂੰ ਨਾਮ ਜਪਾਵੇ । ਆਪ ਵਿਚ ਇਤਨਾ ਆਤਮ ਬਲ ਉਪਜੇ ਕਿ ਆਪ ਸਾਰੀ ਸਿੱਖੀ ਵਿਚ ਨਾਮ ਬਾਣੀ ਦਾ ਪਲੂ ਫੇਰ ਦਿਓ। ਹਜ਼ਾਰਾਂ ਜੀਵ ਆਪ ਦੇ ਹੱਥੋਂ ਅੰਮ੍ਰਿਤ ਛਕਣ ਨੂੰ ਲੋਚਣ ਜਿਵੇਂ ਆਪ ਦੇ ਪਿਤਾ ਜੀ ਤੋਂ ਛਕਣ ਨੂੰ ਲੋਕੀ ਲੋਚਦੇ ਸਨ।

ਬਰਖ਼ੁਰਦਾਰ ਜੀਓ ! ਜਗਤ ਸਦਾ ਨਹੀਂ ਤੇ ਹੁਣ ਹੀ ਇਤਨੇ ਬਜ਼ੁਰਗ ਵਯਕਤੀ ਦੇ ਟੁਰ ਜਾਣ ਨਾਲ ਜੈਸੀ ਕਿ ਆਪ ਦੇ ਪਿਤਾ ਜੀ ਦੀ ਸੀ ਸਾਮਰਤਖ ਨਜ਼ਰ ਆ ਰਿਹਾ ਹੈ ਕਿ ਜਗਤ ਦਾ ਜੀਵਨ ਸੁਪਨੇ ਮਾਤ੍ਰ ਹੈ। ਇਸ ਵਿਚ ਆ ਕੇ ਜਿਸ ਕਿਸੇ ਨੇ ਨਾਮ ਜਪ ਲਿਆ ਜਪਾ ਲਿਆ ਤੇ ਜਗਤ ਨੂੰ ਸੁਖ ਦੇ ਲਿਆ ਉਹ ਲਾਹਾ ਲੈ ਗਿਆ ਹੈ । ਸ੍ਰੀ ਗੁਰੂ ਜੀ ਦਾ ਫ਼ੁਰਮਾਨ ਹੈ -

ਜਨੁ ਨਾਨਕੁ ਧੂੜਿ ਮੰਗੈ ਤਿਸੁ ਗੁਰਸਿਖ ਕੀ

ਜੋ ਆਪ ਜਪੈ ਅਵਰਹ ਨਾਮੁ ਜਪਾਵੈ ॥

ਜਪਣ ਤੇ ਜਪਾਉਣ ਦਾ ਕਰ ਸਤਗੁਰਾਂ ਆਪ ਦੇ ਖ਼ਾਨਦਾਨ ਦੇ ਸਿਰ ਧਰਿਆ ਹੈ, ਦੇਗ਼ ਬਖ਼ਸ਼ੀ ਹੈ ਤੇ ਸਦਾ ਅੰਗ ਸੰਗ ਰਹੇ ਹਨ। ਮੇਰੀ ਅਰਦਾਸ ਹੈ ਕਿ ਉਹ ਸਤਿਗੁਰੂ ਆਪ ਵਿਚ ਉਹੋ ਬਲ ਬਖ਼ਸ਼ੇ ਉਹੋ ਆਤਮ-ਸਤਯਾ ਦਾਨ ਕਰੇ, ਉਹੋ ਬਰਕਤ ਪਾਵੇ ਕਿ ਆਪ ਸਿੱਖੀ ਪ੍ਰਚਾਰ ਵਿਚ, ਜਗਤ ਦੇ ਉਧਾਰ ਵਿਚ ਧਰਮ ਧੁਜਾ ਹੋ ਕੇ ਖੜੇ ਹੋਵੋ ।

ਲਾਲ ਜੀਓ ! ਅਪਨੇ ਆਪ ਨੂੰ ਜਗਤ ਵਿਚ ਇਕੱਲੇ Feel ਨਾ ਕਰੋ, ਆਪ ਦੇ ਪਿਤਾ ਪਿਤਾਮਾ ਗੁਰੂ ਬਖ਼ਸ਼ਸ਼ ਵਾਲੇ ਸਾਰੇ ਸਿਰ ਤੇ ਖੜੇ ਹਨ । ਆਪ ਕਮਰਕਸਾ ਕਰੋ ਤੇ ਉਹ ਗੁਰੂ ਸੇਵਾ ਦੀ ਕਾਰ ਸੰਭਾਲੇ । ਜਪੋ ਤੇ ਜਪਾਵੋ । ਗੁਰੂ ਸੱਚਾ ਪਾਤਸ਼ਾਹ ਆਪ ਦੇ ਅੰਗ ਸੰਗ ਹੋਵੇ ਮੇਰੇ ਯੋਗ ਕੋਈ ਸੇਵਾ ਹੋਵੇ ਤਾਂ ਦਸੀਓ ।

ਆਪ ਜੀ ਦਾ ਹਿਤਕਾਰੀ

ਵੀਰ ਸਿੰਘ