33. ਦੁਨੀਆਂ ਜੀਵਣ ਚਾਰ ਦਿਹਾੜੇ

ਦੁਨੀਆਂ ਜੀਵਣ ਚਾਰ ਦਿਹਾੜੇ,

ਕਉਣ ਕਿਸ ਨਾਲ ਰੁੱਸੇ ।ਰਹਾਉ।

 

ਜਿਹ ਵੱਲ ਵੰਜਾਂ ਮਉਤ ਤਿਤੇ ਵੱਲ,

ਜੀਵਨ ਕੋਈ ਨ ਦੱਸੇ ।1।

 

ਸਰ ਪਰ ਲੱਦਣਾ ਏਸ ਜਹਾਨੋਂ,

ਰਹਿਣਾ ਨਾਹੀਂ ਕਿੱਸੇ ।2।

 

ਕਹੈ ਹੁਸੈਨ ਫ਼ਕੀਰ ਸਾਈਂ ਦਾ,

ਮਉਤ ਵਟੈਂਦੜੀ ਰੱਸੇ ।3।

 

34. ਦੁਨੀਆਂ ਤਾਲਬ ਮਤਲਬ ਦੀ ਵੋ

ਦੁਨੀਆਂ ਤਾਲਬ ਮਤਲਬ ਦੀ ਵੋ,

ਸਚੁ ਸੁਣ ਵੋ ਫ਼ਕੀਰਾ ।ਰਹਾਉ।

 

ਮਤਲਬ ਆਵੈ ਮਤਲਬ ਜਾਵੈ,

ਮਤਲਬ ਪੂਜੇ ਗੁਰ ਪੀਰਾ ।1।

 

ਮਤਲਬ ਪਹਨਾਵੈ, ਮਤਲਬ ਖਿਲਾਵੈ,

ਮਤਲਬ ਪਿਲਾਵੈ ਨੀਰਾ ।2।

 

ਕਹੈ ਹੁਸੈਨ ਜਿਨ ਮਤਲਬ ਛੋਡਿਆ,

ਸੋ ਮੀਰਨ ਸਿਰ ਮੀਰਾ ।3।