45. ਹੁਣਿ ਤਣਿ ਦੇਸਾਂ ਤੇਰਾ ਤਾਣਾ

ਹੁਣਿ ਤਣਿ ਦੇਸਾਂ ਤੇਰਾ ਤਾਣਾ,

ਮੇਰੀ ਜਿੰਦੁੜੀਏ ਨੀਂ ।

ਸਾਹਿਬ ਜਾਦੜੀਏ ਨੀਂ ।

ਸਰਪਰ ਜਾਵਣੀਏਂ ਨੀਂ ।

ਘੁੰਮ ਨ ਆਵਣੀਏਂ ਨੀਂ ।

ਹੁਣਿ ਤਣਿ ਦੇਸਾਂ ਤੇਰਾ ਤਾਣਾ ।

 

ਕੱਤਦਿਆਂ ਕੱਤਦਿਆਂ ਉਮਰਿ ਵਿਹਾਈ,

ਨਿਕਲਿਆ ਸੂਤ ਪੁਰਾਣਾ ।

ਖੱਡੀ ਦੇ ਵਿਚ ਜਲਾਹੀ ਫਾਥੀ,

ਨਲੀਆਂ ਦਾ ਵਖਤੁ ਵਿਹਾਣਾ ।ਰਹਾਉ।

 

ਤਾਣੇ ਪੇਟੇ ਇਕੋ ਸੂਤਰਿ,

ਦੁਤੀਆ ਭਾਉ ਨ ਜਾਣਾ ।

ਚਉਂਸੀ ਪੈਂਸੀ ਛਡਿ ਕਰਾਹੀ,

ਹਜ਼ਾਰੀਂ ਰੱਛ ਪਛਾਣਾ ।1।

 

ਤਾਣਾ ਆਂਦਾ ਬਾਣਾ ਆਂਦਾ,

ਆਂਦਾ ਚਰਖਾ ਪੁਰਾਣਾ ।

ਆਖਣ ਦੀ ਕਿਛੁ ਹਾਜਤਿ ਨਾਹੀਂ,

ਜੋ ਜਾਣੇ ਸੋ ਜਾਣਾ ।2।

 

ਧਰਨਿ ਅਕਾਸ਼ ਵਿਚਿ ਵਿਥੁ ਚੱਪੇ ਦੀ,

ਤਹਾਂ ਸ਼ਾਹਾਂ ਦਾ ਤਾਣਾ ।

ਸਭ ਦੀਸੇ ਸ਼ੀਸ਼ੇ ਦਾ ਮੰਦਰਿ,

ਵਿਚਿ ਸ਼ਾਹ ਹੁਸੈਨ ਨਿਮਾਣਾ ।3।