120. ਰੱਬਾ ਵੇ ਮੈਂ ਨਲੀ ਛਿਪਾਈ

ਰੱਬਾ ਵੇ ਮੈਂ ਨਲੀ ਛਿਪਾਈ,

ਤੂੰ ਬਖਸਣਿ ਹਾਰਾ ਸਾਂਈਂ ।ਰਹਾਉ।

 

ਹੱਥੀਂ ਮੇਰੇ ਮੁੰਦਰੀ,

ਮੈਂ ਕੰਮ ਕਿਉਂ ਕਰਿ ਕਰੀਂ ।

ਪੈਰੀਂ ਮੇਰੇ ਲਾਲ ਜੁੱਤੀ,

ਮੈਂ ਤਾਣਾ ਕਿਉਂ ਕਰਿ ਤਣੀ,

ਚੁੱਲ੍ਹੇ ਪਿਛੇ ਪੰਜ ਕਸੋਰੇ,

ਮਾਲੁ ਕਿਉਂ ਕਰਿ ਭਰੀਂ ।1।

 

ਅੰਦਰਿ ਬੋਲਣਿ ਮੁਰਗ਼ੀਆਂ,

ਤੇ ਬਾਹਰ ਬੋਲਨਿ ਮੋਰੁ ।

ਕਹੈ ਹੁਸੈਨ ਫ਼ਕੀਰ ਸਾਈਂ ਦਾ,

ਤਾਣੀ ਨੂੰ ਲੈ ਗਏ ਚੋਰੁ, ਜੋਰਾ ਜੋਰੁ ।2।

 

121. ਰਹੀਏ ਵੋ ਨਾਲ ਸਜਨ ਦੇ, ਰਹੀਏ ਵੋ

ਰਹੀਏ ਵੋ ਨਾਲ ਸਜਨ ਦੇ, ਰਹੀਏ ਵੋ ।ਰਹਾਉ।

 

ਲੱਖ ਲੱਖ ਬਦੀਆਂ ਤੇ ਸਉ ਤਾਹਨੇ,

ਸਭੋ ਸਿਰ ਤੇ ਸਹੀਏ ਵੋ ।1।

 

ਤੋੜੇ ਸਿਰ ਵੰਞੇ ਧੜ ਨਾਲੋਂ,

ਤਾਂ ਭੀ ਹਾਲ ਨ ਕਹੀਏ ਵੋ ।2।

 

ਸੁਖ਼ਨ ਜਿਨ੍ਹਾਂ ਦਾ ਹੋਵੈ ਦਾਰੂ,

ਹਾਲ ਉਥਾਈਂ ਕਹੀਏ ਵੋ ।3।

 

ਚੰਦਨ ਰੁਖ ਲਗਾ ਵਿਚ ਵੇਹੜੇ,

ਜੋਰ ਧਿਙਾਣੇ ਖਹੀਏ ਵੋ ।4।

 

ਕਹੈ ਹੁਸੈਨ ਫ਼ਕੀਰ ਸਾਈਂ ਦਾ,

ਜੀਵੰਦਿਆਂ ਮਰ ਰਹੀਏ ਵੋ ।5।