ਮਨ ਪ੍ਰਾਣੀ ਮੁਗਧ ਬੀਚਾਰੁ ਅਹਿਨਿਸਿ ਜਪੁ

ਧਰਮ ਕਰਮ ਪੂਰੈ ਸਤਿਗੁਰੁ ਪਾਈ ਹੈ॥੨॥

ਸਵਈਏ ਮਹਲੇ ਚਉਥੇ ਕੇ, ੧੩੯੮

ਪੂਰੇ ਸਤਿਗੁਰੂ ਦਾ ਪਾਵਣਾ ਹੀ ਸਾਰ ਕਰਮ ਧਰਮ ਦਾ ਪਾਵਣਾ ਹੈ, ਕਿਉਂਕਿ ਸਾਰੇ ਧਰਮਾਂ ਵਿਚੋਂ ਸ੍ਰੇਸ਼ਟ ਧਰਮ ਤੇ ਨਿਰਮਲ ਕਰਮ ਨਾਮ ਜਪਣਾ ਹੀ ਹੈ । ਯਥਾ:-

ਸਰਬ ਧਰਮ ਮਹਿ ਸ੍ਰੇਸਟ ਧਰਮੁ ॥ ਹਰਿ ਕੋ ਨਾਮੁ ਜਪਿ ਨਿਰਮਲੁ ਕਰਮੁ ॥੮॥੩॥

ਗਉੜੀ ਸੁਖਮਨੀ ਮ: ੫, ਪੰਨਾ ੨੬੬

ਇਹ ਕੇਵਲ ਸਤਿਗੁਰੂ ਦੁਆਰਾ ਗੁਰਮਤਿ ਦੁਆਰਾ ਹੀ ਪ੍ਰਾਪਤ ਹੁੰਦਾ ਹੈ। ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਘਰ ਦਾ ਸਿਖ ਸੇਵਕ ਬਣਿਆਂ ਹੀ ਸਿਧ ਸਾਧਿਕ, ਸੁਰ ਨਰ ਮੁਨ ਜਨਾਂ ਨੂੰ ਸਾਰ ਸ਼ਬਦ ਗੁਰਮੰਤ੍ਰ ਵਾਹਿਗੁਰੂ ਦੀ ਪ੍ਰਾਪਤੀ ਹੁੰਦੀ ਹੈ ਅਤੇ ਤਾਹੀਓਂ ਓਹਨਾਂ ਦੀ ਯਾਚਨਾ-ਮਈ ਘਾਲ ਥਾਇੰ ਪੈਂਦੀ ਹੈ; ਜਦੋਂ ਓਹ ਇਕ-ਲਿਵ ਲਾਇ ਕੈ ਨਾਮ ਅਭਿਆਸ ਦੀ ਕਮਾਈ ਕਰਦੇ ਹਨ। ਨਹੀਂ ਤਾਂ ਅਪਾਰ ਨਿਰਭਉ ਨਿਰੰਕਾਰ ਵਾਹਿਗੁਰੂ ਦਾ ਗਲੀਂ ਬਾਤੀਂ ਕੋਈ ਅੰਤ ਪਾਰਾਵਾਰ ਨਹੀਂ ਪਾ ਸਕਦਾ । ਉਹ ਅਕੱਥ ਹੈ; ਕਿਸੇ ਤੋਂ ਕਥਿਆ ਨਹੀਂ ਜਾ ਸਕਦਾ । ਨਾਮ ਗੁਰਮੰਤ੍ਰ ਅਕੱਥ ਕਥਾ ਦਾ ਕਥਨਹਾਰ ਕੇਵਲ ਗਰੂ ਸਮਰੱਥ ਹੀ ਹੈ । ਗੁਰੂ ਸਮਰੱਥ ਦੁਆਰਾ ਹੀ ਵਾਹਿਗੁਰੂ ਨਾਮ ਰੂਪੀ ਅਕੱਥ ਕਥਾ ਬੁਝੀ ਜਾ ਸਕਦੀ ਹੈ ।

ਤਾਂ ਤੇ, ਹੇ ਭ੍ਰਮ ਭੂਲੇ ਸੰਸਾਰੀ ਜੀਵ ! ਜੇ ਲੱਖ ਚਉਰਾਸੀਹ ਜੂਨੀਆਂ ਦੇ ਚੱਕਰ ਤੋਂ ਅਤੇ ਜਨ ਸੰਘਾਰੀ ਮਾਰਾਂ ਤੋਂ ਤੇ ਜਮ-ਕਾਲ-ਡੰਡ ਤੋਂ ਛੁਟਣਾ ਚਾਹੁੰਦੇ ਹੋ ਤਾਂ ਕੇਵਲ ਗੁਰਮਤਿ ਦੁਆਰਾ ਹੀ ਵਾਹਿਗੁਰੂ ਨਾਮ ਦੀ ਅਕੱਥ ਕਥਾ ਨੂੰ ਧਿਆਵੋ । ਹੇ ਮਨ ਮੁਗਧ ਮੂਰਖ ਪ੍ਰਾਣੀ ! ਏਸੇ ਨਾਮ ਦੀ ਜਪ-ਕਮਾਈ ਦਾ ਅਭਿਆਸ ਅਭਿਆਸੋ (ਵੀਚਾਰ ਵੀਚਾਰ), ਇਉਂ ਇਸ ਬਿਧਿ ਹੀ ਸਤਿਗੁਰੂ ਨਾਨਕ ਦੇ ਦ੍ਰਿੜਾਏ ਸੱਚੇ ਧਰਮ ਕਰਮ ਦੇ ਪਾਤ੍ਰ ਬਣ ਸਕਦੇ ਹੋ ।

ਗੁਰ ਅੰਗਦ ਦੀਅਉ ਨਿਧਾਨੁ ਅਕਥ ਕਥਾ ਗਿਆਨੁ

ਪੰਚ ਭੂਤ ਬਸਿ ਕੀਨੇ ਜਮਤ ਨ ਤ੍ਰਾਸ ॥

ਗੁਰ ਅਮਰ ਗੁਰੂ ਸ੍ਰੀ ਸਤਿ ਕਲਿਜੁਗ ਰਾਖੀ ਪਤਿ

ਅਘਨ ਦੇਖਤ ਗਤੁ ਚਰਨ ਕਵਲ ਜਾਸ ॥੪॥

ਸਵਈਏ ਮਹਲੇ ਚਉਥੇ ਕੇ, ਪੰਨਾ ੧੩੯੯

ਗੁਰੂ ਅੰਗਦ ਸਾਹਿਬ ਦੂਸਰੀ ਪਾਤਸ਼ਾਹੀ ਨੇ ਗੁਰੂ ਅਮਰਦਾਸ ਨੂੰ ਅਕੱਥ ਕਥਾ ਰੂਪੀ ਗੁਰਮੰਤ੍ਰ ਗਿਆਨ ਮਈ ਐਸਾ ਨਿਧਾਨ (ਖ਼ਜ਼ਾਨਾ) ਬਖ਼ਸ਼ਿਆ ਕਿ ਕਾਮ ਆਦਿ