ਦੁੱਲਾ ਪਿੰਡੀ ਦਾ ਬਣ ਗਿਆ ਬਾਦਸ਼ਾਹ ਤਾਕਤ ਭਰਗੀ ਲੁਟਕੇ ਮਾਲ।
ਮੈਗਜ਼ੀਨ ਦੁੱਲੇ ਨੇ ਜਮਾ ਕਰ ਲਈ ਨਾਲੇ ਕਰ ਲੀ ਫੌਜ ਕਮਾਲ ।
ਪਕੇ ਮੋਰਚੇ ਦੁੱਲੇ ਨੇ ਬਣਾ ਲਏ ਬੈਰੀ ਬਣ ਕੇ ਬੈਠਾ ਦਲਾਲ ।
ਰੋਂਦਾ ਅਕਬਰ ਧਾਹਾਂ ਮਾਰ ਕੇ ਕੇਹੜਾ ਲੜੂ ਦੁੱਲੇ ਦੇ ਨਾਲ ।
ਆਣ ਖੋ ਤੀ ਸਾਰੀ ਫੌਜ ਦੀ ਦਾੜ੍ਹੀ ਪਟੀ ਬੇਗਮ ਦੇ ਬਾਲ ।
ਖਤ ਲਿਖਦਾ ਅਕਬਰ ਬਾਦਸ਼ਾਹ ਦਿੱਲੀ ਭੇਜਿਆ ਬੇਗਮ ਤਤਕਾਲ ।
ਖਤ ਲੈਕੇ ਨੌਕਰ ਝੱਟ ਤੁਰ ਪਿਆ ਦਿੱਲੀ ਪੌਂਚਿਆ ਦੁਖ ਸੁਖ ਨਾਲ ॥ ੪੫ ॥
ਨੌਕਰ ਪੌਂਚ ਗਿਆ ਦਿੱਲੀ ਦੇ ਵਿਚ ਬੀਰ ਨੇ ਖਤ ਸੂਬੇ ਨੂੰ ਦਿਤਾ ਫੜਾ।
ਪੜ੍ਹ ਕੇ ਖਤ ਨੂੰ ਸੂਬਾ ਜਹਾਂਗੀਰ ਲੈਂਦਾ ਦਿਲ ਨੂੰ ਜੋਸ਼ ਚੜ੍ਹਾ ।
ਜੰਗੀ ਲਾਟ ਨੂੰ ਟੈਲੀਫੂਨ ਭੇਜਤਾ ਦਿਤਾ ਵਾਕਾ ਲਾਹੌਰ ਦਾ ਸੁਣਾ।
ਆਕੀ ਦੁੱਲਾ ਪਿੰਡੀ ਵਿਚ ਹੋ ਗਿਆ ਜੀਹਨੇ ਰਖੀ ਹੈ ਲੁਟ ਮਚਾ ।
ਅੱਧੀ ਮਾਰਤੀ ਫੌਜ ਲਾਹੌਰ ਦੀ ਆਦ ਅੰਤ ਤੇ ਦਸਿਆ ਲਾ ।
ਖ਼ਬਰ ਸੁਣ ਕੇ ਦਿੱਲੀ ਦੀ ਫੌਜ ਚੜ੍ਹ ਗਈ ਦਿਤੀ ਗਰਦ ਗੁਬਾਰ ਉਡਾ।
ਤੋਪਖਾਨਾ ਜੰਗੀ ਬੇੜਾ ਤੁਰ ਪਿਆ ਵਿਚ ਪੌਂਚਾ ਲਾਹੌਰ ਦੇ ਜਾ।
ਸਾਰਾ ਹਾਲ ਅਕਬਰ ਤੋਂ ਪੁਛਿਆ ਅਕਬਰ ਰੋ ਕੇ ਦਸਿਆ ਦੁਖ ਆ।
ਫੌਜ ਦਿੱਲੀ ਲਾਹੌਰ ਦੀ ਤੁਰ ਪਈ ਘੇਰਾ ਪਿੰਡੀ ਨੂੰ ਪਾਇਆ ਜਾ ।
ਸਾਰੀ ਦੁੱਲੇ ਨੂੰ ਖਬਰ ਪੂਰੀ ਹੋ ਗਈ ਫੌਜ ਦਿੱਲੀ ਲਾਹੌਰ ਦੀ ਗਈ ਆ।
ਝੱਟ ਦੁੱਲੇ ਨੇ ਮੱਲੇ ਮੋਰਚੇ ਤੋਪਾਂ ਦਿਤੀਆਂ ਦੁੱਲੇ ਦਗਾ ॥ ੫੬ ॥
ਦੁੱਲੇ ਨੇ ਲਾਇਆ ਮੋਰਚਾ ਤੋਪਾਂ ਚੜ੍ਹੀਆਂ ਕਿਲੇ ਤੇ ਆਨ।
ਪੈਦਲ ਪਲਟਨ ਬੈਠੀ ਮੋਰਚੇ ਪਟੇ ਧਰਤੀ ਦੇ ਦਰਮਿਆਨ ।
ਰਫਲਾਂ ਹੁੰਦੀਆਂ ਸੀ ਪੈਲੀ ਲੰਮੀਆਂ ਗੋਲਾ ਪਾਈਏ ਦਾ ਪੈਂਦਾ ਆਨ ।
ਪੰਜ ਪੰਜ ਮੀਲ ਗੋਲੀ ਜਾਮਦੀ ਖਾਲੀ ਕਰਦੀਆਂ ਜਾਣ ਮਦਾਨ ।
ਪੈਦਲ ਪਿਛੇ ਰਸਾਲਾ ਸੱਜਦਾ ਜਿਨ੍ਹਾਂ ਦੇ ਹੱਥਾਂ ਮੇਂ ਤੀਰ ਕਮਾਨ ।
