ਕੁਦਰਤੀ ਖੇਤੀ ਨੂੰ ਬਾਬੇ ਨਾਨਕ ਦੀ ਖੇਤੀ ਮੰਨਣਵਾਲਾ ਹਰਜੰਟ ਸਿੰਘ

ਸ੍ਰ: ਹਰਜੰਟ ਸਿੰਘ ਪਿੰਡ ਰਾਏ ਕੇ ਕਲਾਂ, ਜ਼ਿਲ੍ਹਾ ਬਠਿੰਡਾ, ਨੇੜੇ ਗਿੱਦੜਬਾਹਾ, ਜੋ ਖੇਤੀ ਵਿਰਾਸਤ ਮਿਸ਼ਨ ਦੇ ਪ੍ਰਧਾਨ ਵੀ ਹਨ ਪੂਰੀ ਤਰ੍ਹਾਂ ਕੁਦਰਤੀ ਖੇਤੀ ਨੂੰ ਸਮਰਪਿਤ ਹਨ। ਹਰਜੰਟ ਸਿੰਘ ਨੇ ਮਈ 2002 ਵਿੱਚ ਜ਼ਹਿਰਾਂ, ਕੀਟ-ਨਾਸ਼ਕਾਂ, ਰਸਾਇਣਕ ਖਾਦਾਂ ਤੋਂ ਬੇਹੱਦ ਤੰਗ ਹੋ ਕੇ ਇਨ੍ਹਾਂ ਤੋਂ ਮੁਕਤੀ ਦਾ ਰਾਹ ਚੁਣਿਆ। ਭਾਵੇਂ ਸ਼ੁਰੂ ਵਿੱਚ ਉਨ੍ਹਾਂ ਵਰਮੀ ਕੰਪੋਸਟ ਤਿਆਰ ਕਰਕੇ ਇਨ੍ਹਾਂ ਜ਼ਹਿਰਾਂ ਤੋਂ ਮੁਕਤੀ ਵਾਲਾ ਰਾਹ ਚੁਣਿਆ ਪਰੰਤੂ ਇਸ ਤਕਨੀਕ ਵਿੱਚ ਕਈ ਔਕੜਾਂ ਅਤੇ ਹਮੇਸ਼ਾ ਬੇਲੋੜੀ ਸਿਰਦਰਦੀ ਕਰਕੇ ਇਨ੍ਹਾਂ ਨੇ ਅਕਤੂਬਰ 2006 ਤੋਂ ਕੁਦਰਤੀ ਖੇਤੀ ਸ਼ੁਰੂ ਕਰ ਦਿੱਤੀ। ਹੁਣ ਹਰਜੰਟ ਸਿੰਘ ਆਪਣੇ 36 ਦੇ 36 ਏਕੜ ਜ਼ੀਰੋ ਬੱਜਟ-ਕੁਦਰਤੀ ਖੇਤੀ ਰਾਹੀਂ ਕਰਦੇ ਹਨ। ਕੁਦਰਤੀ ਖੇਤੀ ਸੰਬੰਧੀ ਆਪਣੇ ਵਿਚਾਰ ਪ੍ਰਗਟ ਕਰਦਿਆਂ ਹਰਜੰਟ ਸਿੰਘ ਦਾ ਕਹਿਣਾ ਹੈ ਕਿ ਕੁਦਰਤੀ ਖੇਤੀ ਕਰਕੇ ਅਸੀਂ ਸੱਚਮੁੱਚ ਸਰੱਬਤ ਦਾ ਭਲਾ ਕਰਦੇ ਹਾਂ। ਇਹ ਤਾਂ ਬਾਬੇ ਨਾਨਕ ਦੀ ਖੇਤੀ ਹੈ। ਇਸ ਖੇਤੀ ਰਾਹੀਂ ਅਸੀਂ ਸੂਖ਼ਮ ਜੀਵਾਣੂਆਂ ਤੋਂ ਲੈ ਕੇ ਹਰ ਤਰ੍ਹਾਂ ਦੇ ਪੰਛੀਆਂ, ਪਸ਼ੂਆਂ, ਪਖੇਰੂਆਂ ਤੋਂ ਇਲਾਵਾ ਮਨੁੱਖਤਾ ਲਈ ਵੀ ਜ਼ਹਿਰ ਰਹਿਤ ਅਨਾਜ ਪੈਦਾ ਕਰਕੇ ਸਮਾਜ ਦੀ ਸੱਚੀ ਸੇਵਾ ਤਾਂ ਕਰਦੇ ਹੀ ਹਾਂ ਸਗੋਂ ਅਸੀਂ ਆਪਣੀ ਧਰਤੀ ਮਾਂ ਦੇ ਸੱਚੇ ਪੁੱਤਰ ਹੋਣ ਦਾ ਮਾਣ ਵੀ ਹਾਸਿਲ ਕਰਦੇ ਹਾਂ।

ਪਤਾ :- ਸ੍ਰ. ਹਰਜੰਟ ਸਿੰਘ

ਪਿੰਡ ਅਤੇ ਡਾਕਖਾਨਾ ਰਾਏਕੇ ਕਲਾਂ,

ਜਿਲਾ ਬਠਿੰਡਾ । ਫੋਨ: 98176-20814