ਜੇ ਖੁਦਮੁਖਤਿਆਰੀ ਨਾ ਰਹੀ.......?
ਅਕੜੇਵਾਂ ਫੌਜੀ ਟੌਹਰ ਦਾ, ਪਰ ਸੱਧਰਾਂ ਗੁਲਾਮ ਹੋਈਆਂ ਸਾਰੀਆਂ।
ਜੇ ਖੁਦਮੁਖਤਿਆਰੀ ਨਾ ਰਹੀ ਫਿਰ ਕਾਹਦੀਆਂ ਕਿਸਾਨਾਂ
ਸਰਦਾਰੀਆਂ?
ਸਭ ਤੋਂ ਗੁਲਾਮੀ ਇਹ ਬੁਰੀ ਜਿਹੜੀ ਅਸਾਂ ਨੂੰ ਨਜ਼ਰ ਨਾ ਆਵੇ।
ਥਾਂ-ਥਾਂ ਤੇ ਫਾਹੀਆਂ ਗੱਡ ਕੇ ਸਾਨੂੰ ਰੋਜ਼ ਹੀ ਸ਼ਿਕਾਰੀ ਪਰਚਾਵੇ।
ਸਾਡੇ ਖੂਨ ਵਿੱਚੋਂ ਖ਼ੁਸ਼ੀਆਂ ਨਿੱਤ ਕੀਤੀਆਂ ਕਸ਼ੀਦ ਨੇ ਵਿਉਪਾਰੀਆਂ।
ਜੇ ਖੁਦਮੁਖਤਿਆਰੀ ਨਾ ਰਹੀ ਫਿਰ ਕਾਹਦੀਆਂ ਕਿਸਾਨਾਂ
ਸਰਦਾਰੀਆਂ?
ਬੀਜ ਤੇਰੇ ਕੋਲੋਂ ਖੁੱਸ ਗਏ ਰਹੀ ਖਾਦ ਵੀ ਨਾ ਆਪਣੀ ਤੇਰੀ।
ਬੋਹੜ ਤੇ ਪਿੱਪਲ ਪੁੱਟ ਤੇ ਛੱਡੀ ਖੇਤ 'ਚ ਨਾ ਕੋਈ ਨਿੰਮ, ਬੇਰੀ।
ਜੇ ਖੁਦਮੁਖਤਿਆਰੀ ਨਾ ਰਹੀ....
ਮੁੱਲ ਲੈ ਲੈ ਜ਼ਹਿਰਾਂ ਪਾਪੀਆਂ ਮਾਤਾ ਧਰਤੀ ਦਾ ਭਰ ਤਾ ਸੀਨਾ।
ਜਿਹੜਾ ਦੇਵੇ ਜ਼ਹਿਰ ਮਾਤਾ ਨੂੰ ਪੁੱਤ ਉਹਦੇ ਨਾਲੋਂ ਕਿਹੜਾ ਹੈ।
ਕਮੀਨਾ।
ਜ਼ਹਿਰ ਵੱਟੇ ਜ਼ਹਿਰ ਮਿਲਿਆ ਤਾਹੀਂਏ ਕੈਂਸਰ ਨੇ ਜੜ੍ਹਾਂ ਨੇ ਪਸਾਰੀਆਂ।
ਜੇ ਖੁਦਮੁਖਤਿਆਰੀ ਨਾ ਰਹੀ....
ਮਾਲਕ ਜ਼ਮੀਨ ਦਾ ਜਦੋਂ ਹੱਥ ਬੇਜ਼ਮੀਨਿਆਂ ਅੱਗੇ ਪਸਾਰੇ।
ਵਾਰੀ ਵਾਰੀ ਮੰਗੇ ਕਰਜ਼ਾ ਜਾ ਕੇ ਵਿਹਲੜ ਸ਼ੈਤਾਨਾਂ ਦੇ ਦੁਆਰੇ।
ਅਕਲਾਂ 'ਤੇ ਰੋਣ ਆਂਵਦਾ ਇਹ ਕਿੱਦਾਂ ਦੀਆਂ ਨੇ ਦੁਕਾਨਦਾਰੀਆਂ।
ਜੇ ਖੁਦਮੁਖਤਿਆਰੀ ਨਾ ਰਹੀ....
'ਨੀਰੋ' ਹੈ ਸ਼ੈਤਾਨ ਬੜਾ, ਰੋਮ ਸੜਦਾ ਉਹ ਬੰਸਰੀ ਵਜਾਵੇ।
ਸੜ ਰਹੇ ਬਸ਼ਿੰਦਿਆਂ ਨੂੰ ਅਜੇ ਤਕ ਵੀ ਸਮਝ ਨਾ ਆਵੇ।
ਅਜੇ ਵੀ ਉਮੀਦ ਕਰਦੇ ਨੀਰੋ ਮਸ਼ਕਾ ਲਿਆਵੇਗਾ ਪਿਆਰੀਆਂ।
ਜੇ ਖੁਦਮੁਖਤਿਆਰੀ ਨਾ ਰਹੀ....
