ਫ਼ਾਰਮ ਪੂਰਨ ਰੂਪ ਵਿਚ ਕੁਦਰਤੀ ਖੇਤੀ ਨੂੰ ਸਮਰਪਿਤ ਕਰ ਦਿੱਤਾ ਹੈ। ਜਾਣੀ-ਮਾਣੀ ਧਾਰਮਿਕ ਸ਼ਖ਼ਸੀਅਤ ਸੰਤ ਬਲਬੀਰ ਸਿੰਘ ਸੀਚੇਵਾਲ (ਸੁਲਤਾਨਪੁਰ ਲੋਧੀ) ਜਿਨ੍ਹਾਂ ਨੇ ਕਾਰ ਸੇਵਾ ਰਾਹੀਂ ਕਾਲੀ ਬੇਈਂ ਨੂੰ ਮੁੜ ਸੁਰਜੀਤ ਕਰਨ ਦਾ ਮਹਾਨ ਕੰਮ ਕੀਤਾ ਹੈ, ਵੀ ਖੁੱਲ੍ਹੇ ਤੌਰ ਕੁਦਰਤੀ ਖੇਤੀ ਲਹਿਰ ਵਿਚ ਸ਼ਾਮਲ ਹਨ। ਹੁਣ ਉਹ ਆਪਣੇ ਧਾਰਮਿਕ ਇਕੱਠਾਂ ਵਿਚ ਕੁਦਰਤੀ ਖੇਤੀ ਦਾ ਖੁੱਲ੍ਹ ਕੇ ਪ੍ਰਚਾਰ ਕਰ ਰਹੇ ਹਨ ਅਤੇ ਇਸ ਅਮਲੀ ਰੂਪ ਵਿਚ ਲਾਗੂ ਕਰਵਾ ਰਹੇ ਹਨ। ਏਸੇ ਤਰ੍ਹਾਂ ਹੀ ਬਹੁਤ ਸਾਰੇ ਪੇਸ਼ਾਵਰ ਲੋਕ- ਡਾਕਟਰ, ਇੰਜੀਨੀਅਰ, ਵਕੀਲ, ਅਧਿਆਪਕ, ਜਰਨਾਲਿਸਟ ਅਤੇ ਸਰਕਾਰੀ ਅਫ਼ਸਰ ਧਰਤੀ ਦੀ ਇਸ ਲਹਿਰ ਨਾਲ ਜੁੜ ਰਹੇ ਹਨ। ਉਹ ਲਗਾਤਾਰ ਕੇ.ਵੀ. ਐੱਮ. ਨਾਲ ਤਾਲ-ਮੇਲ ਰੱਖ ਰਹੇ ਹਨ ਅਤੇ ਉਸ ਦੀਆਂ ਗਤੀਵਿਧੀਆਂ ਵਿਚ ਸ਼ਾਮਲ ਹੁੰਦੇ ਹਨ।

ਹੁਣ ਕੇ.ਵੀ.ਐੱਮ. ਆਪਣੀਆਂ ਸ਼ਕਤੀਆਂ ਨੂੰ ਕੇਂਦਰਤ ਕਰਕੇ ਪੂਰੇ ਦੇ ਪੂਰੇ ਪਿੰਡ ਨੂੰ ਕੁਦਰਤੀ ਖੇਤੀ ਵਿਚ ਤਬਦੀਲ ਕਰਕੇ ਇੱਕ ਮਾਡਲ ਖੜ੍ਹਾ ਕਰਨ ਵੱਲ ਵਧ ਰਿਹਾ ਹੈ। ਫਰੀਦਕੋਟ ਜ਼ਿਲ੍ਹੇ ਦੇ ਪਿੰਡ ਚੈਨਾ ਅਤੇ ਦਬੜ੍ਹੀਖ਼ਾਨਾ ਇਸ ਦਿਸ਼ਾ ਵਿਚ ਪਹਿਲੇ ਪਿੰਡ ਚੁਣੇ ਗਏ ਹਨ।

ਨਾਨਕ ਖੇਤੀ ਕਰਨ ਵਾਲੇ ਕਿਸਾਨ ਖੇਤੀ ਨੂੰ ਕੀਟ-ਨਾਸ਼ਕ ਜ਼ਹਿਰਾਂ ਤੋਂ ਮੁਕਤ ਕਰਨ ਦੇ ਨਾਲ-ਨਾਲ ਨਵੇਂ ਢੰਗ ਦੇ ਜ਼ਹਿਰ 'ਜੈਨੇਟਿਕ ਇੰਜੀਨੀਅਰਿੰਗ' ਨਾਲ ਤਿਆਰ ਕੀਤੇ ਗਏ ਬੀਜਾਂ ਦੇ ਜ਼ਹਿਰ ਤੋਂ ਵੀ ਖੇਤਾਂ ਨੂੰ ਮੁਕਤ ਰੱਖਣ ਲਈ ਵਚਨਬੱਧ ਹਨ। ਜੈਨੇਟੀਕਲੀ ਮੋਡੀਫਾਈਡ ਯਾਨੀ ਜੀ.ਐੱਮ. ਜਾਂ ਬੀ.ਟੀ ਬੀਜ ਪੂਰੀ ਤਰ੍ਹਾਂ ਗੁਲਾਮੀ ਤੇ ਵਿਨਾਸ਼ ਦੇ ਬੀਜ ਹਨ। ਪੂਰੀ ਦੁਨੀਆਂ 'ਚ ਕੁਦਰਤ ਤੇ ਲੋਕ ਪੱਖੀ ਜਥੇਬੰਦੀਆਂ ਜੀ.ਐੱਮ. ਫ਼ਸਲਾਂ ਦਾ ਵਿਰੋਧ ਕਰ ਰਹੀਆਂ ਹਨ। ਪੰਜਾਬ 'ਚ ਵੀ ਹੁਣ ਕੁਦਰਤੀ ਖੇਤੀ ਦੀ ਇਸ ਲੋਕ ਲਹਿਰ ਨਾਲ ਜੁੜੇ ਕਿਸਾਨ ਪੰਜਾਬ ਨੂੰ ਜੀ.ਐੱਮ. ਮੁਕਤ ਬਣਾਉਣ ਲਈ ਉਪਰਾਲਾ ਕਰ ਰਹੇ ਹਨ। ਭਾਵੇਂ ਕਿ ਪਿਛਲੇ ਕੁਝ ਸਮੇਂ 'ਚ ਸਰਕਾਰ, ਖੇਤੀਬਾੜੀ ਯੂਨੀਵਰਸਿਟੀ ਅਤੇ ਕੰਪਨੀਆਂ ਦੀ ਸਾਂਝ ਭਿਆਲੀ ਨਾਲ ਬੀ.ਟੀ. ਕਪਾਹ ਦਾ ਭੁਸ ਕਿਸਾਨਾਂ ਨੂੰ ਚੜ੍ਹਾਇਆ ਜਾ ਰਿਹਾ ਹੈ। ਇਹ ਜਨੂੰਨ ਜੋ ਬੀਜਾਂ ਦੀ ਗ਼ੁਲਾਮੀ ਲੈ ਕੇ ਆਵੇਗਾ, ਕੁਦਰਤੀ ਖੇਤੀ ਕਰਨ ਵਾਲੇ ਕਿਸਾਨ ਹੀ ਇਸ 'ਪਾਗਲਪਨ’ ਨੂੰ ਠੱਲ੍ਹ ਪਾਉਣਗੇ।