ਸਲਵਾਨ

ਨਹੀਂ ਨਹੀਂ !

ਕੁੱਝ ਦੋਸ਼ ਨਾ ਉਸ ਦਾ

ਦੋਸ਼ ਤਾਂ ਸਾਡੇ ਭਰਮਾਂ ਦਾ ਹੈ

ਜਾਂ ਫਿਰ ਸਾਡੇ ਧਰਮਾਂ ਦਾ ਹੈ

ਧਰਮ

ਜੋ ਸਾਨੂੰ ਇਹ ਕਹਿੰਦੇ ਨੇ

ਮੰਦਰਾਂ ਦੇ ਵਿਚ ਸੰਖ ਵਜਾਵੋ

ਵੱਟਿਆਂ ਦੇ ਵਿਚ ਸ਼ਰਧਾ ਰੱਖੋ

ਪੱਥਰਾਂ ਅੱਗੇ ਧੂਫ਼ ਧੁਖਾਵੇ

ਪਰ ਜੇ ਮਾਨਵ ਮਰਦਾ ਹੋਵੇ

ਮਰਦੇ ਮੂੰਹ ਵਿਚ ਬੂੰਦ ਨਾ ਪਾਵੋ

ਇਕ ਦੂਜੇ ਦੇ

ਲਹੂਆਂ ਦੇ ਵਿਚ

ਆਪਣੇ ਆਪਣੇ ਹੱਥ ਡੁਬਾਵੋ

ਆਉਂਦੇ ਮਾਨਵ ਜੋਗਾ ਰਲਕੇ

 ਖੇਤੀ ਰੱਜ ਕੇ ਕੋਝ ਉਗਾਵੋ

ਤਵਾਰੀਖ਼ ਦੀ ਛਾਤੀ ਉੱਤੇ

ਰੰਗਾਂ ਵਾਲੇ ਨਾਗ ਲੜਾਵੋ

ਸਮਿਆਂ ਦੇ ਸ਼ਮਸ਼ਾਨਘਾਟ 'ਤੇ

ਆਪਣੀ ਆਪਣੀ ਮੜ੍ਹੀ ਬਣਾਵੋ

ਕਿਹੜਾ ਧਰਮ

ਤੇ ਕਿਹੜਾ ਰੰਗ ਹੈ

ਸੰਗਮਰਮਰ ਦੇ ਖੁਤਬੇ ਲਾਵੋ

ਧਰਮ, ਤਾਂ ਮੇਰੇ ਮਿੱਤਰ ਉਹ ਹੈ

 

 

ਜੋ ਨਾ ਲਹੂ ਦਾ ਰੰਗ ਪਛਾਣੇ

ਜੋ ਸਭਨਾਂ ਨੂੰ ਇਕ ਕਰ ਜਾਣੇ

ਮਾਨਵ ਦੀ ਪੀੜਾ ਨੂੰ ਸਮਝੇ

ਮਾਨਵ ਦੀ ਪੀੜਾ ਨੂੰ ਜਾਣੇ

ਅਸੀਂ ਤਾਂ ਸੱਜਣ!