ਸਭ ਸੂਦਰ ਹਾਂ

ਭਿੱਟ-ਅੰਗੇ ਤੇ ਸੁਹਜ-ਵਿਹੂਣੇ

ਵੱਖ ਵੱਖ ਲਹੂਆਂ ਦੇ ਰੰਗ ਲੈ ਕੇ

ਧਰਮਾਂ ਵਿਹੜੇ ਕਰੀਏ ਟੂਣੇ

ਕਰਮ-ਵਿਛੁੰਨੇ ਜਨਮ-ਵਿਹੂਣੇ

ਉੱਤੋਂ ਮਿੱਠੇ ਵਿਚੋਂ ਲੂਣੇ

 

ਕੱਲ੍ਹ ਜੋ ਮਿੱਤਰ

ਦਿਹੁੰ ਮਰਿਆ ਸੀ

ਕੀ ਉਹ ਮੁੜ ਕੇ ਅੱਜ ਮਰ ਸਕਦੈ

ਜਾਂ ਜੋ ਕੱਲ੍ਹ ਨੂੰ ਮਰਨਾ ਹਾਲੇ

ਕਿਸੇ ਵੀ ਹੀਲੇ ਅੱਜ ਮਰ ਸਕਦੈ ?

ਅੱਜ ਦਾ ਦਿਹੁੰ ਤਾਂ

ਸੱਜਣ ਮੇਰੇ

ਅੱਜ ਚੜ੍ਹ ਸਕਦੈ, ਅੱਜ ਮਰ ਸਕਦੈ

ਬੀਤੇ ਜਨਮਾਂ ਦੇ ਕਰਮਾਂ ਦਾ

ਦੋਸ਼ ਕਿਸੇ ਸਿਰ

ਕਿੰਜ ਚੜ੍ਹ ਸਕਦੈ

ਜੋ ਮਰਿਆ

ਸੋ ਮਰ ਚੁੱਕਾਹੈ

ਜੋ ਜਿਊਂਦਾ ਸੋ ਮਰ ਜਾਵੇਗਾ

ਜਾਂ ਜੋ ਜੰਮਣਾ ਵੀ ਹੈ ਹਾਲੇ

ਉਹ ਵੀ ਸੂਰਜ ਠਰ ਜਾਵੇਗਾ

ਭੂਤ, ਭਵਿੱਖ ਦਾ ਨਾਗ ਨਾ ਸੰਭਵ

ਅੱਜ ਦੀ ਧੁੱਪ ਨੂੰ

ਲੜ ਜਾਵੇਗਾ

 

ਵਰਮਨ

ਮੰਨਦਾਂ, ਧੁੱਪ ਨੂੰ ਨਾਗ ਨਾ ਲੜਸੀ

ਅੱਜ ਦਾ ਦਿਹੁੰ ਨਾ

ਉਸ ਤੋਂ ਮਰ ਸੀ