੮

ਸਰਦਾਰ ਹਰੀ ਸਿੰਘ ਨਲੂਆ ਦੀ ਬੰਸ ਅਤੇ ਅੰਸ

ਸਰਦਾਰ ਬਿਸ਼ਨ ਸਿੰਘ ਉੱਪਲ, ਸਰਦਾਰ ਚੜ੍ਹਤ ਸਿੰਘ ਜਿਸ ਨੇ ਮਿਸਲ ਸ਼ੁਕਰਚੱਕੀਆ ਸਥਾਪਿਤ ਕੀਤੀ ਦਾ ਹਮ-ਰਕਾਬ ਸੀ। ਇਹਨਾਂ ਦੇ ਪੁਰਖੇ ਨਗਰ ਮਜੀਠਾ, ਜਿਲ੍ਹਾ ਅੰਮ੍ਰਿਤਸਰ ਦੇ ਵਸਨੀਕ ਅਤੇ ਉੱਪਲ ਖੱਤਰੀ ਸਨ। ਬਿਸ਼ਨ ਸਿੰਘ ਦਾ ਮੇਲ ਬਾਬਾ ਨੌਧ ਸਿੰਘ ਨਾਲ ਬਹੁਤ ਸੀ। ਨੌਧ ਸਿੰਘ ਦੀ ਸ਼ਾਦੀ ਭਾਈ ਗੁਲਾਬ ਸਿੰਘ ਸ਼ੇਰਗਿੱਲ ਦੀ ਲੜਕੀ ਬੀਬੀ ਲਾਲੀ (ਲਾਲ ਕੌਰ) ਨਾਲ ੧੭੨੬ ਵਿੱਚ ਹੋਈ ਸੀ। ਗੁਲਾਬ ਸਿੰਘ ਦਾ ਸੰਬੰਧ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਨਾਲ ਬਹੁਤ ਸੀ। ਇਹ ਇਲਾਕੇ ਮਜੀਠੇ ਦਾ ਇੱਕ ਨਾਮੀ ਵਿਅਕਤੀ ਸੀ ਅਤੇ ਗੁਰੂ ਸਾਹਿਬ ਨਾਲ ਮਿਲਾਪ ਕਰ ਕੇ ਸਿੱਖੀ ਦੀ ਪਾਣ ਚੜ੍ਹੀ ਹੋਈ ਸੀ। ਬਾਬਾ ਨੌਧ ਸਿੰਘ ਸ਼ੁਕਰਚੱਕੀਏ ਨੇ ਨਵਾਬ ਕਪੂਰ ਸਿੰਘ ਦੀ ਨਸੀਹਤ ਤੇ ਅੰਮ੍ਰਿਤਪਾਨ ਕੀਤਾ ਸੀ। ਸਿੱਖੀ ਦੇ ਰੰਗ ਕਾਰਨ ਸਰਦਾਰ ਬਿਸ਼ਨ ਸਿੰਘ ਨੇ ਮੁਗਲਾਂ ਨਾਲ ਕਈ ਯੁੱਧ ਕੀਤੇ। ਸੰਨ ੧੭੬੨ ਨੂੰ ਕੁੱਪ-ਰਹੀੜਾ (ਜਿਲ੍ਹਾ ਸੰਗਰੂਰ) ਵਿਖੇ ਇਹ ਸਿੱਖਾਂ ਦੇ ਵੱਡੇ ਪਹਿਲੇ ਘੱਲੂਘਾਰੇ ਵਿੱਚ ਬਹਾਦਰੀ ਨਾਲ ਜੂਝਦੇ ਗੋਲੀਆਂ ਲੱਗਣ ਕਾਰਨ ਸ਼ਹੀਦ ਹੋ ਗਏ ਸਨ।