ਹਰੀ ਸਿੰਘ ਬੀਰ ਕੋ, ਕਹਯੋ ਨਰੇਸ਼ ਬੈਠ ਕੇ,
ਪਿਸ਼ੌਰ ਦੇਸ਼ ਜਾਇ ਕੇ, ਹਮਾਰਾ ਕਾਮ ਕੀਜੀਏ।
ਆਬਾਦਾਨੀ ਕੀਜੈ ਸਭ, ਦੇਸ ਕੋ ਵਸਾਇ ਦੀਜੈ।
ਕੀਤੈ ਬਾਤ ਸੋਈ ਜਿਮ, ਕੋਊ ਨ ਦੁਖੀਜੀਐ।
੫) ਕਾਨ੍ਹ ਸਿੰਘ ਬੰਗਾ ਇਹ ਜੰਗ ਨਾਮਾ ਸਰਦਾਰ ਹਰੀ ਸਿੰਘ ਪਟਿਆਲੇ ਵਾਲਿਆਂ ਪਾਸ ਸੀ। ਸਰਦਾਰ ਕਰਮ ਸਿੰਘ ਹਿਸਟੋਰੀਅਨ ਨੇ ਇਸ ਦੀ ਨਕਲ ਕੀਤੀ ਸੀ ਪਰ ਛਪੀ ਨਹੀਂ। ਇਸ ਦਾ ਅੰਤਲਾ ਦੋਹਰਾ ਸੀ:
ਹਰੀ ਸਿੰਘ ਮੁਖ ਨਾਮ ਕਹਿ, ਜੋ ਬਾਂਧੇ ਤਲਵਾਰ।
ਤੀਨ ਲੋਕ ਜੀਵਤ ਫਿਰੈ, ਕੋਊ ਨਾ ਸਕੇ ਹੈ ਟਾਰ।
੬) ਮਿਸਰ ਹਰੀ ਚੰਦ ਉਰਫ ਕਾਦਰਯਾਰ-ਪ੍ਰੋਫੈਸਰ ਪਿਆਰਾ ਸਿੰਘ ਪਦਮ ਦੀ ਖੋਜ ਦਰਸਾਂਉਂਦੀ ਹੈ ਕਿ ਇਹ ਮਿਸਰ ਬੇਲੀ ਰਾਮ ਦੇ ਖ਼ਾਨਦਾਨ ਵਿੱਚ ਵੀਹਵੀਂ ਸਦੀ ਵਿੱਚ ਹੋਇਆ। ਪ੍ਰੋਫੈਸਰ ਸੀਤਾ ਰਾਮ ਕੋਹਲੀ ਨੂੰ ਲਾਹੌਰ ਵਿਖੇ ਮਿਲਦਾ ਰਹਿੰਦਾ ਸੀ। ਇਸ ਨੇ ਕਾਦਰਯਾਰ ਦੀ ਸ਼ੀਹਰਫੀ ਤੋਂ ਪ੍ਰਭਾਵਤ ਹੋ ਕੇ ਹਰੀ ਸਿੰਘ ਦੇ ਜੰਗ-ਨਾਮੇ ਦਾ ਬ੍ਰਿਤਾਂਤ ੬ ਸ਼ੀਹਰਫੀਆਂ ਵਿੱਚ ਲਿਖਿਆ ਪਰ ਨਾਮ ਆਪਣੇ ਤਖੱਲਸ਼ ਵਾਲਾ ਕਾਦਰਯਾਰ ਵਰਤਿਆ। ਇਸ ਦੀਆਂ ਸ਼ੀਹਰਫੀਆਂ ੧੯੨੪ ਵਿੱਚ ਮਨੋਹਰ ਪ੍ਰੈਸ ਸਰਗੋਧਾ ਨੇ ਛਾਪੀਆਂ ਸਨ। ਅਤੇ ੧੯੬੪ ਵਿੱਚ ਪੰਜਾਬੀ ਯੂਨੀਵਰਸਿਟੀ ਨੇ ਪ੍ਰਕਾਸ਼ਿਤ ਕੀਤਾ ਸੀ।
ਨਮੂਨੇ ਲਈ ਬੈਂਤ ਹੈ:
ਨੂਨ ਨਿਕਲ ਚਲ ਘੋੜਿਆ ਕਿਲ੍ਹੇ ਦੇ ਵੱਲ, ਅਸਾਂ ਪਾਵਣਾ ਨਹੀਂ ਦੂਜੀ ਵਾਰ ਫੇਰਾ।
ਗੋਲੀ ਲੱਗੀ ਹੈ ਕਹਿਰ ਕਲੇਰ ਵਾਲੀ, ਘਾਇਲ ਹੋਯਾ ਹੈ ਅੱਜ ਅਸਵਾਰ ਤੇਰਾ।
ਮੇਰੇ ਬਾਂਕਿਆ ਛੈਲ ਛਬੀਲਿਆ ਉਏ, ਹੈ ਤੂੰ ਸੈਆਂ ਮੈਦਾਨਾਂ ਦਾ ਯਾਰ ਮੇਰਾ।
ਕਾਦਰਯਾਰ ਜੇ ਲੈ ਚੱਲੇ ਅੱਜ ਡੇਰੇ, ਤੇਰਾ ਕਦੇ ਨਾ ਭੁੱਲ ਸੀ ਪਿਆਰ ਸ਼ੇਰਾ।
(ਤੀਜੀ ਸੀਹਰਫੀ)
੭) ਕਾਦਰਯਾਰ -ਇਹ ਮਾਛੀ ਕੇ ਜਿਲ੍ਹਾ ਗੁਜਰਾਂਵਾਲੇ ਦਾ ਸੰਧੂ ਜੱਟ ਸੀ। ਇਸ ਨੇ ਕਈ ਕਿੱਸੇ ਲਿਖੇ ਹਨ। ਇਸ ਦਾ ਲਿਖਿਆ ਸਰਦਾਰ ਹਰੀ ਸਿੰਘ ਦੀ ਬਹਾਦਰੀ ਦਾ ਕਿੱਸਾ 'ਸਰਦਾਰ ਹਰੀ ਸਿੰਘ' ੩੦ ਬੈਂਤਾਂ ਵਿੱਚ ਦਿਲ ਟੁੰਬਣ ਵਾਲਾ ਹੈ, ਜੈਸੇ:
