ਧਰਮ

ਮਾਂ ਦਿਨ, ਸਮਾਂ ਵਿਚਾਰਦੀ

ਧੀ ਅਕਸਰ ਚੋਰੀ ਜੇਹੇ ਕੇਸੀ ਨਹਾ ਲੈਂਦੀ

ਮਾਂ ਨੂੰ ਫਿਰ ਵੀ ਪਤਾ ਲੱਗ ਜਾਂਦਾ

ਆਖਦੀ, "ਹੁਣ ਨਾ ਨਹਾਈ ਅੱਗੇ ਤੋਂ ਵਾਰ ਨੂੰ”

ਧੀ ਮਾਂ ਦਾ ਦਿਲ ਰੱਖਣ ਲਈ ਆਖਦੀ

ਕਿ ਹਾਂ ਬੱਸ ਅੱਗੇ ਤੋਂ ਨਹੀਂ ਨਹਾਉਂਦੀ

ਧੀ ਨੂੰ ਪਤਾ ਏਹ ਵਹਿਮ ਭਰਮ ਨੇ

ਪਰ ਭਲਾਂ ਮਾਂ ਦਾ ਦਿਲ ਰੱਖਣ

ਲਈ ਕੋਈ ਕੀ ਨਹੀਂ ਕਰਦਾ? "

ਜੰਡ ਵਾਲੇ ਬਾਬੇ ਦੇ ਮੱਥਾ ਟੇਕਣ ਜਾਂਦੀ ਮਾਂ

ਪੁੱਤ ਨੂੰ ਵੀ ਜਾਣ ਨੂੰ ਆਖਦੀ

ਪੁੱਤ ਆਵਦੇ ਅਗਾਂਹਵਧੂ ਵਿਚਾਰਾਂ ਨਾਲ ਘੁਲਦਾ

ਮੋਟਰਸਾਇਕਲ ਸਟਾਰਟ ਕਰਦਾ

ਤੇ ਜੰਡ ਮੱਥਾ ਟੇਕਦਾ ਆਉਂਦਾ

ਉਹਨੂੰ ਪਤਾ ਮਾਂ ਨੇ ਕੁੱਖ ਹਰੀ ਕਰਨ ਲਈ

ਇੱਥੇ ਹੀ ਮੱਥੇ ਰਗੜੇ ਸੀ

ਓਹ ਮਾਂ ਦੀ ਸ਼ਰਧਾ ਨੂੰ ਸਿਰ ਝੁਕਾਉਂਦਾ,

ਮਾਂ ਨਾਸਤਿਕ ਬਾਪੂ ਨਾਲ

ਕਦੇ ਕਦੇ ਬਹਿਸਦੀ

ਪਰ ਉਸਨੂੰ ਇਹ ਬਹੁਤ ਚੰਗਾ ਲੱਗਦਾ

ਜਦ ਕਦੀ ਉਹ ਪਾਠ ਕਰਦੀ

ਤਾਂ ਬਾਪੂ ਟੀ.ਵੀ. ਬੰਦ ਕਰ ਦਿੰਦਾ

ਤੇ

ਮਾਂ ਦਾ ਪਾਠ ਧਿਆਨ ਨਾਲ ਸੁਣਦਾ

ਹੋਰ ਭਲਾ ਔਰਤ ਕੀ ਭਾਲਦੀ ਏ...