ਵਡੱਪਣ

ਜ਼ਿੰਦਗੀ ਨਿਰੰਤਰ ਚੱਲ ਰਹੀ ਸੀ

ਪਰ ਜਦ ਦਾ ਤੂੰ ਜ਼ਿੰਦਗੀ 'ਚ ਆਇਆ

ਜ਼ਿੰਦਗੀ ਜਸ਼ਨ ਬਣ ਗਈ

ਜ਼ਿੰਦਗੀ ਦੇ ਪੈਰ 'ਚ ਬਿੰਦੀ ਦੀ ਝਾਂਜਰ ਪੈ ਗਈ

ਏਹ ਜ਼ਿੰਦਗੀ ਬੁੱਲੇ ਸ਼ਾਹ ਵਾਂਗ ਨੱਚਣ ਲੱਗੀ

ਬਿੰਦੀ ਵੀ ਕਿੰਨਾ ਬਦਲਾਅ ਲੈ ਆਉਂਦੀ ਏ

ਜਿਵੇਂ ਔਰਤ ਦੇ ਮੱਥੇ 'ਤੇ ਬਿੰਦੀ ਲਗਾਉਣ ਨਾਲ

ਓਹਦੇ ਚੇਹਰੇ ਦੀ ਚਮਕ ਆਪ ਮੁਹਾਰੇ ਬੋਲਦੀ ਏ

ਤੂੰ ਜ਼ਿੰਦਗੀ ਨੂੰ ਅਰਥ ਦਿੱਤੇ

ਮੈਂ ਅੱਜ ਜੋ ਵੀ ਹਾਂ ਤੇਰੇ ਕਰਕੇ ਹਾਂ

ਤੇਰੇ ਦਿੱਤੇ ਹੌਂਸਲਿਆਂ ਨਾਲ ਹਾਂ

 

ਪਰ ਹਾਂ, ਮੈਂ ਸਵਾਰਥੀ ਹੋ ਜਾਂਦੀ ਹਾਂ ਕਦੀ ਕਦੀ

ਤੂੰ ਥੱਕ ਜਾਨਾ ਪਰ ਮੈਂ ਤੁਰਦੀ ਰਹਿੰਦੀ ਹਾਂ

ਤੈਨੂੰ ਹਮੇਸ਼ਾ ਉਮੀਦ ਹੁੰਦੀ ਏ

ਕਿ ਮੈਂ ਮੁੜ ਕੇ ਜ਼ਰੂਰ ਦੇਖਾਂਗੀ

ਆਖਰ ਨੂੰ ਤੇਰੀ ਉਮੀਦ ਜਿੱਤਦੀ ਏ

ਤੇ ਅਗਲੇ ਹੀ ਪਲ ਮੈਂ ਵਾਪਸ ਮੁੜ ਆਉਂਦੀ ਹਾਂ

ਤੂੰ ਹਰ ਵਾਰੀ ਮੁਆਫ਼ ਕਰ ਦਿੰਦਾ ਏ

ਏਹ ਤੇਰਾ ਵਡੱਪਣ ਹੀ ਤਾਂ ਹੈ

ਐਨੀ ਮੁਹੱਬਤ ਲਈ ਸ਼ੁਕਰੀਆ ਤੇਰਾ !