ਹੱਥਾਂ ਦੀ ਕਿੱਕਲੀ
ਜਿੱਦ ਦੀ ਗੱਲ ਨਹੀਂ
ਜ਼ਿੰਦਗੀ ਜਿਉਣਾ ਚਾਹੁੰਦੀ ਹਾਂ
ਤੇ ਹਾਂ ਸੱਚ, ਓਹ ਵਖ਼ਤ ਵੀ ਹੰਢਾਉਣਾ ਚਾਹੁੰਦੀ
ਜਦ ਤੂੰ ਮੇਰੇ ਝੁਰੜੀਆਂ ਭਰੇ ਹੱਥਾਂ ਨੂੰ
ਪਲੋਸਦਾ ਪੁੱਛੇ,
"ਅਗਲੇ ਜਨਮ 'ਚ ਕੀ ਬਣ ਮਿਲੇਗੀ"
ਮੈਂ ਸਹਿਜੇ ਹੀ ਆਖ ਦੇਵਾਂ ਕਿ
ਤੇਰੀ ਜਨਨੀ ਦੇ ਰੂਪ 'ਚ ਮਿਲਾਂਗੀ
ਤੂੰ ਫਿਰ ਅਚੰਭੇ ਨਾਲ ਪੁੱਛੇ, "ਮੇਰੀ ਮਾਂ?
ਏਹੀ ਰਿਸ਼ਤਾ ਚੁਣਿਆ ?"
ਮੈਂ ਲੰਮਾ ਸਾਹ ਖਿੱਚ ਆਖਾਂ,
"ਅਸਲ ਮੁਹੱਬਤ ਮਾਂ ਦੇ ਢਿੱਡੋਂ ਜਨਮ ਲੈਂਦੀ
ਤੇ ਰਹਿੰਦੀ ਉਮਰ ਤੱਕ ਪਲਦੀ ਏ
ਮਾਂ ਤੋਂ ਵੱਧ ਕੌਣ ਦਿਲਾਂ ਦੀਆਂ ਜਾਣ ਸਕਦੈ
ਮਾਂ ਦੀ ਮਮਤਾ ਲੱਖ ਗੁਣਾਂ ਉੱਚੀ ਸੁੱਚੀ ਏ"
ਤੂੰ ਮੇਰੀਆਂ ਗੱਲਾਂ ਦੀਆਂ ਹਾਮੀਆਂ ਭਰਦਾ ਹੱਥਾਂ
ਦੀ ਕਿੱਕਲੀ 'ਚ ਹੋਰ ਕਸਾਅ ਭਰ ਦੇਵੇਂ
ਬੱਸ ਇੰਝ ਹੀ ਤੇਰੇ ਅਹਿਸਾਸ ਨਾਲ
ਜਿਉਣਾ ਚਾਹੁੰਦੀ ਹਾਂ.......
