'ਕਵਿ-ਰੰਗ' ਸੁੰਦਰਤਾ।

ਅਰਥਾਤ ਉਹ ਉੱਚ ਸੁੰਦਰਤਾ ਦੀ ਪ੍ਰਤੀਤੀ ਜਿਸ ਦੇ ਆਵੇਸ਼ ਵਿਚ ਕਵੀ ਤੇ ਉੱਚ ਕਾਵ੍ਯ ਪ੍ਰਕਾਸਦਾ ਹੈ

 

ਕਵਿਤਾ ਦੀ ਸੁੰਦਰਤਾਈ

ਉੱਚੇ ਨਛੱਤ੍ਰੀ ਵਸਦੀ,

ਅਪਣੇ ਸੰਗੀਤ ਲਹਿਰੇ

ਅਪਣੇ ਪ੍ਰਕਾਸ਼ ਲਸਦੀ,

ਇਕ ਸ਼ਾਮ ਨੂੰ ਏ ਓਥੋ

ਹੇਠਾਂ ਪਲਮਦੀ ਆਈ,

ਰਸ ਰੰਗ ਨਾਲ ਕੰਬਦੀ

ਸੰਗੀਤ ਥਰਥਰਾਈ.-

ਜਿਉਂ ਤ੍ਰੇਲ ਤਾਰ ਪ੍ਰੋਤੀ,

ਜਿਉਂ ਆਬ ਮੋਤੀਆਂ ਦੀ

ਨਜ਼ਰਾਂ ਦੀ ਤਾਰ ਪ੍ਰੋਤੀ,

ਨਾਜ਼ਕ, ਸੁਬਕ ਸੁਹਾਈ,

ਕੋਮਲ ਗਲੇ ਦੀ ਸੁਰ ਜਿਉਂ,

ਝੁਨਕਾਰ ਸਾਜ਼ ਦੀ ਜਿਉਂ,

ਝਰਨਾਟ ਰੂਪ ਵਾਲੀ

ਤਾਰੇ ਡਲ੍ਹਕ ਜਿਉਂ ਛਾਈ।