ਹੈਂ !

ਧੂਪ? ਧੁਖ ਧੁਖ ਕੇ ਹਿਸ ਚੁੱਕੀ,

ਜੋਤਾਂ ਬਲ ਬਲ, ਪੀ ਪੀ ਕੇ ਘਿਉ

ਸੌਂ ਚੁਕੀਆਂ ਹਨ, ਬੁਝ ਗਈਆਂ।

ਹੈਂ !

ਚੰਦਨਬੂਰ ਤੇ ਮੁਸ਼ਕ ਕਾਫੂਰ

ਗਏ ਆਪੇ ਤੇ ਦੁਇ ਹਨ ਖੇਡ।

ਹਨ ਅਤਰ ਅੰਬੀਰ ਉਡ ਚੁੱਕੇ।

ਸਾਰੀ ਆਰਤੀ ਹੀ ਹੋ ਚੁੱਕੀ!

ਹੋ ਚੁੱਕੀ?

ਮੇਰੇ ਕੀਤੇ ਬਿਨਾ ਹੋ ਹੋ ਮੁੱਕੀ?

ਸਚਮੁਚ, ਮੈਂ ਸਾਂਈਆਂ ਜੀ ਪਿਆਰੇ!

ਮੇਰੀ ਆਰਤੀ ਹੈ ਹੋ ਚੁੱਕੀ?

ਕੌਣ ਆਇਆ ਤੇ ਕਰ ਗਿਆ ਕੌਣ?

ਕੁੰਡਾ ਮੰਮਟੀ ਦਾ ਵੱਜਾ ਹੈ ਪਿਆ,

ਕੌਣ ਸਕਦਾ ਏ ਤੁਸਾਂ ਬਿਨ ਆਇ,

ਨਾ ਹੇਠੋਂ ਨਾ ਉੱਤੋਂ, ਨਾਂ ਵਿਚੋਂ ਵਿਚਾਲ?

ਹਾਏ ਇਕ ਨੈਣ ਝਮੱਕੇ ਮੈਂ ਵਿਚ

ਅੱਖ-ਫਰਕਣੀ ਮੇਰੀ ਦੇ ਅੰਦਰ

ਤੁਸੀਂ ਆਏ ਤੇ ਆਰਤੀ ਆਪ

ਹੋ ਹੋ ਸਦਕੜੇ ਤੁਸਾਂ ਤੋਂ ਗਈ।

ਤੁਸੀਂ ਆਏ ਤੇ ਲੰਘ ਬੀ ਗਏ

ਇਕ ਅੱਖ-ਝਮੱਕੇ ਵਿਚਕਾਰ।

ਮੱਸੇ ਕਿਵੇਂ ਤਰਸੇਂਦਿਆਂ ਆਏ

ਤੁਸੀਂ ਆਏ ਤੇ ਲੰਘ ਬੀ ਗਏ!