ਹਰੇਕ ਦਿਖਾਵਾ ਕਰਦੈ... ਕਿੰਨਾ ਸੁਹਣੇ ਪਰਿਵਾਰ ਤੇ ਪਰਿਵਾਰ ਦਾ ਰਿਸ਼ਤਾ। ਹਰੇਕ ਅੰਗਰੇਜ਼ ਹੋਣ ਦਾ ਦਿਖਾਵਾ ਕਰੀ ਜਾਂਦੇ।

ਅੱਠਵੀਂ ਹੈ ਡੀ.ਐਚ. ਲਾਰੰਸ ਦੀ ਕਿਤਾਬ। ਇਸ ਕਿਤਾਬ ਬਾਰੇ ਕਈ ਵਾਰ ਗੱਲ ਕਰਨ ਲਈ ਸੋਚਿਆ ਪਰ ਡਰ ਗਿਆ, ਪਤਾ ਨਹੀਂ ਮੇਰਾ ਉਚਾਰਣ ਸਹੀ ਹੈ ਕਿ ਗਲਤ। ਬਈ ਹੱਸਿਓ ਨਾਂਹ। ਸਾਰੀ ਉਮਰ ਮੈਂPHOENIX ਨੂੰ ਫੌਨਿਕਸ ਕਹਿੰਦਾ ਰਿਹਾ ਕਿਉਂਕਿ ਇਹੋ ਪੜ੍ਹਿਆ ਜਾਂਦੈ। ਅੱਜ ਸਵੇਰੇ ਗੁਡੀਆ ਨੂੰ ਪੁੱਛਿਆ- ਗੁਡੀਆ ਮੇਰੇ ਤੇ ਉਪਕਾਰ ਕਰ। ਉਹ ਉਪਕਾਰ ਕਰਿਆ ਨਹੀਂ ਕਰਦੀ ਪਰ ਮੇਰੇ ਤੇ ਰਹਿਮ ਕਕੇ ਦੱਸਿਆ- ਫੀਨਿਕਸ।

ਓ ਰੱਬਾ, ਮੈਂ ਕਿਹਾ- ਫੀਨਿਕਸ? ਸਾਰੀ ਉਮਰ ਫੋਨਿਕਸ ਕਹਿੰਦਾ ਰਿਹਾ। ਇਹ ਮੇਰੀ ਅੱਠਵੀਂ ਕਿਤਾਬ ਹੈ ਫੀਨਿਕਸ। ਠੀਕ ਹੈ, ਅੰਗਰੇਜ਼ ਲੱਗਾਂ, ਮੈਂ ਵੀ ਫੀਨਿਕਸ ਕਹਿ ਦਿੰਨਾ। ਫੀਨਿਕਸ। ਅਦਭੁਤ ਕਿਤਾਬ ਹੈ, ਦਹਾਕਿਆਂ ਵਿਚ, ਸਦੀਆਂ ਵਿਚ ਜਿਹੜੀ ਇਕ ਵਾਰ ਲਿਖੀ ਜਾਇਆ ਕਰਦੀ ਹੈ ਉਹ ਹੈ ਇਹ ਕਿਤਾਬ।

ਨੌਵੀਂ ਕਿਤਾਬ ਵੀਡੀ.ਐਚ. ਲਾਰੰਸ ਦੀ ਹੈ। ਫੀਨਿਕਸ ਵਧੀਐ, ਸੁਹਣੀ ਹੈ ਪਰ ਮੇਰੀ ਆਖਰੀ ਪਸੰਦ ਨਹੀਂ ਉਹ। ਮੇਰੀ ਅੰਤਿਮ ਚੌਣ ਉਸ ਦੀ ਕਿਤਾਬ ਮਨੋਵਿਸ਼ਲੇਸ਼ਣ ਅਤੇ ਅਵਚੇਤਨ ਹੈ PSYCHOANALYSIS AND THE UNCONSCIOUS. ਇਹ ਹੈ ਪੜ੍ਹਨ ਯੋਗ ਕਿਤਾਬ ਜਿਹੜੀ ਘਟ ਪੜ੍ਹੀ ਗਈ। ਹੁਣ ਇਸ ਕਿਤਾਬ ਨੂੰ ਕੌਣ ਪੜ੍ਹੇ? ਜਿਹੜੇ ਲੋਕ ਨਾਵਲ ਪੜ੍ਹਨ ਦੇ ਆਦੀ ਹਨ ਉਹ ਨਹੀਂ ਪੜ੍ਹਨਗੇ, ਜਿਹੜੇ ਮਨੋਵਿਸ਼ਲੇਸ਼ਣ ਦੀਆਂ ਕਿਤਾਬਾਂ ਪੜ੍ਹਦੇ ਹਨ ਉਹ ਨਹੀਂ ਪੜ੍ਹਨਗੇ ਕਿਉਂਕਿ ਲਾਰੰਸ ਨੂੰ ਉਹ ਮਨੋਵਿਗਿਆਨੀ ਨਹੀਂ ਸਮਝਦੇ। ਪਰ ਮੈਂ ਪੜ੍ਹਿਆ ਕਰਦਾਂ। ਨਾ ਮੈਂ ਨਾਵਲਿਸਟਾਂ ਦਾ ਫੈਨ ਹਾਂ ਨਾ ਮਨੋਵਿਗਿਆਨੀਆਂ ਦਾ ਸ਼ੰਦਾਈ। ਮੈਂ ਦੋਹਾਂ ਪਾਸਿਉਂ ਮੁਕਤ ਹਾਂ, ਪੂਰਨ ਆਜ਼ਾਦ। ਮੈਨੂੰ ਚੰਗੀ ਲਗਦੀ ਹੈ ਕਿਤਾਬ।

ਮੇਰੀਆਂ ਅੱਖਾਂ ਤ੍ਰੇਲਤੁਪਕੇ ਚੁਗਣ ਲਗ ਪਈਆਂ। ਭਾਈ ਵਿਘਨ ਨਾ ਪਾਉ।

ਮਨੋਵਿਸ਼ਲੇਸ਼ਣ ਅਤੇ ਅਵਚੇਤਨ ਮੇਰੀਆਂ ਸਭ ਤੋਂ ਵਧੀਕ ਮਨਭਾਉਂਦੀਆਂ ਕਿਤਾਬਾਂ ਵਿਚੋਂ ਰਹੀ ਹੈ ਤੇ ਰਹੇਗੀ। ਹੁਣ ਮੈਂ ਪੜ੍ਹਨਾ ਛਡ ਰਖਿਐ, ਪਰ ਜੇ ਕਿਤੇ ਦੁਬਾਰਾ ਸ਼ੁਰੂ ਕਰਾਂ ਤਾਂ ਇਸ ਕਿਤਾਬ ਨੂੰ ਸਭ ਤੋਂ ਪਹਿਲਾਂ ਪੜ੍ਹਾਂ। ਵੇਦਾਂ ਨੂੰ, ਬਾਈਬਲ ਨੂੰ ਨਹੀਂ, ਮਨੋਵਿਸ਼ਲੇਸ਼ਣ ਅਤੇ ਅਵਚੇਤਨ ਨੂੰ। ਤੇ ਤੁਹਾਨੂੰ ਪਤੈ ਕਿਤਾਬ ਮਨੋਵਿਸ਼ਲੇਸ਼ਣ ਦੇ ਖਿਲਾਫ ਐ।