ਮਾਂ ਦੀ ਕੁੱਖ ਵਿੱਚ/ ਦਿਨ ਤੋਂ ਪਹਿਲਾਂ

ਸਾਹ ਤੋਂ ਬਿਨਾ ਵੀ/ ਜੀਂਦਾ ਸੈਂ ਤੂੰ ਭਰੂਣ ਰੂਪ ਵਿੱਚ

ਉਸਤੋਂ ਪਹਿਲਾਂ ਜੀਂਦਾ ਸੈਂ ਅੰਡੇ ਦੀ ਸਕੇਲ

ਉਦੂੰ ਪਹਿਲਾਂ ਮਾਂ ਦੇ ਪਿੰਡੇ ਅੰਦਰ ਪਸਰੇ

ਮਾਸ ਦੇ ਅਣੂਆਂ ਵਿੱਚ ਜੀਂਦਾ ।........

ਮਾਂ ਦੇ ਪਿੰਡੇ ਕਿਸੇ ਰੂਪ ਵਿੱਚ ਐਵੇਂ ਪਹਿਲਾਂ

ਆਲ ਦੁਆਲੇ ਦੀ ਸ੍ਰਿਸ਼ਟੀ ਵਿੱਚ ਜੀਂਦਾ ਮੈਂ ਤੂੰ

ਸਿਰਫ਼ ਅਸੀਂ ਨਹੀਂ ਸਾਂ ਤੱਕ ਸਕਦੇ.....

ਆਪਣੀ ਮਾਂ ਦੀ ਕੁੱਖ ਦੇ ਨਿੱਜ ਵਿੱਚ

ਹੁਣ ਤੂੰ ਨਹੀਂ

ਪਰ ਇਸ ਵਿੱਚ ਸੁੰਦਰ ਬ੍ਰਹਿਮੰਡ ਦੀ

ਜੀਵਨ ਦੇਹੀ ਨਿੱਘੀ ਕੁੱਖ ਵਿਚ

ਤੂੰ ਤੇ ਅਸੀਂ ਹਾਂ

ਕੋਲ ਕੋਲ.......

ਮਾਂ ਦੀ ਕੁੱਖ ਵਿਚ ਆ ਗਿਆ ਸੈਂ ਤੂੰ

ਕੁੱਖੋਂ ਬਾਹਰ ਆਉਣ ਸਮਾਂ

ਨਾ ਆਇਆ ਹਾਲੇ

ਹੁਣ ਜਾਣਿਆ/ ਸਮੇਂ ਤੋਂ ਪਹਿਲਾਂ ਹੀ ਘਟਨਾ ਦਾ ਵਾਪਰ ਜਾਣਾ

ਉਨਾ ਹੀ ਦੁਖਦਾਈ ਹੁੰਦਾ

ਜਿੰਨਾ ਸਮੇਂ ਤੋਂ ਪੱਛੜ ਜਾਣਾ

(ਏਸ ਜਨਮ ਨਾ ਜਨਮੇ)

'ਹੋਣਾ'

ਇਸਨੂੰ ਕਹਿੰਦੇ......?

ਥੱਕ ਗਿਆ ਹਾਂ

ਉਸ ਤੋਂ

ਜੋ ਵੀ ਹਾਂ ਮੈਂ........

ਉਸ ਤੋਂ ਮਗਰੋਂ ਜੋ ਹੋ ਸਕਦਾਂ

ਉਸ ਲਈ ਬੇਚੈਨ ਰਹਾਂਗਾ

'ਹੋਣਾ'

ਇਸ ਹੋਣੀ ਨੂੰ ਕਹਿੰਦੇ......? 

(ਏਸ ਜਨਮ ਨਾ ਜਨਮੇ)