ਉਸ ਹੱਸਦੀ ਨੇ ਸਤਿ ਸ੍ਰੀ ਅਕਾਲ ਬੁਲਾਈ ਅਤੇ ਫਿਰ ਆਪਣੇ ਦਫਤਰ ਨੂੰ ਚਲੀ ਗਈ ।

9

ਮੇਰੇ ਸਟੇਸ਼ਨ ਤੇ ਪੁੱਜਣ ਤੋਂ ਅੱਗੇ ਹੀ ਪਾਲ ਆ ਗਈ ਸੀ। ਮੇਰੀ ਘੜੀ ਦਸਦੀ ਸੀ ਕਿ ਗੱਡੀ ਹਾਲੇ ਅੱਧੇ ਘੰਟੇ ਨੂੰ ਆਵੇਗੀ । ਪਾਲ ਅੱਜ ਜ਼ਿਆਦਾ ਚੁਸਤ ਜਾਪਦੀ ਸੀ ਤੇ ਕਹਿਣ ਲੱਗੀ, 'ਤੁਸੀਂ ਵੀ ਮੌਕੇ ਸਿਰ ਆ ਗਏ।'

'ਹਜੂਰ ਦੇ ਹੁਕਮ ਦੀ ਪਾਲਣਾ ਜ਼ਰੂਰੀ ਸੀ ।'

'ਬਲਬੀਰ! ਤੁਸੀਂ ਮੈਨੂੰ ਮਖੌਲ ਨਾ ਕਰਿਆ ਕਰੋ।'

'ਆਖ਼ਰ ਹੋਰ ਕਿਸ ਨੂੰ ਮਖੌਲ ਕਰਾਂ ? ਸਾਰੀ ਦੁਨੀਆ ਛੱਡ ਇਕ ਤੁਹਾਨੂੰ ਅਪਣਾ ਲਿਆ ਹੈ। ਤੁਸੀਂ ਵੀ ਆਖਦੇ ਹੋ, ਤੁਹਾਡੇ ਨਾਲ ਆਪਣੇ ਵਲਵਲੇ ਸਾਂਝੇ ਨਾ ਕਰਾਂ।

'ਅਸਲ ਗੱਲ ਹੋਰ ਹੈ। ਦਿਲ ਤੁਹਾਡੀ ਗੱਲ ਬਾਤ ਨਾਲ ਬਹੁਤ ਖੁਸ਼ ਹੁੰਦਾ ਹੈ, ਪਰ ਉਤੋਂ ਚਿੜ੍ਹ ਕੇ ਰੋਸ ਪ੍ਰਗਟ ਕਰਦੀ ਹਾਂ।'

'ਤਦ ਪਤਾ ਲਗਾ ਕਿ ਇਸਤਰੀ ਦੇ ਦਿਲ ਰਖਦੀ ਹੈ। ਇਕ ਅੰਦਰ ਤੇ ਦੂਜਾ ਬਾਹਰ। ਵਾਹ ਓਇ ਮਰਦ ਭੋਲਿਆ! ਤੂੰ ਕੀ ਜਾਣਦਾ ਏਂ ਇਸਤਰੀ ਦਿਲ ਦੀਆਂ ਡੂੰਘਾਣਾਂ।'

'ਕਰੋ ਰੱਜ ਕੇ ਮਖੌਲ। ਜੇ ਮੈਂ ਤੁਹਾਡੇ ਜਿੰਨਾ ਪੜ੍ਹੀ ਹੁੰਦੀ, ਮੈਂ ਵੀ ਤੁਹਾਨੂੰ ਖੂਬ ਬੁਧੂ ਬਣਾਉਂਦੀ।

'ਕੀ ਮਖੌਲ ਕਰਨ ਲਈ ਵੀ ਕੋਈ ਪੜ੍ਹਾਈ ਕਰਨੀ ਪੈਂਦੀ ਹੈ। ਇਸਤਰੀ ਤੇ ਅਨਪੜ੍ਹ ਹੀ ਇਕ ਕਿਆਮਤ ਹੈ। ਉਸ ਦੇ ਕੁਦਰਤੀ ਤੇ ਅਦਾਵਾਂ ਭਰੇ ਅੰਗ, ਜੁਆਲਾ ਵਰਗਾ ਜੋਸ਼ੀਲਾ ਹੁਸਨ ਤੇ ਸਾਗਰ ਵਰਗਾ ਲਹਿਰੀ ਜੋਬਨ ਗਭਰੂਆਂ ਦੀ ਅਣਖ ਨੂੰ ਮਿੱਟੀ ਕਰ ਦੇਂਦੇ ਹਨ।

'ਮਰਦ ਕਿਸ ਨੇ ਭੋਲੇ ਬਣਾਏ ਹਨ?

'ਉਸ ਭਗਵਾਨ ਨੇ ਜਿਸ ਨੇ ਇਸਤਰੀ ਨੂੰ ਚੰਚਲਤਾ ਦੀ ਰਾਣੀ ਬਣਾਇਆ।

'ਜਿਸ ਗੱਲ ਦਾ ਪਤਾ ਨਾ ਹੋਵੇ। ਉਸ ਤੇ ਬਹਿਸ ਕਰਨ ਦਾ ਕੀ ਲਾਭ।' 'ਮੈਂ ਤਾਂ ਸਮਝਦੀ ਹਾਂ ਕਿ ਭਗਵਾਨ ਨੂੰ ਪਾ ਲੈਣਾ ਕੋਈ ਔਖਾ ਨਹੀਂ, ਪਰ ਇਸਤਰੀ ਦਿਲ ਤਕ ਪੁਜਣਾ, ਜ਼ਿੰਦਗੀ ਦੀ ਆਖ਼ਰੀ ਮੰਜ਼ਲ ਨੂੰ ਛੋਹਣਾ ਹੈ। ਪੁਰਾਣੇ ਰਿਸ਼ੀਆਂ ਨੂੰ ਆਪਣੀਆਂ ਕਾਮਨਾਵਾਂ ਤੇ ਆਪ ਕਾਬੂ ਨਾ ਰਿਹਾ ਅਤੇ ਆਪਣੇ ਸਾਰੇ ਤਪ ਇਸਤਰੀ ਹੁਸਨ ਵਿਚ ਸਮਰਪਨ ਕਰ ਦਿੱਤੇ। ਪਿਛੋਂ ਆਪ ਹੀ ਇਸਤਰੀ ਛੋਹਣ ਨੂੰ ਨਰਕੀ ਸੱਦਾ ਕਰਾਰ ਦੇ ਦਿੱਤਾ । ਮਰਦ ਹਾਕਮ ਸੀ, ਉਸ ਜੋ ਚਾਹਿਆ ਫਤਵਾ ਦੇ ਦਿੱਤਾ ਅਤੇ ਦੁਨੀਆ ਦੇ ਸਾਰੇ ਕਲੰਕ ਇਸਤਰੀ ਜਾਤ ਨਾਲ ਚਮੇੜ ਦਿੱਤੇ।'

'ਪਰ ਨਵੀਨ ਇਸਤਰੀ, ਮਰਦ ਦੇ ਸਾਰੇ ਹੱਕ ਖੋਹ ਕੇ ਹੁਣ ਖੂਬ ਬਦਲਾ ਲੈ ਰਹੀ ਹੈ।