"ਪਰ ਚੰਗੀ ਤਰ੍ਹਾਂ ਜਾਣ ਲੈ ਕਿ ਬੇਸ਼ੱਕ ਤੂੰ ਇਹਦੀ ਮਾਂ ਹੈਂ ਤੇ ਇਹ ਵੀ ਹੁਣ ਤੇਰੀ ਪੀ ਹੈ, ਤਾਂ ਵੀ ਤੁਹਾਡਾ ਇਕ-ਦੂਜੇ ਉੱਤੇ ਕੋਈ ਹੱਕ ਨਹੀਂ ਹੈ-ਪਿਆਰ ਉੱਤੇ ਵੀ ਨਹੀਂ।
"ਕਿਉਂ ਕਿ ਜਨਮ ਦੇਣ ਦੀ ਕਿਰਿਆ ਵਿਚ ਤੇ ਕੁਝ ਸਾਂਝਾ ਕਰਨ ਵਿਚ ਹੱਕ ਨਦਾਰਦ ਹੈ। ਇਥੇ ਸਿਰਫ਼ ਜੀਵਨ ਦੀ ਧਾਰਾ ਹੀ ਵਹਿ ਰਹੀ ਹੈ, ਤੇ ਉਸ ਧਾਰਾ ਵਿਚ ਵੀ ਸਿਰਵੇ ਪਿਆਰ ਹੀ ਵਹਿ ਰਿਹਾ ਹੈ, ਹਮੇਸ਼ਾ ਆਪਣੇ ਆਪ ਨਾਲ ਹੋਰ ਗੂੜ੍ਹੀ ਏਕਤਾ ਨੂੰ ਤਾਂਘਦਾ ਹੋਇਆ।
"ਫੇਰ ਵੀ ਭੈਣੇ, ਇਹ ਏਕਤਾ ਇਥੇ ਧਰਤੀ 'ਤੇ ਤੇਰੇ ਕੋਲ ਪੁੱਜੇਗੀ, ਤੇ ਤੂੰ ਇਸ ਨੂੰ ਪਰਿਵਾਰ ਦੀ ਮਿੱਠੀ-ਨਿੱਘੀ ਸਾਂਝ ਦੇ ਅਨੁਭਵ ਵਿਚੋਂ ਮਹਿਸੂਸ ਕਰ ਸਕੇਂਗੀ।
"ਹਾਂ, ਤੇ ਉਸ ਸ਼ਬਦ ਦੇ ਮਨੁੱਖ ਵੱਲੋਂ ਸਿਰਜੇ ਅਰਥਾਂ ਦੇ ਪਾਰ ਜਾਂਦਿਆਂ, ਤੁਸੀ ਮਹਿਸੂਸ ਕਰੋਗੇ ਕਿ ਪਰਿਵਾਰ ਕਿਸੇ ਸ਼ਰੀਕੇ ਜਾਂ ਸਮੂਹ ਦੀ, ਸਹੂਲਤਾਂ ਤੇ ਹਾਲਾਤ ਵਿਚ ਬੱਝੀ, ਨੇੜਤਾ ਤੋਂ ਕਿਤੇ ਉਪਰ ਹੈ। ਪਰਿਵਾਰ ਇਕ ਪਿਆਰ-ਭਰੇ ਹਿਰਦੇ ਦੀ ਦੂਸਰੇ ਹਿਰਦੇ ਨਾਲ ਸਾਂਝ ਦਾ ਨਾਂਅ ਹੈ।
"ਇਕੇਰਾਂ ਉਹ ਸਾਂਝ ਜਾਂ ਰਿਸ਼ਤਾ ਸੱਚੇ ਅਰਥਾਂ ਵਿਚ ਸਮਝ ਪੈ ਜਾਵੇ, ਸਾਰੀ ਸ੍ਰਿਸ਼ਟੀ ਉਸ ਪਰਮ-ਪ੍ਰਕਾਸ਼ ਵਿਚ ਨਹਾ ਰਹੀ ਹੋਵੇਗੀ, ਜੋ ਕਿ ਡੂੰਘੇ ਖਲਾਅ ਤੋਂ ਤੁਹਾਡੇ ਹਿਰਦੇ ਨੂੰ ਰੌਸ਼ਨ ਕਰਨ ਲਈ ਉੱਡ ਕੇ ਆਇਆ ਹੈ।
'ਤੇ ਇਸ ਤਰ੍ਹਾਂ ਸਾਰਾਹ, ਸਾਰਾ ਬ੍ਰਹਿਮੰਡ ਉਸ ਪ੍ਰਕਾਸ਼ ਨਾਲ ਪ੍ਰਕਾਸ਼ਵਾਨ ਹੋ ਜਾਵੇਗਾ ਤੇ ਪਿਆਰ ਦੇ ਸਿਵਾਇ ਹੋਰ ਕੁਝ ਨਹੀਂ ਬਚੇਗਾ। ਇਹ ਪਿਆਰ ਜਨਮ ਤੋਂ ਪਹਿਲਾਂ ਹੀ ਸਾਡੇ ਆਲੇ-ਦੁਆਲੇ ਹੁੰਦਾ ਹੈ ਤੇ, ਏਦਾਂ, ਸਿਰਫ਼ ਪਿਆਰ ਹੀ ਸੱਚੇ ਅਰਥਾਂ ਵਿਚ ਸਾਡੀਆਂ ਜ਼ਿੰਦਗੀਆਂ ਨੂੰ ਪ੍ਰਫੁੱਲਿਤ ਕਰਦਾ ਹੈ।
"ਕਿਉਂ ਕਿ ਤੂੰ ਆਪਣੇ ਬੱਚਿਆਂ ਨੂੰ ਜੰਮਦੀ ਹੈ, ਇਸ ਲਈ ਵੀ ਉਹ ਰਹਿੰਦੀ ਸ੍ਰਿਸ਼ਟੀ ਤੱਕ ਨਵੇਂ ਜਨਮ ਲੈਂਦੇ ਰਹਿਣਗੇ, ਬਿਲਕੁਲ ਉਵੇਂ, ਜਿਵੇਂ 'ਹਰ ਪਲ' ਨਵੇਂ ਰੂਪ 'ਚ ਜਨਮ ਲੈਂਦਾ ਰਹਿੰਦਾ ਹੈ।
"ਤੇ ਉਸ ਸਦਾ ਬਹਾਰ ਪੁਨਰ-ਜਨਮ ਵਿਚ ਉਹ ਹਮੇਸ਼ਾ ਪਿਆਰ ਵਿਚ ਘਿਰੇ ਰਹਿੰਦੇ ਹਨ।
"ਦਰਅਸਲ, ਕਿਉਂ ਕਿ ਉਹ ਜੀਵਨ ਦਾ ਨ੍ਰਿਤ ਨੱਚਦੇ ਰਹੇ ਸਨ, ਇਸ ਲਈ ਉਹ ਯੁਗਾਂ-ਯੁਗਾਂ ਤੱਕ ਨੱਚਦੇ ਰਹਿਣਗੇ। ਹਾਂ, ਕਿਉਂ ਕਿ ਕਿਸੇ ਹੋਰ ਨੇ ਵੀ ਤੁਹਾਨੂੰ ਵਾਅਦਾ ਕੀਤਾ ਹੈ, ਤੁਹਾਡਾ ਜੀਵਨ ਅਨੰਤ ਜੋ ਹੈ।
"ਫੇਰ ਵੀ ਨਾ ਤਾਂ ਤੁਹਾਨੂੰ ਆਪਣੇ ਬੱਚਿਆਂ ਦੀਆਂ ਨ੍ਰਿਤ ਸ਼ੈਲੀਆਂ ਨੂੰ ਸਮਝਣ ਦੀ ਲੋੜ ਹੈ, ਨਾ ਹੀ ਕਾਬੂ ਹੇਠ ਰੱਖਣ ਦੀ, ਤੇ ਜਦੋਂ ਤੁਸੀਂ ਉਨ੍ਹਾਂ ਦੇ ਨ੍ਰਿਤ ਦੀਆਂ ਧੁਨਾਂ ਨੂੰ ਬਹੁਤੀ ਦੋਰ ਨਹੀਂ ਸੁਣ ਸਕਦੇ, ਉਦੋਂ ਵੀ ਡਰੇ ਨਾ।
"ਦਰਅਸਲ ਮੈਂ ਚਾਹੁੰਨਾਂ ਕਿ ਤੁਸੀਂ ਆਪਣੇ ਹਿਰਦੇ ਨੂੰ ਸ਼ਾਂਤ ਰੱਖੋ, ਇਹ ਜਾਣਦਿਆਂ ਹੋਇਆ ਕਿ ਉਹ ਵੀ ਉਸੇ ਸੰਗੀਤ 'ਤੇ ਨੱਚਦੇ ਹਨ, ਜਿਸ ਨੇ ਤੁਹਾਨੂੰ ਨਚਾਇਆ ਹੈ ਤੇ ਇਹ ਵੀ ਕਿ ਉਨ੍ਹਾਂ ਦੇ ਨੱਚਣੇ-ਟੱਪਣੇ ਨੇ ਉਨ੍ਹਾਂ ਦੇ ਆਪਿਆਂ ਨੂੰ ਸਿਰਫ਼ ਨ੍ਰਿਤਕ ਦੇ ਸੁਭਾਅ ਦੇ ਅਨੁਕੂਲ ਬਦਲਿਆ ਹੈ।
