ਕਾਰੋਬਾਰੀ ਕਾਰ-ਵਿਹਾਰ

ਤੇ ਇਕ ਵਪਾਰੀ ਬੋਲਿਆ- "ਸਾਨੂੰ ਕਾਰੋਬਾਰੀ ਕਾਰ-ਵਿਹਾਰ (ਖਰੀਦ-ਵੇਚ) ਬਾਰੇ ਕੁਝ ਦੱਸੋ।"

ਤੇ ਉਸ ਨੇ ਜੁਆਬ ਵਿਚ ਕਿਹਾ-

"ਇਹ ਧਰਤੀ ਤੁਹਾਨੂੰ ਆਪਣੇ ਸਾਰੇ ਫਲ ਦਿੰਦੀ ਹੈ, ਤੇ ਤੁਹਾਨੂੰ ਕਦੇ ਕੋਈ ਤੋਟ ਨਹੀਂ ਹੋਏਗੀ, ਜੇ ਤੁਸੀਂ ਇਹ ਜਾਣ ਲਓ ਕਿ ਤੁਸੀਂ ਇਨ੍ਹਾਂ ਨੂੰ ਆਪਣੇ ਹੱਥਾਂ 'ਚ ਕਿਵੇਂ ਭਰ ਲੈਣੇ ।

ਧਰਤੀ ਦੀਆਂ ਇਨ੍ਹਾਂ ਸੌਗ਼ਾਤਾਂ ਦਾ ਸਿੱਧਾ ਲੈਣ-ਦੇਣ ਕਰਨ 'ਚ ਹੀ ਤੁਸੀਂ ਇਨ੍ਹਾਂ ਦੀ ਭਰਮਾਰਤਾ ਹਾਸਿਲ ਕਰ ਕੇ ਸੰਤੁਸ਼ਟ ਹੋ ਜਾਓਗੇ।

ਫੇਰ ਵੀ ਇਹ ਲੈਣ-ਦੇਣ ਜੇ ਪਿਆਰ, ਦਿਆਲਤਾ ਤੇ ਨਿਆਂ-ਪੂਰਵਕ ਨਹੀਂ ਹੋਏਗਾ, ਤਾਂ ਇਸ ਕਰਕੇ ਕੁਝ ਲੋਕ ਲੋਭ ਦੇ ਚੁੰਗਲ 'ਚ ਫਸ ਜਾਣਗੇ ਤੇ ਕੁਝ ਲੋਕ ਭੁੱਖ ਦੀ।

ਤੇ ਤੁਸੀਂ ਸਾਰੇ ਲੋਕ, ਜੋ ਸਮੁੰਦਰ 'ਚ, ਖੇਤਾਂ 'ਚ ਜਾਂ ਅੰਗੂਰਾਂ ਦੇ ਬਾਗ਼ਾਂ 'ਚ ਕੰਮ ਕਰਦੇ ਹੈਂ, ਜਦੋਂ ਮੰਡੀ 'ਚ ਆ ਕੇ ਜੁਲਾਹਿਆਂ ਨੂੰ, ਘੁਮਿਆਰਾਂ ਨੂੰ ਜਾਂ ਮਸਾਲੇ ਦੇ ਭੰਡਾਰੀਆਂ ਨੂੰ ਮਿਲੋ, ਤਾਂ ਧਰਤੀ ਦੀ ਉਸੇ ਪਵਿੱਤਰ ਆਤਮਾ ਦਾ ਧਿਆਨ ਧਰੋ ਕਿ ਉਹ ਤੁਹਾਡੇ ਵਿਚਕਾਰ ਆ ਕੇ ਤੁਹਾਡੀ ਤੱਕੜੀ ਨੂੰ ਪਵਿੱਤਰ ਕਰ ਕੇ ਹਰ ਚੀਜ਼ ਦੇ ਭਾਰ ਤੇ ਮੁੱਲ ਦਾ ਉਚਿਤ ਤੇ ਸਹੀ ਮੁੱਲਾਂਕਣ ਕਰੇ।*

ਤੇ ਜੇ ਤੁਹਾਡੇ ਇਸ ਕਾਰੋਬਾਰ 'ਚ ਕੁਝ ਅਜਿਹੇ ਲੋਕ ਵੀ ਸ਼ਾਮਿਲ ਹੁੰਦੇ ਨੇ, ਜਿਨ੍ਹਾਂ ਦੇ ਹੱਥ ਸੱਖਣੇ ਨੇ, ਤਾਂ ਵੀ ਤੁਹਾਨੂੰ ਮਾਯੂਸ ਨਹੀਂ ਹੋਣਾ ਚਾਹੀਦਾ, ਕਿਉਂਕਿ ਇਹ ਲੋਕ ਤੁਹਾਡੀ ਮਿਹਨਤ ਦਾ ਮੁੱਲ ਆਪਣੇ ਵਿਚਾਰਾਂ ਨਾਲ 'ਤਾਰਨਗੇ।**

* ਗੁਰਬਾਣੀ ਵੀ ਸੱਚ ਤੇ ਈਮਾਨਦਾਰੀ ਦਾ ਪੱਲਾ ਫੜ ਕੇ ਵਪਾਰ ਕਰਨ ਦਾ ਸੁਨੇਹਾ ਦਿੰਦੀ ਹੈ

'ਸਚੁ ਵਾਪਾਰੁ ਕਰਹੁ ਵਾਪਾਰੀ

ਦਰਗਹਿ ਨਿਬਹੈ ਖੇਪਿ ਤੁਮਾਰੀ।

** ਸ਼ਾਹ ਹੁਸੈਨ ਵੀ ਗਾਹਕ ਨੂੰ ਖ਼ਾਲੀ ਹੱਥ ਨਾ ਮੋੜਨ ਦੀ ਸ਼ਾਹ ਮੌਤ ਦਿੰਦਿਆਂ ਕਹਿੰਦਾ ਹੈ

'ਗਾਹਕੁ ਵੈਂਦਾ ਈ ਕੁਝ ਵਟਿ ਲੈ,

ਆਇਆ ਗਾਹਕ ਮੂਲ ਨਾ ਮੋੜੇ ਟਕਾ ਪੰਜਾਹਾ ਘੱਟ ਲੈ,

ਹੋਰਨਾਂ ਨਾਲ ਉਧਾਰ ਕਰਦੀ ਸਾਥਹੁ ਭੀ ਕੁਝ ਹਥਿ ਹੈ,

ਕਹੈ ਹੁਸੈਨ ਫ਼ਕੀਰ ਨਿਮਾਣਾ ਇਹ ਸ਼ਾਹਾਂ ਦੀ ਮਤਿ ਲੈ।'

ਹੋਰਨਾਂ ਨਾਲ ਉਧਾਰ ਕਰਦੀ ਸਾਥਹੁ ਭੀ ਕੁਝ ਹਥਿ ਹੈ,

ਕਹੈ ਹੁਸੈਨ ਫ਼ਕੀਰ ਨਿਮਾਣਾ ਇਹ ਸ਼ਾਹਾਂ ਦੀ ਮਤਿ ਲੈ।'

(ਹਵਾਲਾ-ਪੰਜਾਬੀ ਅਨੁਵਾਦਕ)