ਮਾਊਂਟ ਆਬੂ ਝਲਕਾਂ

ਭਰਥਰੀ ਹਰੀ ਦੀ ਗੁਫ਼ਾ

ਸੁੰਦਰੀਆਂ ਤਜ ਭਰਥਰੀ ਨੱਠਾ

ਨੇਹੁ ਦਰੀਂ ਸੰਗ ਆਨ ਲਗਾਯਾ।

ਕਵਿਤਾ ਸੁੰਦਰੀ ਨਾਲੇ ਆਈ

ਕਿਵੇਂ ਨ ਇਸਨੇ ਨੇਹੁੰ ਤੁੜਾਯਾ।

ਦਰੀਂ ਵਸੰਦਿਆਂ ਕਵਿਤਾ ਸੁੰਦਰੀ

ਦੋ ਪੁਤਾਂ ਨੂੰ ਜਨਮ ਦਿਵਾਯਾ,

'ਨੀਤੀ' ਤੇ 'ਵੈਰਾਗ' ਸ਼ਤਕ ਬਨ

ਵਿਦਵਾਨਾਂ ਨੂੰ ਜਿਨ੍ਹਾਂ ਲੁਭਾਯਾ। ੫੩।

(ਆਬੂ ੧੨-੧੦-੩੩) ਖ.ਸ. ੭-੧-੧੯੮੦

ਟੂਕ:- ਭਰਥਰੀ ਹਰੀ ਨੇ ਲਿਖਿਆ ਹੈ 'ਏਕਾ ਨਾਰੀ ਸੁੰਦਰੀ ਵਾ ਦਰੀ ਵਾ'। ਅਰਥਾਤ ਇਕੇ ਨਾਰੀ ਚਾਹੀਦੀ ਹੈ ਚਾਹੇ ਇਸਤ੍ਰੀ ਚਾਹੇ ਕੰਦ੍ਰਾ। ਉਸ ਕਥਨ ਪਰ ਇਹ ਸਵੈਯਾ ਭਾਈ ਸਾਹਿਬ ਜੀ ਨੇ ਲਿਖਿਆ। ਭਰਥਰੀ ਦੀ ਗੁਫ਼ਾ ਅਚਲੇਸ਼੍ਵਰ ਹੈ। ਅਚਲ ਗੜ੍ਹ ਦੀ ਚੜਾਈ ਤੋਂ ਹੇਠਾਂ ਝੀਲ ਕਿਨਾਰੇ ਜਿਸ ਵਿਚ ਤ੍ਰੈ ਮਹਿਆਂ (ਸਾਂਡ- He buffalo) ਦੇ ਪੱਥਰ ਦੇ ਬੁੱਤ ਹਨ ਤੇ ਇਕ ਤੀਰੰਦਾਜ਼ ਹੈ। ਭਾਈ ਵੀਰ ਸਿੰਘ ਜੀ ਅਚਲਗੜ੍ਹ ੨੭ ਸਤੰਬਰ ੧੯੩੩ ਨੂੰ ਗਏ ਸਨ।

-ਸੰਪਾਦਕ

–––––––––––––––

ਦਰੀ = ਕ੍ਰੰਦਾ।