ਕਰਤ੍ਰੀ ਸ਼ਕਤੀ ਵਾਲੇ ਤੇ ਖੋਰੀ

'ਕਰਤ੍ਰੀ ਸ਼ਕਤਿ' ਜਿਨ੍ਹਾਂ ਵਿਚ ਪਾਈ

ਓਹ ਕਰਨੋ ਨਹੀਂ ਰਹਿੰਦੇ,

ਕੀਤੇ ਨਾਲ ਚੰਦ ਜਿਉਂ ਚਮਕਣ

ਖੋਰੀ* ਚਮਕ ਨ ਸਹਿੰਦੇ।

ਚਾਂਦ-ਮਾਰੀ' ਦਾ ਚੰਦ ਉਨ੍ਹਾਂ ਨੂੰ

ਖੋਰੀ" ਹੈਨ ਬਣਾ ਲੈਂਦੇ,

ਪਰ ਓ ਫੁੰਡੇ ਜਾਂਦੇ ਹਸਦੇ

ਕਿਸੇ ਨਾਲ ਨਾ ਖਹਿੰਦੇ। ੬੯।

(੧੩-੯-੧੯੪੧) ਖ.ਸ. ੨੯ ਅਗਸਤ, ੧੯੮੦

 

ਵਿਦਯਾ ਦੀ ਪੁਕਾਰ

ਰੂਪ ਧਾਰਕੇ ਤੇਜ ਪ੍ਰਤਾਪ ਵਾਲਾ

ਵਿਦਯਾ ਸੂਰਜ ਦੇ ਵਾਂਗ ਹੈ ਦੇਸ਼ ਆਈ।

 

ਖੜੀ ਤਖ਼ਤ ਪ੍ਰਕਾਸ਼ ਤੇ ਕੂਕਦੀ ਏ

ਮੇਰੀ ਸ਼ਰਨ ਆਵੋ ਮੇਰੀ ਸ਼ਰਨ ਭਾਈ।

 

ਜਿਸਨੂੰ ਲੋੜ ਹੈ ਸੁਖ ਅਰਾਮ ਵਾਲੀ

ਮੇਰੀ ਸ਼ਰਨ ਆਵੇ ਸਾਰਾ ਜ਼ੋਰ ਲਾਈ।

 

ਕਾਮਯਾਬੀ ਦਾ ਤੁਰਲਾ ਜੋ ਲੋਚਦਾ ਹੈ

ਮੇਰੀ ਸ਼ਰਨ ਆਵੇ ਕਰੇ ਅਜ ਧਾਈ॥੭੦॥

ਖਾ.ਸ. ੨੦ ਮਾਰਚ, ੧੯੧੯

–––––––––

* ਬਦਲੇ ਦੀ ਭਾਵਨਾ ਵਾਲੇ।

1. ਬਦਲਾ ਲੈਣ ਦੀ ਮਾਰ ਦੇ ਦਾਇਰੇ ਵਿਚ।