ਤੂੰ ਕਿੱਥੋਂ ਸੁਣਿਆ ਮੁੰਡੇ ਰੋਂਦੇ ਨਹੀਂ ਹੁੰਦੇ
ਪੱਥਰਾਂ ਜਿਹੇ ਦਿਲ ਸੁਣੀਂਦੇ,
ਮੋਮ ਦੇ ਵਾਂਗ ਚੋਂਦੇ ਨਹੀਂ ਹੁੰਦੇ।
ਸੁਣੀਆਂ ਗੱਲਾਂ ਅਫ਼ਵਾਹ ਵੀ ਹੁੰਦੀਆਂ,
ਤੂੰ ਕਿੱਥੋਂ ਸੁਣਿਆ ਮੁੰਡੇ ਰੋਂਦੇ ਨਹੀਂ ਹੁੰਦੇ।
ਦਿਲ ਭਰਿਆ-ਭਰਿਆ ਰਹਿੰਦਾ, ਮੁੱਖ ’ਤੇ ਹਾਸੇ ਹੁੰਦੇ ਨੇ,
ਅੱਖਾਂ ਓਹਦੀਆਂ ਦੇਖੀਂ, ਦੁੱਖ ਖਾਸੇ ਹੁੰਦੇ ਨੇ।
ਨਿੱਤ ਹੀ ਨਵੇਂ ਕਿੱਸੇ ਹਰ ਰੋਜ ਹੁੰਦੇ ਨੇ,
ਤੂੰ ਕੀ ਜਾਣੇ ਕਿੰਨੇ ਰਿਸ਼ਤਿਆਂ ਦੇ ਬੋਝ ਹੁੰਦੇ ਨੇ।
ਜਦ ਕਿਧਰੇ ਵੀ ਵਧੀਕੀ ਹੋਏ,
ਇਹ ਡਿੱਗ ਪੈਂਦੇ ਕਿਉਂਕਿ ਪੱਕੇ ਬਨੇਰੇ ਚੋਂਦੇ ਨਹੀਂ ਹੁੰਦੇ।
ਸੁਣੀਆਂ ਗੱਲਾਂ ਅਫਵਾਹ ਵੀ ਹੁੰਦੀਆਂ,
ਤੂੰ ਕਿੱਥੋਂ ਸੁਣਿਆ ਮੁੰਡੇ ਰੋਂਦੇ ਨਹੀਂ ਹੁੰਦੇ।
ਕੋਈ ਮਾਂ ਨਾਲ ਕੋਈ ਬਾਪ ਨਾਲ, ਉਹਦੇ ਵੀ ਤਾਂ ਗਿਲੇ ਹੋਣਗੇ,
ਜੋ ਮਲ੍ਹਮ ਚੱਕੀ ਫਿਰਦਾ ਏ, ਜ਼ਖਮ ਉਹਨੂੰ ਵੀ ਤਾਂ ਮਿਲੇ ਹੋਣਗੇ।
ਮਰ ਮੁੱਕ ਜਾਣਾ ਤਾਂ ਅੱਡ ਮੁੱਦਾ,
ਜਿਉਂਦੇ ਜੀਅ ਚੈਨ ਦੀ ਨੀਂਦੇ ਸੌਂਦੇ ਨਹੀਂ ਹੁੰਦੇ।
ਸੁਣੀਆਂ ਗੱਲਾਂ ਅਫਵਾਹ ਵੀ ਹੁੰਦੀਆਂ,
ਤੂੰ ਕਿੱਥੋਂ ਸੁਣਿਆ ਮੁੰਡੇ ਰੋਂਦੇ ਨਹੀਂ ਹੁੰਦੇ।
